قازاقستاندا ۇلتتىق سپورت تۋرالى زاڭ جوباسى ازىرلەنەدى

الماتى. KAZINFORM - دۇنيەجۇزىلىك كوشپەندىلەر ويىندارىنا دايىندىق اياسىندا الماتىداعى قازاق ۇلتتىق اگرارلىق زەرتتەۋ ۋنيۆەرسيتەتىندە «ق ر- دا ات سپورتى مەن ۇلتتىق جىلقى شارۋاشىلىعىنىڭ قازىرگى جاعدايى مەن دامۋ پەرسپەكتيۆالارى» اتتى دوڭگەلەك ۇستەل ءوتتى.

دوڭگەلەك ۇستەلگە ق ر ۇلتتىق عىلىم اكادەمياسىنىڭ پرەزيدەنتى، قازاق ۇلتتىق اگرارلىق زەرتتەۋ ۋنيۆەرسيتەتىنىڭ رەكتورى اقىلبەك كۇرىشبايەۆ، ق ر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ، ءماجىلىس دەپۋتاتى امانجول ءالتاي، سونداي- اق ق ر تۋريزم جانە سپورت مينيسترلىگىنىڭ، اۋىل شارۋاشىلىعى مينيسترلىگىنىڭ، عىلىمي قوعامداستىقتىڭ، سپورت كلۋبتارىنىڭ، ق ر ۇلتتىق سپورت قاۋىمداستىعىنىڭ وكىلدەرى جانە ونىڭ قۇرامىنا كىرەتىن فەدەراتسيالاردىڭ باسشىلارى مەن اتبەگىلەر قاتىستى.

ءىس- شارا بارىسىندا قازاقستاندا سپورتتىق جىلقى شارۋاشىلىعىن دامىتۋ، ات سپورتى مەن ۇلتتىق سپورت تۇرلەرىنەن ماماندار دايارلاۋ ماسەلەلەرى تالقىلاندى.

ق ر ۇلتتىق سپورت قاۋىمداستىعىنىڭ باسشىسى يسلامبەك سالجانوۆ ءوز سوزىندە ۇلتتىق سپورت سالاسىن رەتتەۋ ماسەلەلەرىنە جەكە توقتالىپ، قازاقستاندا وسىعان دەيىن بۇل سالانى رەتتەيتىن بىردە-ءبىر زاڭ قابىلدانباعانىن اتاپ ءوتتى.

«ق ر ۇلتتىق سپورت قاۋىمداستىعى ق ر پارلامەنت ءماجىلىسىنىڭ دەپۋتاتتارىمەن بىرگە ۇلتتىق سپورت تۋرالى زاڭ جوباسىن ازىرلەۋ باستاماسىن كوتەرىپ وتىر. ونىڭ اياسىندا قازاقستاندا ەتنوسپورتتى دامىتۋ ءۇشىن جۇيەلى قولداۋ شارالارى كوزدەلەدى»، - دەدى يسلامبەك سالجانوۆ.

قازىرگى تاڭدا مەملەكەت باسشىسىنىڭ تاپسىرماسى بويىنشا قاۋىمداستىق قازاقستاندا ۇلتتىق سپورتتى دامىتۋدىڭ 2024-2029-جىلدارعا ارنالعان تۇجىرىمداماسىنىڭ جوباسىن ازىرلەپ جاتىر.

وندا ۇلتتىق سپورت تۇرلەرىن دامىتۋ ماسەلەلەرى جانە ولاردى شەشۋ جولدارى كورسەتىلىپ، ءىس-قيمىل جوسپارى مەن نىسانالى ينديكاتورلارى ۇسىنىلادى.

دوڭگەلەك ۇستەل بارىسىندا قازاقستانداعى جىلقى زاۋىتتارىنىڭ قازىرگى ۋاقىتتا الەمدىك ات سپورتى يندۋسترياسىنىڭ تالاپتارىنا سايكەس كەلمەيتىن ينفراقۇرىلىمدىق دامۋ دەڭگەيى تالقىلاندى.

قاتىسۋشىلار سپورت جىلقىلارىنىڭ سانىن كوبەيتپەيىنشە، تەڭگە ءىلۋ، كوكپار، بايگە، اۋدارىسپاق، جامبى اتۋ سياقتى سپورت تۇرلەرىن دامىتۋ مۇمكىن ەمەس، سوندىقتان سپورت عىلىمى مەن سپورتتىق مەديتسيناعا باسا كوڭىل ءبولۋ ماڭىزدى دەگەن پىكىرگە كەلدى.

5- دكو قارساڭىندا ق ر ۇلتتىق سپورت قاۋىمداستىعىنىڭ باستاماسىمەن ۇلتتىق سپورت جوعارى مەكتەبى قۇرىلدى، العاش رەت الماتىداعى سپورت جانە تۋريزم اكادەمياسىنا - «ات سپورتى تۇرلەرىنىڭ جاتتىقتىرۋشىسى» ماماندىعى بويىنشا جانە الماتىداعى اگرارلىق ۋنيۆەرسيتەتتىڭ بازاسىندا «سپورتتىق جىلقى شارۋاشىلىعىنداعى ۆەتەريناريا» ماماندىعى بويىنشا تالاپكەرلەردى قابىلداۋ باستالادى.

سونىمەن قاتار، قاۋىمداستىقتىڭ كومەگىمەن سەنات دەپۋتاتتارى قوستانايلىق جىلقى تۇقىمىن ساقتاۋ جانە ءوسىمىن مولايتۋ جونىندەگى زاڭعا باستاماشى بولدى، ول بۇگىندە ماجىلىستە قارالۋ ساتىسىندا تۇر.

دوڭگەلەك ۇستەل قورىتىندىسىندا ءبىرقاتار ۇسىنىس قابىلداندى.

اتاپ ايتقاندا، قازاق ۇلتتىق اگرارلىق زەرتتەۋ ۋنيۆەرسيتەتى بازاسىندا سپورتتىق جىلقىلاردى باقىلاۋ دوپينگ زەرتحاناسىن اشۋ، مال شارۋاشىلىعى سالاسى رەتىندە سپورتتىق جىلقى شارۋاشىلىعىنىڭ جاي-كۇيىن تالداۋ جانە باسقا.