قازاقستاندا قالدىقتاردى جيناۋ مەن وڭدەۋگە 185 ميلليارد تەڭگە بولىنەدى

استانا. KAZINFORM - «جاسىل دامۋ» ا ق «ونەركاسىپتى دامىتۋ قورى» ا ق ارقىلى قالدىقتاردى باسقارۋ سالاسىنداعى جوبالاردى جەڭىلدىكپەن قارجىلاندىرۋ مەحانيزمىن جۇرگىزۋدە. بۇل باعدارلاما قوقىس تاسيتىن كولىكتەردى، سۇرىپتاۋ جەلىلەرىن جانە قايتا وڭدەۋ زاۋىتتارىن ساتىپ الۋعا مۇمكىندىك بەرىپ، قالدىقتاردىڭ ازايۋىنا جانە قايتا وڭدەۋ سالاسىنىڭ دامۋىنا ىقپال ەتەدى.

185 ميلليارد تەڭگە كولەمىندەگى قاراجات 3 جىلدان 15 جىلعا دەيىنگى مەرزىمگە %3 جىلدىق سىياقى مولشەرلەمەسىمەن بەرىلەدى.

«وزدەرىڭىز بىلەتىندەي، ۇكىمەت قاۋلىسىمەن ءبىز قالدىقتاردى جيناۋعا، تاسىمالداۋعا جانە قايتا وڭدەۋگە سۇرىپتاپ جيناۋ بويىنشا ينفراقۇرىلىمدى دامىتۋعا شامامەن 185 ميلليارد تەڭگە بولەمىز. بۇگىنگى تاڭدا شامامەن 232 ميلليارد تەڭگەگە 94 جوبادان تۇراتىن پۋل قۇرىلدى. بۇل جۇمىس 2 كەزەڭگە بولىنەدى. ونەركاسىپتى دامىتۋ قورى ارقىلى ءبىرىنشى كەزەڭگە شامامەن 125201 ميلليون تەڭگەگە 30 كومپانيا ءوتتى، ولار قارجىلاندىرۋ ءۇشىن ءوز قۇجاتتارىن جيناپ جاتىر. ونىڭ ىشىندە 79929 ميلليون تەڭگەگە 14 وڭدەۋ كاسىپورنى، 49109 ميلليون تەڭگەگە - 10 قوقىس سۇرىپتاۋ كەشەنى جانە 1163 ميلليون تەڭگەگە - 21 ارنايى تەحنيكا ساتىپ الۋ بويىنشا 6 كاسىپورىن بار»، - دەدى «جاسىل دامۋ» ا ق باسقارما ءتوراعاسىنىڭ ورىنباسارى نۇرجان قابدولدانوۆ.

ولاردىڭ قاتارىندا جالپى سوماسى 104 ميلليارد تەڭگەگە زاۋىت قۇرىلىسى، ەلەكتر قۋاتىن وندىرەتىن، قاتتى تۇرمىستىق قالدىقتاردى قايتا وڭدەۋ تەحنو-ەكوپاركى (الماتى وبلىسى)، قاعاز جانە كارتون ءوندىرۋ زاۋىتىنىڭ قۇرىلىسى (الماتى ق. )، شىنىنى كادەگە جاراتۋ جانە قايتا وڭدەۋ جەلىسى بار شىنى ىدىستاردى شىعارۋ زاۋىتىنىڭ قۇرىلىسى (قىزىلوردا ق.) جوبالارى بار.

«ءبىز بۇل جوبالاردى تولىققاندى جۇزەگە اسىرامىز دەپ ۇمىتتەنەمىز»، - دەپ تولىقتىردى نۇرجان قابدولدانوۆ.