قازاقستاندا قۇستىڭ 20 جاڭا ءتۇرى تابىلدى
الماتى. KAZINFORM - كەيىنگى جىلدارى قازاقستان اۋماعىندا بۇرىن تىركەلمەگەن قۇستاردىڭ 20-دان استام جاڭا ءتۇرى تابىلدى. بۇل تۋرالى ورنيتولوگ، قازاقستان بيو الۋان تۇرلىلىكتى ساقتاۋ قاۋىمداستىعىنىڭ عىلىم جونىندەگى ديرەكتورى سەرگەي سكليارەنكو ايتتى.
- قازاقستاندا قازىر 520-دان استام قۇس ءتۇرى بار. جىل سايىن ەل اۋماعىنا جاڭا تۇرلەرى ۇشىپ كەلىپ جاتىر. ولاردى كوبىنە ءوز بەتىنشە باقىلاۋ جۇرگىزىپ، فوتوسۋرەت ارقىلى دالەلدەيتىن اۋەسقويلار انىقتايدى، - دەدى ول الماتى وڭىرلىك كوممۋنيكاتسيالار قىزمەتىندە وتكەن بريفينگ كەزىندە.
ونىڭ ايتۋىنشا، اۋەسقويلاردىڭ عىلىمعا قوساتىن ۇلەسى ارتىپ كەلەدى. قازاقستان ۇلكەن بولعانىمەن، بىزدە كاسىبي ورنيتولوگتار از، سوندىقتان ەنتۋزياستاردىڭ بيوالۋانتۇرلىلىك تۋرالى ءبىلىمدى كەڭەيتۋگە كوپ كومەگى ءتيىپ جاتىر. ولاردىڭ باقىلاۋى مەن دەرەكتەردى تىركەۋى قۇستاردىڭ كوشى-قونى مەن تارالۋى تۋرالى جاڭا عىلىمي مالىمەتتىڭ پايدا بولۋىنا سەپ بولادى.
سپيكەر ورنيتوفاۋنانىڭ قازىرگى جاعدايىنا توقتالىپ، جەكەلەگەن تۇرلەردىڭ ازايۋى - جاھاندىق ءۇردىس ەكەنىن ايتتى. قازاقستاندا بۇگىندە شامامەن 60-قا جۋىق قۇس ءتۇرى ءارتۇرلى دەڭگەيدە قاۋىپ-قاتەرگە ۇشىراعان.
- قۇستاردىڭ تىرشىلىگى ءاردايىم جايلى ەمەس، باستى قاۋىپ - ولاردىڭ مەكەن ەتۋ ورتاسىنىڭ جويىلۋى. بۇل ينفراقۇرىلىمنىڭ دامۋى، پايدالى قازبالاردى ءوندىرۋ، لاندشافتتىڭ وزگەرۋى مەن سۋلى- باتپاقتى القاپتاردىڭ قۇرعاۋىمەن بايلانىستى. سونىمەن قاتار قورشاعان ورتانىڭ لاستانۋى مەن مازالاۋ فاكتورى دا اسەر ەتەدى. الەمدىك دەرەكتەرگە قاراعاندا، بار قۇستىڭ سانىنىڭ شامامەن جارتىسى ازايعان، - دەدى سكليارەنكو.
سۇلۋ تىرنانىڭ سانى قىستايتىن ەلدەردەگى جاعدايعا دا بايلانىستى وزگەرىپ وتىرادى، بۇل حالىقارالىق ىنتىماقتاستىقتىڭ ماڭىزىن كورسەتەدى. يتەلگىنىڭ سانى زاڭسىز اۋلاۋ سالدارىنان ايتارلىقتاي قىسقارعان. سونداي- اق ەلەكتر جەلىلەرى دە جىل سايىن مىڭداعان جىرتقىش قۇستىڭ ولىمىنە سەبەپشى بولىپ جاتىر. جەل ەنەرگەتيكاسىنىڭ دامۋى دا اسەرىن تيگىزىپ وتىر.
قازاقستان بيوالۋانتۇرلىلىكتى ساقتاۋ قاۋىمداستىعىنىڭ عىلىم جونىندەگى ديرەكتورى سەرگەي سكليارەنكونىڭ سوزىنشە، ەرەكشە الاڭداۋشىلىق تۋدىراتىن ماسەلەلەردىڭ ءبىرى - ديكلوفەناك ۆەتەرينارلىق پرەپاراتى. ول بۇرىن ءۇندىستاندا ولەكسەمەن قورەكتەنەتىن قۇستار سانىنىڭ كۇرت ازايۋىنا اكەلگەن. قازىرگى ۋاقىتتا ول ەلدە پرەپاراتقا تىيىم سالىنعاننان كەيىن جاعداي بىرتىندەپ جاقسارا باستادى، الايدا باسقا ەلدەردە ونى قولدانۋ جاڭا قاۋىپتەر تۋدىرۋى مۇمكىن.
قالانىڭ ورتالىق بولىگىندە تورعايلار مەن قارلىعاشتاردىڭ سانى ايتارلىقتاي ازايعان، بۇل قالالىق ورتانىڭ وزگەرۋىمەن بايلانىستى. ال سۋ قۇستارى، كەرىسىنشە، قالادا قىستاپ قالۋدى جيىلەتكەن. مىسالى، بارقىلداق ۇيرەكتەر مۇز قاتپايتىن سۋ ايدىندارىندا مەكەندەپ، ادامداردان سەسكەنۋدى قويعان. سونىمەن قاتار قالادا ولياپكا مەن سيرەك كەزدەسەتىن كوك قۇس سياقتى تۇرلەر جيىرەك بايقالا باستادى.
ايتا كەتەيىك، بۇگىن، 1- ءساۋىر - حالىقارالىق قۇستار كۇنى. بۇعان دەيىن «بۋراباي» ۇلتتىق پاركى ماماندارى قۇستار تابيعاتتاعى ءمىنسىز جۇيەنى قالاي ساقتايتىنىن ايتىپ بەرگەن ەدى.