قازاقستاندا سۋارۋ ماۋسىمىنا دايىندىق قالاي

استانا. KAZINFORM - «قازسۋشار» مەكەمەسىنىڭ تۇركىستان وبلىستىق فيليالى سۋارۋ ماۋسىمىنا دايىندىق اياسىندا ءوز قاراماعىنداعى كانالداردىڭ 600 شاقىرىمنان استام جەرىن مەحانيكالىق ادىسپەن تازالادى. بۇدان بولەك، مەملەكەتارالىق «حانىم» كانالىنىڭ 18 شاقىرىمعا جۋىق بولىگىنە مەحانيكالىق تازالاۋ جۇمىسى جۇرگىزىلىپ، 20 مىڭ تەكشە مەتر لاي تۇنباسى شىعارىلدى.

فيليال قىزمەتكەرلەرى «نايمان» كانالىنىڭ 7,5 شاقىرىم بولىگىن بەتونمەن قاپتادى.

ال، تۇلكىباس اۋدانىندا 77 شاقىرىمنان استام كانال بەتوندالادى. بۇگىنگى تاڭدا 13 بىردەي كانالدا قۇرىلىس جۇمىستارى ءجۇرىپ جاتىر.

«قازسۋشار» مەكەمەسىنىڭ د. قونايەۆ اتىنداعى ۇلكەن الماتى كانالى فيليالى ەڭبەكشىقازاق اۋدانىنداعى 5 گيدروتەحنيكالىق قۇرىلىسقا اعىمداعى جوندەۋ جۇمىستارىن جۇرگىزدى.

بۇدان بولەك، اۋدانداعى 6,1 شاقىرىم كانالدا مەحانيكالىق تازالاۋ جانە 26 گيدروبەكەتتە جوندەۋ- قالپىنا كەلتىرۋ جۇمىستارى جۇرگىزىلدى.

بۇگىنگى كۇنى كانالدار ارقىلى سۋ بەرۋ بويىنشا قىزمەت كورسەتۋگە 355 شارت جاسالىپ، ىلعالداندىرۋ جۇمىستارىنا 3,6 ميلليون تەكشە مەتر سۋ بەرىلدى. ناقتى سۋلاندىرىلعان جەر كولەمى - 2000 گەكتار.

قىزىلوردا وبلىسى بويىنشا «قازسۋشار» فيليالى ەگىس القاپتارىنا سۋ جەتكىزىپ بەرەتىن جاڭارىق كانالىنىڭ 7 شاقىرىمى مەحانيكالىق ادىسپەن تازالانىپ، 132 مىڭ تەكشە مەتر توپىراق شىعارىلدى.

بۇدان بولەك، قازالى اۋدانىنىڭ ەگىس القاپتارىنا سۋ جەتكىزەتىن ەڭبەك (ۇزىندىعى - 6,1 شاقىرىم) جانە كازسسر 50 جىلدىق (ۇزىندىعى - 3,5 شاقىرىم) كانالدارىنا تازالاۋ جۇمىستارى جۇرگىزىلدى.

سىرداريا اۋدانىندا سول جاعا ماگيسترالدى كانالىنىڭ بولىگى توپىراقپەن نىعايتىلدى.

«قازسۋشار» مەكەمەسىنىڭ جەتىسۋ وبلىستىق فيليالىنا تيەسىلى سۋ ارنالارى دا سۋارۋ ماۋسىمىنا دايىن.

فيليال قىزمەتكەرلەرى 74 شاقىرىمعا جۋىق سۋ ارناسىن مەحانيكالىق ادىسپەن تازالاپ، 174 تەكشە مەترگە بەتونداۋ جۇمىستارىن جۇرگىزدى.

بۇدان بولەك، بيىل 54 گيدروتەحنيكالىق قۇرىلىستى جوندەۋدەن وتكىزۋ جوسپاردا بار.

«قازسۋشاردىڭ» اقمولا وبلىستىق فيليالىنا تيەسىلى نىسانداردا دا ۆەگەتاتسيا كەزەڭى باستالدى.

شاعالالى سۋ قويماسى جانە «نۇرا- ەسىل» ارناسى ايماقتاعى تۇراقتى سۋارۋ كوزدەرى بولىپ تابىلادى.

بۇگىنگى تاڭدا سۋ تۇتىنۋشىلارمەن كەلىسىمشارت جاساۋ جۇمىسى ءجۇرىپ جاتىر. ايتا كەتۋ كەرەك، وڭىردە 1971,03 گەكتار ەگىس القابى سۋارمالى سۋمەن قامتاماسىز ەتىلەدى.

جامبىل وبلىسى بويىنشا «قازسۋشار» فيليالى دا سۋارمالى كەزەڭگە دايىندىق اياسىندا سۋ شارۋاشىلىعى نىساندارىندا مەحانيكالىق تازالاۋ، اكتەۋ- سىرلاۋ، قاقپالاردى مايلاۋ جانە اعىمدى جوندەۋ جۇمىستارىن جۇرگىزىپ جاتىر.

بايزاق، جامبىل، قورداي، تالاس جانە سارىسۋ اۋداندارىندا ۆەگەتاتسيالىق كەزەڭ باستالىپ، شارۋالاردىڭ سۇرانىسىنا ساي سۋ جىبەرىلىپ جاتىر.