قازاقستاندا كىمدەردىڭ كرەديتى كەشىرىلەتىنى بەلگىلى بولدى

استانا. kazinform - قازاقستاندا الاياقتاردىڭ قۇربانى بولعان 2,5 مىڭ ادامنىڭ كرەديتتەرى كەشىرىلدى، دەپ حابارلايدى El.kz اقپارات اگەنتتىگى.

بۇل تۋرالى باس پروكۋرور بەرىك اسىلوۆتىڭ دەپۋتاتتارعا بەرگەن رەسمي جاۋابىندا ايتىلعان. ونىڭ مالىمەتىنە سايكەس، الاياقتىقتان زارداپ شەككەن ازاماتتاردىڭ قۇقىقتارىن قورعاۋ ماقساتىندا 2024-جىلدىڭ ماۋسىم ايىندا «بانكتەر جانە بانك قىزمەتى تۋرالى» زاڭعا قارجى ۇيىمدارىنا الاياقتىق ارەكەتتەردىڭ سەبەپتەرى مەن سالدارىن جويۋعا باعىتتالعان ءبىرقاتار تالاپتار ەنگىزىلدى. اتاپ ايتقاندا، تەرگەۋ كەزەڭىندە كۇماندى نەسيەلەر بويىنشا بەرەشەكتى ءوندىرىپ الۋ جانە تالاپ-ارىز جۇمىستارىن ۋاقىتشا توقتاتۋ، كليەنتتىڭ قاتىسۋىنسىز راسىمدەلگەن نەسيە بەرەشەگىن ەسەپتەن شىعارۋ، سونداي-اق مۇنداي قارىزدار بويىنشا بۇرىن تولەنگەن سومالاردى زارداپ شەككەن ازاماتتارعا قايتارۋ تەتىكتەرى قاراستىرىلعان. بۇل مەحانيزم قارجى ۇيىمدارىنا كيبەرالاياقتىقتان زارداپ شەككەن ازاماتتاردىڭ بانك شوتتارىن نەسيەنى وتەۋ مەرزىمى كەشىكتىرىلگەن جاعدايدا بۇعاتتاۋعا جول بەرمەۋدى كوزدەيدى.

زاڭناماداعى اتالعان تۇزەتۋلەر اياسىندا 2,5 مىڭنان استام ادامنىڭ جالپى سوماسى 3,4 ميلليارد تەڭگەدەن اساتىن كرەديتتەرى بويىنشا ءوندىرىپ الۋ شارالارى توقتاتىلىپ، 1,6 ميلليارد تەڭگەدەن استام قارىزدارى ەسەپتەن شىعارىلدى.