قازاقستاندا قاۋىپتى اۋرۋ تۇرلەرى ەنىپ كەتپەس ءۇشىن نە ىستەلىپ جاتىر
استانا. KAZINFORM – ق ر دەنساۋلىق ساقتاۋ مينيسترلىگىنىڭ سانيتاريالىق- ەپيدەميولوگيالىق باقىلاۋ كوميتەتى الەمدە قاۋىپتى ءتۇرلى ىندەتتىڭ تارالۋىنا قاتىستى ەلىمىزدەگى نىسانداردا قاۋىپسىزدىك قانشالىقتى كۇشەيتىلگەنىن ءتۇسىندىردى.
«قازاقستان اۋماعىنا جۇقپالى اۋرۋلاردىڭ تارالۋىنىڭ الدىن الۋ ماقساتىندا پروفيلاكتيكالىق جانە ىندەتكە قارسى ءىس-شارالار اتقارىلىپ جاتىر. اۋەجايلار مەن شەكارا وتكەلدەرىن قوسا العاندا، سانيتاريالىق-كارانتيندىك پۋنكتتەردە باقىلاۋ جۇمىستارى كۇشەيتىلدى. مايمىل شەشەگى تىركەلگەن ەلدەردەن كەلگەن ازاماتتارعا نازار اۋدارىلادى. ينفەكتسيانىڭ تارالۋىن بولدىرماۋ ءۇشىن دەنساۋلىق ساقتاۋ مينيسترلىگى مايمىل شەشەگى بويىنشا ەندەميالىق ەلدەرگە ساپارلاۋدى جوسپارلاپ وتىرعان ازاماتتاردى ساقتىق شارالارىن ساقتاۋعا شاقىرادى»، - دەلىنگەن ۆەدومستۆونىڭ Kazinform اگەنتتىگىنە بەرگەن جاۋابىندا.
ق ر باس مەملەكەتتىك سانيتاريالىق دارىگەرىنىڭ 2024 -جىلعى 16-تامىزداعى «تۇماۋ، جەدەل رەسپيراتورلىق ۆيرۋستىق ينفەكتسيالار جانە كوروناۆيرۋس ينفەكسياسى بويىنشا 2024-2025 -جىلداردىڭ ەپيدەميالىق ماۋسىمىنا ارنالعان سانيتاريالىق- پروفيلاكتيكالىق، سانيتاريالىق-ەپيدەمياعا قارسى ءىس-شارالار جۇرگىزۋ تۋرالى» قاۋلىسىنا ساي مەديتسينالىق ۇيىمداردا قىزمەتكەرلەردىڭ ماسكا تاعۋ رەجيمى ەنگىزىلدى.
كوميتەت مالىمەتىنشە، قازاقستاندا ادامداردىڭ قۇس تۇماۋى اۋرۋىن جۇقتىرۋ جاعدايى 2009 -جىلدان بەرى تىركەلگەن جوق. شەت ەلدەن كەلگەن ازاماتتارعا مىندەتتى تەرمومەتريا وتكىزۋ تۇرعىسىندا شەكاراداعى سانيتاريالىق-كارانتيندىك باقىلاۋ پۋنكتى تاۋلىك بويى ىسكە اسىرىپ جاتىر.
«قازاقستاندا مايمىل شەشەگىنىڭ بىردە-ءبىر جاعدايى تىركەلگەن جوق. دەنساۋلىق ساقتاۋ مينيسترلىگى ينفەكسيا ەلىمىزگە ەنىپ كەتپەس ءۇشىن ءتيىستى شارالاردى قابىلدادى. بۇل ىندەتپەن كۇرەستە بىلىكتى ماماندار جەتكىلىكتى. اۋرۋدىڭ تارالۋىنا جول بەرمەۋ ماقساتىندا مەديتسينالىق، زەرتحانالىق قىزمەتتىڭ جانە باسقا دا جۇمىلدىرىلعان قىزمەتتەردىڭ دايىندىعىنا مونيتورينگ جۇرگىزىلەدى»، - دەپ اتالىپ وتكەن سانيتاريالىق-ەپيدەميولوگيالىق باقىلاۋ كوميتەتى اقپاراتىندا.
جاقىندا پرەمەر- مينيستر ولجاس بەكتەنوۆ مايمىل شەشەگىنە قاتىستى اۋەجايلاردا باقىلاۋ جۇمىستارىن كۇشەيتۋدى تاپسىردى.