قازاقستاندا كادى مەن بايالدى قانشا تۇرادى

استانا. KAZINFORM - قازاقستانداعى ساۋدا ورىندارىندا بيىلعى ونىمدەر، ياعني كادى مەن بايالدى (باكلاجان) پايدا بولا باستادى. وسى ورايدا كوكونىس قاي وڭىردە ارزان بولاتىنى جايىندا مالىمەتتى كوپشىلىك نازارىنا ۇسىنۋدى ءجون كوردىك.

كادىنىڭ كەلىسى 97 تەڭگەدەن باستالادى

ساياجاي تۇرعىندارى كوپ وسىرەتىن وسى كوكونىس قازىر قولايلى باعادا ساتىلىپ جاتىر. وسى ورايدا كادى قاراعاندىدا تيىمدىرەك ساۋدالانىپ وتىر. وسى وڭىردە كەلىسىن 97 تەڭگەدەن تابۋعا بولادى. ودان كەيىن الماتىدا - كەلىسى 100 تەڭگە، ال قونايەۆ پەن تالدىقورعاندا 100 دەن 120 تەڭگەگە دەيىن.

جەزقازعان تۇرعىندارى كادىنىڭ كەلىسىن 120 تەڭگەدەن ساتىپ السا، سەمەي مەن وسكەمەندە 120-200 تەڭگە ارالىعىندا.

ورالدا كادىنىڭ كەلىسى 150 تەڭگە، تۇركىستاندا - 200 تەڭگە، پاۆلوداردا - 300 تەڭگە، استانادا 295 تەڭگە شاماسىندا. سونداي-اق تارازدا وسى كوكونىستىڭ ورتاشا باعاسى 300 تەڭگە.

350 دەن 400 تەڭگەگە دەيىنگى باعالار پەتروپاۆل، قىزىلوردا، كوكشەتاۋ، قوستاناي جانە اقتوبە قالالارىندا تىركەلگەن. اقتاۋدا ءبىر كەلىسىنىڭ باعاسى 500 تەڭگە، ال اتىراۋ مەن شىمكەنتتە 550 تەڭگەگە دەيىن بارادى. بۇل تۇرعىدا وسى قالالاردا كادى ەڭ جوعارى باعادا ەكەنىن بايقاۋعا بولادى.

بايالدىنىڭ كەلىسى 890 تەڭگەگە دەيىن جەتكەن

بايالدىنىڭ ەڭ قولايلى باعاسى تارازدا بايقالدى، ونىڭ كەلىسى 200-240 تەڭگە تۇرادى. الماتىدا ونى 200-350 تەڭگەگە، تۇركىستاندا 300-350 تەڭگەگە، ال شىمكەنتتە 300-450 تەڭگە ارالىعىندا ساتىپ الۋعا بولادى.

ودان كەيىنگى ورىندا قونايەۆ (350-400 تەڭگە) جانە قىزىلوردا (350 تەڭگە) تۇر.

پاۆلودار مەن تالدىقورعاندا جاڭا پىسكەن بايالدىنىڭ كەلىسى 400 تەڭگە شاماسىندا بولادى. كوكونىستىڭ باعاسى قاراعاندىدا ءسال جوعارى - 455 تەڭگە. جەزقازعان مەن اقتوبەدە قۇنى 550 تەڭگە، قوستانايدا - 590 تەڭگە.

سەمەي مەن وسكەمەندە ونىڭ قۇنى 600 تەڭگە بولسا، استانادا 619 تەڭگە تۇرادى.

كوكشەتاۋلىقتار كوكونىستى 650 تەڭگەدەن، اتىراۋ مەن اقتاۋدا كەلىسىن 700 تەڭگەدەن ساتىپ الادى. پەتروپاۆلدا - 700 تەڭگەدەن 750 تەڭگەگە دەيىن.

ەڭ جوعارى باعا ورالدا بولدى - بايالدىنىڭ كەلىسى 890 تەڭگە.