قازاقستاندا كۇزگى اسكەرگە شاقىرۋ ناۋقانى باستالدى

استانا. KAZINFORM – ق ر پرەزيدەنتى قاسىم-جومارت توقايەۆتىڭ 2024-جىلعى 1-اقپانداعى جارلىعىنا سايكەس كۇزگى شاقىرۋ قىركۇيەكتە باستالىپ، جەلتوقسان ايىنىڭ سوڭىنا دەيىن جالعاسادى، دەپ جازادى ق ر قورعانىس مينيسترلىگى.

مەرزىمدى اسكەري قىزمەتكە شاقىرۋدى كەيىنگە قالدىرۋعا نەمەسە بوساتۋعا نەگىزدەرى جوق 18 جاستان 27 جاسقا دەيىنگى ازاماتتار شاقىرىلادى.

كۇزگى شاقىرۋ بارىسىندا قارۋلى كۇشتەردىڭ (9933)، ۇلتتىق ۇلاننىڭ (6822)، ۇ ق ك شەكارا قىزمەتىنىڭ (3200)، ت ج م (317) جانە مەملەكەتتىك كۇزەت قىزمەتىنىڭ (290) بولىمشەلەرى جاساقتالادى.

قورعانىس مينيسترلىگى اسكەرگە شاقىرۋدى ەسەپكە الۋ جۇمىسىن سيفرلاندىرۋ جۇمىستارىن دايەكتى تۇردە جۇرگىزىپ كەلەدى. اسكەرگە بورىشىن وتەۋگە شاقىرىلعان اسكەري قىزمەتشىلەر تۋرالى مالىمەت الماسۋ، سونداي-اق ولاردى زاپاسقا شىعارۋ اۆتوماتتاندىرىلعان.

«بيىل ساربازدارعا ارنالعان ارتىقشىلىقتار زاڭ جۇزىندە بەكىتىلدى. ولارعا قىزمەت ەتۋ كەزىندە جانە اسكەردەن بوساتىلعاننان كەيىن ەكى اي ۋاقىتقا نەسيەلىك دەمالىس بەرىلەدى. بۇگىنگى تاڭدا 6 مىڭنان استام اسكەري قىزمەتشىنىڭ 1 ميلليارد 828 ميلليون تەڭگە سوماسىنداعى تولەمدەرى كەيىنگە قالدىرىلدى. سونىمەن قاتار كرەديتتىڭ بولۋىن نە بولماۋىن، ول بويىنشا تولەمدى كەيىنگە قالدىرۋدى بەلگىلەۋ قارجى نارىعىن رەتتەۋ جانە دامىتۋ اگەنتتىگى ايقىنداعان تارتىپپەن قورعانىس مينيسترلىگىنىڭ، كرەديتتىك بيۋرولار مەن كرەديتورلاردىڭ اقپاراتتىق جۇيەلەرىنىڭ ءوزارا ءىس-ارەكەتى ارقىلى جۇزەگە اسىرىلادى»، دەلىنگەن مينيسترلىك حابارلاماسىندا.

ايتا كەتەيىك، وتان الدىنداعى بورىشىن وتەگەن ازاماتتارعا ستۋدەنتتىك جاتاقحانادان ورىن بەرۋ جەڭىلدىكتەرى دە قاراستىرىلعان. بۇگىنگى تاڭدا اسكەردە قىزمەت ەتكەن مىڭ جارىمنان استام ازامات جوعارى وقۋ ورىندارىنا تەگىن، ال اقىلى تۇردە 700 دەن استامى وقۋعا ءتۇستى. وسى جىلدىڭ كوكتەمىندە زاپاسقا شىعارىلعان 400 دەن استام اسكەري قىزمەتشى كەلىسىمشارت بويىنشا اسكەري قىزمەتكە ورنالاستى.

«پرەزيدەنتتىڭ تاپسىرماسى بويىنشا قارۋلى كۇشتەر مەملەكەتتىك ۇلگىدەگى كۋالىكتەردى بەرە وتىرىپ، اسكەري قىزمەتشىلەردى ارالاس جۇمىسشى ماماندىقتارىنا وقىتتى. بۇل ماسەلە مەملەكەت باسشىسىنىڭ قازاقستان حالقىنا جولداۋىندا دا ايتىلىپ، 2025-جىل - جۇمىسشى ماماندىقتار جىلى دەپ جاريالاندى. جىل سايىن جۇمىسشى ماماندىقتارىنىڭ سانى دا ارتىپ كەلەدى. 2023-جىلى 1200 گە جۋىق مامان وقىتىلدى. بيىلعى جىلى 1300 دەن اسا ادامدى وقىتۋ جوسپارلانىپ وتىر»، دەيدى ۆەدومستۆو وكىلدەرى.

قالالىق جانە اۋداندىق شاقىرۋ كوميسسيالارى جەرگىلىكتى اتقارۋشى ورگاندار اكىمدەرىنىڭ ورىنباسارلارىنىڭ توراعالىعىمەن جۇمىس ىستەيتىنىن ايتا كەتۋ ماڭىزدى. شاقىرۋ ناۋقانى بارىنشا اشىق فورماتتا وتكىزىلەدى.

اسكەرگە شاقىرىلۋشىلار، ولاردىڭ اتا-انالارى، جۋرناليستەر، قوعام وكىلدەرى قاجەتتى اقپاراتقا جۇگىنىپ، بارلىق سۇراقتارعا جاۋاپ الا الادى. ءار قورعانىس ىستەرى جونىندەگى دەپارتامەنتىندە «جەدەل جەلى» مەن الەۋمەتتىك جەلىلەردەگى رەسمي اككاۋنتتار ىسكە قوسىلعان.