قازاقستاندا ل گ ب ت ناسيحاتقا قىلمىستىق جاۋاپكەرشىلىك ەنگىزۋ ۇسىنىلدى
استانا. KAZINFORM - ءماجىلىس دەپۋتاتى ەدىل جاڭبىرشين ل گ ب ت-نى اشىق جانە جاناما جولمەن ناسيحاتتاعان ادامداردى قىلمىستىق جازاعا تارتۋدى ۇسىندى.
- ل گ ب ت ناسيحاتقا زاڭمەن تىيىم سالۋ كەرەك. بۇل اركىمنىڭ جەكە ماسەلەسى، ونى اقپارات قۇرالدارى، الەۋمەتتىك جەلى ارقىلى ناسيحاتتاۋعا بولمايدى. ءبىر توپ دەپۋتات ل گ ب ت ناسيحاتىنا قارسى نورمانى ازىرلەپ بەرگەنبىز، ءبىراق، وتپەي قالدى، جان-جاقتان قارسىلىق بولدى. سول سەبەپتى پەتيتسيا پايدا بولدى. حالىق قولداپ، كوميسسيا قۇرىلىپ، عالىمدار، ساراپشىلار زەرتتەپ بۇنىڭ زيان ەكەنىن كورىپ وتىرمىز، - دەدى ەدىل جاڭبىرشين ب ا ق وكىلدەرىنىڭ ساۋالىنا جاۋاپ بەرە تۇرىپ.
ودان ءارى حالىق قالاۋلىسى ل گ ب ت ناسيحاتقا جاۋاپكەرشىلىك ەنگىزۋ ماسەلەسىن كوتەردى.
- ءبىز تەك قانا تىيىم سالىپ قويماۋىمىز كەرەك، ەگەر تىيىمدى بۇزىپ الەۋمەتتىك جەلىدە نەمەسە ب ا ق-تا جانە باسقا جاناما جولمەن جارنامالايتىن بولسا، وعان اكىمشىلىك جاۋاپكەرشىلىك قانا ەمەس، قىلمىستىق جاۋاپكەرشىلىك قاراستىرىلۋى كەرەك دەپ ويلايمىن، - دەيدى ەدىل جاڭبىرشين.
ايتا كەتەيىك، بۇگىن ەلوردادا ل گ ب ت ناسيحاتتىڭ بالالار مەن جاسوسپىرىمدەرگە اسەرىن زەرتتەۋ ناتيجەسى تالقىلاندى. اتالعان شاراعا ساراپشىلار، عالىمدار، مەملەكەتتىك ورگاندار وكىلدەرى، دەپۋتاتتار مەن قوعامدىق ۇيىمدار وكىلدەرى قاتىستى.
ايتا كەتسەك، پرەزيدەنت قاسىم-جومارت توقايەۆ ۇلتتىق قۇرىلتايدىڭ IV وتىرىسىندا ل گ ب ت-عا قاتىستى پايىم ايتتى.
ءماجىلىس دەپۋتاتى ەدىل جاڭبىرشين بۇعان دەيىن ل گ ب ت وكىلدەرىن جازالاۋ ماسەلەسىن كوتەرگەن ەدى.
ەسكە سالايىق، بىلتىر 1-تامىزدا «قازاقستان رەسپۋبليكاسىندا ل گ ب ت-نى اشىق جانە جاسىرىن تۇردە ناسيحاتتاۋعا قارسىمىز!» پەتيتسياسى بويىنشا شەشىم جوباسىنا جاريا تالقىلاۋ ءوتتى.