قازاقستاندا كىمدەر بورتسەرىك بولا الادى
استانا. KAZINFORM - بۇگىن - حالىقارالىق بورتسەرىكتەر كۇنى. ەلىمىزدە اتالعان قىزمەتكەرلەرگە قانداي تالاپتار قويىلادى؟ ولارعا نەندەي جەڭىلدىكتەر قاراستىرىلعان؟ Jibek Joly ارناسىنىڭ «بۇگىن LIVE» باعدارلاماسىنا قوناق بولعان بورتسەرىك گۇلميرا يسماتۋللايەۆا وسى جانە وزگە دە سۇراقتارعا جاۋاپ بەردى.
- بالا كەزىمنەن بورتسەرىك بولۋدى ارماندادىم. ول كەزدە 7 جاستا ەدىم. وسە كەلە ارماندارىم اۋىستى. ءبىراق وسىدان ەكى جىل بۇرىن وسى قىزىعۋشىلىعىم قايتا اشىلدى. كوپ ساياحاتتاعان سوڭ بورتسەرىكتەردى دە ءجيى كورە باستادىم با، ايتەۋىر، وسى نارسە ماعان ەرەكشە اسەر ەتتى. بۇل سالاعا جاقىندا عانا كەلدىم. بۇگىنگە دەيىن جۇمىس بارىسىمەن تەك ءۇش مەملەكەتكە ۇشىپ ۇلگەردىم. مەن شەتەل فيلولوگياسىن اعىلشىن ءتىلى بويىنشا ءبىتىردىم. بورتسەرىك بولۋ ءۇشىن ارنايى ماماندىقتى ءتامامداۋدىڭ قاجەتى شامالى. وعان ناقتى ءبىر ديپلومنىڭ دا كەرەگى جوق، - دەيدى ستۋديا قوناعى.
گۇلميرا يسماتۋللايەۆا بورتسەرىك بولۋ ءۇشىن قانداي تالاپتار قويىلاتىنىن ايتىپ بەردى.
- الدىمەن ارنايى ىرىكتەۋدەن وتەمىز. وندا وتە كوپ ۇمىتكەر بولادى. باستى تالاپ - 18 جاستان اسقان قازاقستان رەسپۋبليكاسىنىڭ ازاماتى بولۋ. ودان بولەك، قازاق، ورىس جانە اعىلشىن تىلدەرىندە ەركىن سويلەي الۋىڭ كەرەك. وزگە تالاپتار ءار كومپانيادا ءارتۇرلى. ءبىزدىڭ كومپانيامىزدا بورتسەرىكتىڭ بويى 165 سانتيمەتردەن جوعارى بولۋى قاجەت. سونىمەن قاتار مىندەتتى تۇردە دەنساۋلىعىڭىز جاقسى بولۋى ءتيىس. ء بىز مەديتسينالىق تەكسەرۋدەن وتەمىز. ول كەزدە دەنساۋلىعىمىز تولىقتاي تەكسەرىلەدى. بورتسەرىكتەردى دايىنداعاندا مەديتسينالىق كومەك كورسەتۋ شارالارىن دا مىندەتتى تۇردە ۇيرەتەدى. سوندىقتان ولار العاشقى كومەكتى قالاي كورسەتۋ كەرەكتىگىن بىلەدى. ءبىراق بۇگىنگە دەيىن مەنىڭ رەيسىمدە مۇنداي جاعداي بولعان ەمەس، - دەيدى ول.
مامان بورتسەرىك بولۋدىڭ ەڭ قيىن تۇسى تۇراقسىز جۇمىس كەستەسى ەكەنىن جەتكىزدى.
- جۇمىس كەستەمىز ءارتۇرلى. مىسالى، 7 كۇن بولسا، ونىڭ تەك 2 كۇنىندە جۇمىسقا شىعىپ، قالعان 5 كۇنىندە دەمالامىز. كەيدە كەرىسىنشە، 5 كۇن جۇمىس ىستەپ، 2 كۇن تىنىعامىز. ءبىزدىڭ ماماندىعىمىزدىڭ ەڭ قيىن تۇسى دا وسى جۇمىس كەستەسى دەپ ويلايمىن. كەيدە تۇندە، تاڭدا رەيستەر بولادى. كەي كەزدە جولاۋشىلار شارشاپ كەلەدى. سونىڭ اسەرىنەن ءبىزدى دە شارشاتادى. ونداي كەزدە جولاۋشىلارمەن داۋلاسپايمىز. بورتسەرىكتەر سابىرلى بولۋى كەرەك، - دەيدى گۇلميرا يسماتۋللايەۆا.
ستۋديا قوناعى جۇمىستان بولەك جەكە ومىرىنە دە جەتكىلىكتى ۋاقىت بولەتىنىن جاسىرمادى.
- بورتسەرىكتەردىڭ جەكە ومىرىنە دە ۋاقىت تابىلادى. كەستەمىز قيىن بولعانىمەن، قانشالىقتى كوپ جۇمىس ىستەسەك، سونشالىقتى كوپ دەمالامىز. كەڭسەدەگى قىزمەتكەرلەر كۇندە ءبىر ادامداردى كورەدى. ال ءبىزدىڭ جۇمىسىمىزدا اۋەدە نەشە ءتۇرلى ادامداردى كەزدەستىرەسىڭ. ءبىر رەيسىمىز ەكىنشى رەيسكە ۇقسامايدى. ءتىپتى ارىپتەستەرىمىز دە ءار رەيس سايىن وزگەرىپ تۇرادى، - دەيدى ول.
گۇلميرا يسماتۋللايەۆا بورتسەرىك بولۋدىڭ ەڭ باستى ارتىقشىلىقتارىنا دا توقتالدى.
- شەتەلدەرگە ۇشىپ بارعان كەزدە سول ەلدە ساياحاتتايسىزدار ما دەپ كوپ ادام سۇرايدى. بۇل - ۇشۋ ۋاقىتىنىڭ ۇزاقتىعىنا بايلانىستى. مىسالى، تايلاندقا 9-10 ساعات ۇشىپ بارسا، بورتسەرىكتەر وندا مىندەتتى تۇردە قالىپ، دەمالىپ، كەلەسى رەيستە قايتادان ۇشادى. وعان قوسا، اۋە كومپانياسىنىڭ جۇمىسشىلارى � جەڭىلدىكپەن ۇشا الادى. ول ءۇشىن بيلەت ءوزىمىز جۇمىس ىستەيتىن اۋە كومپانيادان الىنۋى كەرەك. ودان بولەك، وتباسىمىزداعى ادامدار دا وسى مۇمكىندىكتى پايدالانا الادى، - دەيدى مامان.
ايتا كەتەيىك، بۇعان دەيىن قازاقستان مەن وزبەكستان اراسىندا تىكەلەي اۋە رەيسى ىسكە قوسىلعانىن حابارلاعان ەدىك.