مۇنداي پىكىردى ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى ايگۇل قۇسپان Jibek Joly تەلەارناسىنداعى «ۋادە» باعدارلاماسىندا ءبىلدىردى.
بۇگىنگى كۇنى قازاقستاندا 992 ەر ازامات - اسكەري قىزمەتكەر بالا كۇتىمى بويىنشا دەمالىستا وتىر. دەپۋتاتتىڭ ايتۋىنشا، ەر ازاماتتار بالالارى ءۇش جاسقا تولعانعا دەيىن دەمالىسقا شىعۋ قۇقىعىنا يە.
- مۇنداي تاجىريبە 2014-جىلى باستالدى. سول كەزدە العاش رەت ءۇش اسكەري قىزمەتكەر - ەكى وفيتسەر مەن ءبىر سەرجانت دەكرەتكە شىققان. قازىر ولاردىڭ سانى 992 گە جەتتى. بۇل بالا كۇتىمى بويىنشا دەمالىسقا شىعاتىن ەر اسكەري قىزمەتكەرلەردىڭ سانى تۇراقتى كوبەيىپ كەلە جاتقانىن كورسەتەدى، - دەدى ايگۇل قۇسپان.
ونىڭ مالىمدەۋىنشە، دەكرەتتەگى قىزمەتكەرلەردىڭ 70 پايىزى - قاتارداعى جاۋىنگەرلەر مەن سەرجانتتار، ال 30 پايىزى - وفيتسەرلەر.
- بۇل ماسەلەنى كوبىنە قورعانىس مينيسترلىگى كوتەرىپ وتىر. مينيسترلىك وكىلدەرى دەكرەتكە شىعاتىن قىزمەتكەرلەر سانىنىڭ ءوسۋى ارميانىڭ جاۋىنگەرلىك قابىلەتى مەن دايىندىق دەڭگەيىنە اسەر ەتۋى مۇمكىن دەپ ەسەپتەيدى. جاۋىنگەرلىك دايىندىق دەگەنىمىز - ارميانىڭ قويىلعان مىندەتتەردى بەلگىلەنگەن مەرزىمدە، مۇمكىندىگىنشە قىسقا ۋاقىتتا ورىنداۋ قابىلەتى، - دەدى دەپۋتات.
ەر ازاماتتار دەمالىسقا ءارتۇرلى سەبەپپەن شىعادى - وتباسىلىق، قارجىلىق جانە باسقا دا جاعدايلارعا بايلانىستى. بالا كۇتىمى بويىنشا دەمالىس قىزمەت وتىلىنە قوسىلادى، زەينەتاقى ەسەپتەرىنە ەسەپتەلەدى، تۇرعىن ءۇي جەڭىلدىكتەرىن الۋعا جانە اسكەري اتاق الۋىنا مۇمكىندىك بەرەدى. بۇل دەمالىستى ماتەريالدىق جانە مانساپتىق تۇرعىدان تارتىمدى ەتەدى.
ايگۇل قۇسپان اسكەري قىزمەتكەرلەر ءۇشىن بالا كۇتىمى بويىنشا ۇزاق مەرزىمدى دەمالىس شارتتارىن قايتا قاراۋ قاجەتتىگىن ەرەكشە اتاپ ءوتتى.
بۇعان دەيىن ءبىز قورعانىس مينيسترلىگىنىڭ اسكەرگە شاقىرۋ ءتارتىبى مەن وعان قاتىستى زاڭسىزدىقتار جونىندە جاساعان ەسكەرتۋلەرى تۋرالى جازعان ەدىك.