قازاقستاندا كىمدەر پاسپورتتى تەگىن جاساتا الادى؟

استانا. KAZINFORM -جازدا كوپشىلىك ەڭبەك دەمالىسىنا شىعادى. ەگەر دەمالىسىڭىزدى شەتەلدە وتكىزۋدى جوسپارلاساڭىز، ءسىز مىندەتتى تۇردە پاسپورت جاساتۋىڭىز كەرەك.

قازاقستان رەسپۋبليكاسى ازاماتىنىڭ پاسپورتىن قالاعان ۋاقىتتا راسىمدەۋگە بولادى.

Massaget.kz ءتىلشىسى egov پورتالىنداعى مالىمەتتەرگە سۇيەنە وتىرىپ، پاسپورتتى راسىمدەۋ بويىنشا نۇسقاۋلىق ۇسىنادى.

2024-جىلى پاسپورت جاساتۋ قانشا تۇرادى؟

2024-جىلى قازاقستان رەسپۋبليكاسى ازاماتىنىڭ 36 بەتتىك پاسپورتىن الۋعا مەملەكەتتى باج - 8 م ر پ نەمەسە 29536 تەڭگە، ال 48 بەتتتىك - 12 م ر پ نەمەسە 44304 تەڭگەنى قۇرايدى.

قۇجاتتاردى جەدەلدەتىلگەن تارتىپپەن الۋ ءۇشىن (ق ق س- سىز باعاسى):

استانا، الماتى، شىمكەنت قالالارى جانە وبلىس ورتالىقتارى ءۇشىن:

1-ساناتتى جەدەلدىك - 3372 تەڭگە؛

2-ساناتتى جەدەلدىك - 1771 تەڭگە.

وبلىستاردىڭ اۋداندارى مەن قالالارى ءۇشىن:

3-سانات - 678 تەڭگە.

پاسپورت نەشە كۇندە دايىن بولادى؟

قۇجات جالپى تارتىپتە - 15 جۇمىس كۇنىنەن كەشىكتىرمەي (ءوتىنىمدى رەسىمدەۋ جانە دايىندالعان قۇجاتتى قابىلداۋ كۇنى مەملەكەتتىك قىزمەت كورسەتۋ مەرزىمىنە كىرمەيدى) دايىن بولادى.

مەملەكەتتىك كورپوراتسيا ارقىلى قۇجاتتاردى جەدەلدەتىلگەن تارتىپپەن الۋ ءۇشىن (ءوتىنىمدى رەسىمدەۋ جانە جەدەلدەتىلگەن قىزمەت ءۇشىن تۇبىرتەكتى تولەۋ كۇنى مەملەكەتتىك قىزمەت كورسەتۋ مەرزىمىنە كىرمەيدى):

استانا، الماتى، شىمكەنت جانە اقتوبە قالالارى ءۇشىن - جەدەلدىكتىڭ 1-ساناتى بويىنشا 1 جۇمىس كۇنىنە دەيىن؛ جەدەلدىكتىڭ 2-ساناتى بويىنشا 3 جۇمىس كۇنىنە دەيىن؛

وبلىس ورتالىقتارى ءۇشىن - جەدەلدىكتىڭ 1-ساناتى بويىنشا 3 جۇمىس كۇنىنە دەيىن؛ جەدەلدىكتىڭ 2-ساناتى بويىنشا 5 جۇمىس كۇنىنە دەيىن؛

وبلىستاردىڭ قالالارى جانە اۋداندارى ءۇشىن - جەدەلدىكتىڭ 3-ساناتى بويىنشا 7 جۇمىس كۇنىنە دەيىن.

ح ق ت ت پ ا ج ارقىلى مەملەكەتتىك قىزمەتتى كورسەتۋ كەزىندە كورسەتىلەتىن قىزمەتتى الۋشىنى فوتوسۋرەتكە ءتۇسىرۋ ح ق ت ت پ ا ج- دا حالىقارالىق ستاندارتتاردىڭ تالاپتارىنا سايكەس جانە اقىسىز جۇرگىزىلەدى.

فوتوسۋرەت ءبىر نەگاتيۆتەن قالىڭ فوتوقاعازعا فوتو باسىپ شىعارۋ ادىسىمەن ورىندالادى، قاتاڭ تۇردە جارىق جەردە الدىنان تۇسىرىلگەن، بەيتاراپ بەت-بەينەسى كورىنىسىمەن جانە اۋزى جابىق تۇسكەن، بەتى فوتوسۋرەتتىڭ جالپى اۋدانىنىڭ u جۋىعىن الاتىنداي بولىپ جاسالادى. كومپيۋتەرلىك سكانەرلەۋ، مودەلدەۋ نەمەسە كسەروكوشىرمە ادىسىمەن دايىندالعان سۋرەتتەردى پايدالانۋعا جول بەرىلمەيدى. سۋرەتكە ءتۇسىرۋ كەزىندە ءدىني نە مەديتسينالىق سەبەپتەر بويىنشا باستى جابۋدى قوسپاعاندا، ەشقانداي باس كيىم كيىپ تۇسۋگە جول بەرىلمەيدى، بۇل جاعدايدا بەتى يەكتىڭ تومەنگى جاعىنان ماڭدايىنا دەيىن اشىق كۇيدە قالادى، باس كيىم كولەڭكەسىنىڭ بەتكە تۇسۋىنە جول بەرىلمەيدى. كوزى اشىق جانە انىق كورىنۋى ءتيىس، شاشپەن جابىلماۋى قاجەت. كوزىلدىرىكتىڭ جيەگى كوزدى جاپپايدى، شاعىلىستىرعىش جانە كۇننەن قورعايتىن كوزىلدىرىكتەرگە جول بەرىلمەيدى. سونىمەن قاتار، قۇجاتتالاتىن ادامنىڭ ۋنيفورمادا سۋرەتكە تۇسۋىنە جول بەرىلمەيدى.

قاجەتتى قۇجاتتار:

ىشكى ىستەر ورگاندارى بەرەتىن بەلگىلەنگەن نىسانداعى قازاقستان رەسپۋبليكاسىنىڭ ازاماتتىعىنا قابىلداۋ تۋرالى 7-نىسانداعى انىقتاما (قازاقستان رەسپۋبليكاسىنىڭ ازاماتتىعىنا قابىلداۋعا بايلانىستى قۇجاتتاردى العان كەزدە).

قۇجات ءۇشىن مەملەكەتتىك باجدىڭ تولەنگەنى تۋرالى تۇبىرتەك (مەملەكەتتىك باج تولەۋدەن بوساتىلعان ادامدار سالىق كودەكسىنىڭ 622-بابىنا سايكەس راستايتىن قۇجاتتارىن ۇسىنادى).

فورمۋلياردى تولتىرۋ كەزىندە كورسەتىلەتىن قىزمەتتى الۋشىنىڭ جاسىنا سايكەس كەلەتىن ولشەمى 3,5x4,5 سانتيمەتر ەكى فوتوسۋرەت.

جەكە باستى كۋالاندىراتىن قۇجاتتار جانە تۇرعىلىقتى جەرى بويىنشا تىركەۋدىڭ بار-جوعى تۋرالى مالىمەتتەردى كورسەتىلەتىن قىزمەتتى بەرۋشى ح ق ت ت پ اقپاراتتىق جۇيەسىنەن الادى.

كىمدەر پاسپورتتى تەگىن الادى؟

كەڭەس وداعىنىڭ باتىرلارى، سوتسياليستىك ەڭبەك ەرلەرى.

داڭق وردەنىنىڭ ءۇش دارەجەسىمەن جانە ەڭبەك داڭقى وردەنىنىڭ ءۇش دارەجەسىمەن، «التىن قىران»، «وتان» وردەندەرىمەن ناگرادتالعان، «حالىق قاھارمانى»، «قازاقستاننىڭ ەڭبەك ەرى» اتاقتارىن العان ادامدار.

«باتىر انا» اتاعىن العان، «التىن القا»، «كۇمىس القا» القالارىمەن ناگرادتالعان كوپ بالالى انالار.

ۇلى وتان سوعىسىنا قاتىسۋشىلار جانە ولارعا تەڭەستىرىلگەن ادامدار، ۇلى وتان سوعىسى جىلدارى تىلداعى جانقيارلىق ەڭبەگى مەن مىنسىز اسكەري قىزمەتى ءۇشىن بۇرىنعى ك س ر وداعىنىڭ وردەندەرىمەن جانە مەدالدارىمەن ناگرادتالعان ادامدار، 1941-جىلدىڭ 22-ماۋسىمى مەن 1945-جىلدىڭ 9-مامىرى كەزەڭىندە كەمىندە التى اي جۇمىس ىستەگەن (قىزمەت ەتكەن) جانە ۇلى وتان سوعىسى جىلدارى تىلداعى قاجىرلى ەڭبەگى مەن قالتقىسىز اسكەري قىزمەتى ءۇشىن بۇرىنعى ك س ر و- نىڭ وردەندەرىمەن جانە مەدالدارىمەن ناگرادتالماعان ادامدار، مۇگەدەكتەر، سونداي-اق بالا جاستان مۇگەدەكتەردىڭ اتا-انالارىنىڭ بىرى.

قارتتار مەن مۇگەدەكتەرگە ارنالعان جالپى ۇلگىدەگى مەديتسينالىق-الەۋمەتتىك مەكەمەلەردە تۇراتىن قارتتار، بالالار ۇيىندە جانە (نەمەسە) ينتەرناتتاردا تۇراتىن تولىق مەملەكەت قامقورلىعىنداعى جەتىم بالالار مەن اتا-اناسىنىڭ قامقورلىعىنسىز قالعان بالالار.

چەرنوبىل اپاتىنىڭ سالدارىنان زارداپ شەككەن ازاماتتار.