قازاقستاندا مۇگەدەكتىگى بار 700 مىڭنان اسا ادام تۇرادى

استانا. قازاقپارات - 2024-جىلعى 1-قازانداعى جاعداي بويىنشا قازاقستاندا مۇگەدەكتىگى بار 732,1 مىڭ ادام تۇرادى. ول حالىقتىڭ جالپى سانىنىڭ 3,6 پايىزىن قۇرايدى، ولاردىڭ 381,3 مىڭى ەڭبەككە قابىلەتتى جاستار، دەپ حابارلايدى ەڭبەك مينيسترلىگى.

ق ر الەۋمەتتىك كودەكسىنە سايكەس جەرگىلىكتى اتقارۋشى ورگاندار مۇگەدەكتىگى بار ادامدار ءۇشىن اۋىر جۇمىستارداعى، ەڭبەك جاعدايلارى زياندى، قاۋىپتى جۇمىستارداعى جۇمىس ورىندارىن ەسەپكە الماعاندا، جۇمىسشىلاردىڭ جالپى سانىنىڭ 2 دەن 4 پايىزنا دەيىن (جالدامالى جۇمىسكەرلەردىڭ جالپى سانى كەمىندە 50 ادام بولعان كەزدە) كولەمدە جۇمىس ورىندارىنا كۆوتا بەلگىلەيدى. اعىمداعى جىلدىڭ توعىز ايىنا كۆوتا شەڭبەرىندە مۇگەدەكتىگى بار 5,4 مىڭ ادام جۇمىسقا ورنالاستىرىلدى.

سونداي-اق ەرەكشە قاجەتتىلىكتەرى بار ادامدار جۇمىسپەن قامتۋعا جاردەمدەسۋدىڭ بەلسەندى شارالارىنا تارتىلۋدا. ماسەلەن، اعىمداعى جىلدىڭ 1-قازانداعى جاعداي بويىنشا تۇراقتى جۇمىسقا 5,9 مىڭ ادام، جاستار پراكتيكاسىنا - 505 ادام، الەۋمەتتىك جۇمىس ورىندارىنا - 654 ادام، قوعامدىق جۇمىستارعا - 5,9 مىڭ ادام، «كۇمىس جاس» جوباسى بويىنشا - 828 ادام، «العاشقى جۇمىس ورنى» جوباسى بويىنشا - 183 ادام، «ۇرپاقتار كەلىسىمشارتى» جوباسى بويىنشا - 6 ادام جۇمىسقا ورنالاستىرىلدى.

قىسقا مەرزىمدى كاسىپتىك وقىتۋمەن 272 ادام، «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋمەن 5 مىڭ ادام قامتىلدى.

حالىقتىڭ الەۋمەتتىك وسال توپتارىنا جاتاتىن ازاماتتارعا ءوز بيزنەسىن اشۋ ءۇشىن 400 ا ە ك- كە دەيىنگى (1,4 ميلليون تەڭگە) مولشەرىندە مەملەكەتتىك گرانتتار بەرىلەدى. بۇگىنگى تاڭدا 1470 مۇگەدەكتىگى بار ادام وسىنداي قولداۋعا يە بولدى.

سونداي-اق، 2018-جىلدان باستاپ حالىقارالىق تاجىريبەنى ەسكەرە وتىرىپ، مۇگەدەكتىگى بار ادامداردى جۇمىسقا ورنالاستىرۋ ءۇشىن ارنايى جۇمىس ورنىن جاراقتاندىرۋعا بايلانىستى جۇمىس بەرۋشىلەردىڭ شىعىندارىن سۋبسيديالاۋ ءتارتىبى ەنگىزىلدى. اعىمداعى جىلى وسىنداي 71 ارنايى جۇمىس ورنى قۇرىلدى.