قازاقستاندا كاربون ەگىنشىلىگىن دامىتۋ جول كارتاسى قاشان بەكىتىلەدى

استانا. KAZINFORM - ەلىمىزدە جىل سوڭىنا دەيىن كاربون ەگىنشىلىگىن دامىتۋ جول كارتاسى بەكىتىلمەك. بۇل تۋرالى Kazinform اگەنتتىگى جولداعان ساۋالعا قر اۋىل شارۋاشىلىعى مينيسترلىگىنىڭ رەسمي جاۋابىندا ايتىلعان.

- ق ر پرەزيدەنتى اكىمشىلىگىنىڭ تاپسىرماسىنا سايكەس مۇددەلى مەملەكەتتىك ورگاندار، ونىڭ ىشىندە اۋىل شارۋاشىلىعى مينيسترلىگى، قازاقستاندا كاربون ەگىنشىلىگىن ەنگىزۋ تاسىلدەرىن زەرتتەۋدى باستاعان. جاڭا باستامالاردى قابىلداۋ ءۇشىن الدىمەن وسى ماسەلەنى زاڭنامالىق تۇرعىدا رەتتەۋ قاجەت. وسىعان بايلانىستى ەكولوگيا جانە تابيعي مينيسترلىگىمەن بىرگە ءتيىستى جۇمىستار جۇرگىزىلىپ جاتىر، - دەلىنگەن حابارلامادا.

سونداي-اق ۆەدومستۆو ءتيىستى قۇجاتتى ازىرلەۋ قاشان اياقتالاتىنىن ءمالىم ەتتى.

- پارلامەنت ءماجىلىسىنىڭ جۇمىسىندا تۇرعان «توپىراقتى قورعاۋ تۋرالى» زاڭ جوباسى اياسىندا قازاقستاندا كومىرتەگى ەگىنشىلىگىن دامىتۋ ماسەلەسى، سونداي-اق ءتيىستى قۇزىرەتىن پىسىقتاۋ قارالادى. ال كاربون ەگىنشىلىگىن دامىتۋ بويىنشا ءتيىستى جول كارتاسىن بەكىتۋ وسى جىلعا جوسپارلانىپ وتىر، - دەپ جازىلعان جاۋاپتا.

جىل باسىندا ۇكىمەت باسشىسى ولجاس بەكتەنوۆ ەلىمىزدە كاربوندى پوليگوندار قۇرىلاتىنىن ايتتى.

ايتا كەتەيىك، بۇعان دەيىن كاربون ەگىنشىلىگى ارقىلى قازاقستاندا جىلىنا $35 ميلليارد پايدا تابۋ مۇمكىندىگى بارى جايلى جازعان ەدىك.