قازاقستاندا نان ونىمدەرىنىڭ باعاسى قانشا
قازاقستاندا قىرىققابات جانە كارتوپ قوسىلعان ءبالىش، تاندىر سامسا، ەت قوسىلعان جانە ءتاتتى پيروگ قۇنى قانشا؟ سالىستىرۋ كەزىندە كەيبىر قالالار اراسىنداعى باعادا كوپ ايىرماشىلىق بار ەكەنى انىقتالدى، دەپ حابارلايدى Kazinform اگەنتتىگىنىڭ ءتىلشىسى.
قازاقستانداعى وندىرىستە ءبىرىڭعاي تەحنولوگيا، لوگيستيكا بولعانىمەن نان ونىمدەرىنىڭ باعاسى ايماقتاردا ءارتۇرلى.
ءبىز ەلىمىزدەگى 20 ءىرى جانە ورتاشا قالالارداعى، استانادان باستاپ وڭتۇستىك پەن باتىستاعى باعانى سالىستىردىق. باعا ءارتۇرلى. وعان قوسپالاردىڭ قۇنى، باسەكەلەستىك دەڭگەيى، لوگيستيكا، عيماراتتى جالعا الۋ جانە پىسىرەتىن اسپازداردىڭ جالاقىسى سەبەپ.
ماسەلەن ەلىمىزدىڭ وڭتۇستىگىندەگى تۇركىستان، شىمكەنت جانە قىزىلوردادا كوشە ساۋداسى جاقسى دامىعان. سوندىقتان بولار باعا تومەن. ال سۇرانىس كوپ ءارى عيماراتتى جالعا الۋ قۇنى قىمبات الماتى مەن استانادا باعا جوعارى.
قىرىققابات قوسىلعان ءبالىش باعاسى 135-400 تەڭگە ارالىعىندا
باعا شىمكەنتتە ارزان. مۇندا ءبالىشتى 135 تەڭگەگە ساتىپ الۋعا بولادى. ەكىنشى ورىندا - پەتروپاۆل مەن تۇركىستان (150 تەڭگە)، ودان كەيىنگى ورىندا قىزىلوردا، كوكشەتاۋ مەن پاۆلودار (160-180 تەڭگە) تۇر.
قاراعاندى، قوستاناي مەن اقتوبەدە باعا 250 تەڭگە بولسا، استانا مەن جەزقازعاندا دا 250 تەڭگە شاماسىندا. ال الماتى، وسكەمەن مەن ورالدا ءبالىش باعاسى 300-400 تەڭگە ارالىعىندا.
پەشتە پىسكەن جانە تاندىر سامسا
پەشتە پىسكەن سامسا باعاسى قولجەتىمدى. ورتاشا باعاسى 250-350 تەڭگە، ال كەيبىر وڭىردە ودان دا تومەن. ماسەلەن قىزىلوردادا 180 تەڭگە، اتىراۋدا 260 تەڭگە، شىمكەنتتە 180-300 تەڭگە ارالىعىندا.
تاندىر سامسا قۇنى استانا، جەزقازعان جانە اقتوبەدە - 550-600 تەڭگە. شىمكەنتتە تاندىر سامسا قۇنى 750 تەڭگەگە جەتتى. بۇل ەلىمىزدەگى ەڭ جوعارى باعا. ال ارزانىن پەتروپاۆلدان (400 ت گ) جانە قىزىلوردادان (300 تەڭگە) تابا الاسىز.
ەت قوسىلعان پيروگتىڭ كەلىسى - 5200 تەڭگە
ەت قوسىلعان پيروگ - رەيتينگتەگى ەڭ قىمبات نان ءونىمى. قىزىلوردا مەن تۇركىستاندا كەلىسى - 2000 تەڭگە. بۇل ەڭ تومەن باعا. كوكشەتاۋ، تاراز، ورالدا (2700-3000 تەڭگە) باعا ءسال جوعارى.
الماتى، استانا، قونايەۆ پەن قاراعاندىدا باعا 3000-5 500 تەڭگە ارالىعىندا. ال سەمەي مەن وسكەمەندە باعا - 4500-5000 تەڭگە. ال ەڭ قىمبات ەت قوسىلعان پيروگ اتىراۋ مەن پەتروپاۆلدا. مۇندا كەلىسى 7200 تەڭگەگە دەيىن جەتەدى.
ءتاتتى پيروگ باعاسى قوسپاعا بايلانىستى ءارتۇرلى
ءتاتتى پيروگ باعاسى ەت قوسىلعان پيروگقا قاراعاندا جوعارى. بۇل جولدى دا تۇركىستاندا باعا تومەن. قۇنى - 1200 تەڭگە. اقتوبە مەن شىمكەنتتە 2000-2100 تەڭگە بولىپ تۇر.
الماتى، استانا، تالدىقورعان، سەمەي مەن قونايەۆتا ورتاشا باعا - 5000-7000 تەڭگە. ال جەزقازعاندا 8000 تەڭگەگە دەيىن جەتىپ تۇر. قازاقستان بويىنشا قىمباتى وسى. اتىراۋ مەن پەتروپاۆلدا باعا - 6500-7000 تەڭگە.