قازاقستاندا جوعارى ءبىلىم الۋشىلارعا پايىزسىز نەسيە قاشان بەرىلە باستايتىنى بەلگىلى بولدى

استانا. قازاقپارات - عىلىم جانە جوعارى ءبىلىم ءمينيسترى ساياسات نۇربەك قازاقستاندا جوعارى ءبىلىم الۋ ءۇشىن پايىزسىز نەسيە بەرىلەتىنىن مالىمدەدى. ول جىل سوڭىندا ىسكە قوسىلادى. بۇل تۋرالى Stan.kz اقپارات اگەنتتىگى حابارلايدى.

ءمينيستردىڭ ايتۋىنشا، بۇل تاجىريبە ا ق ش-تا قولدانىلادى. ەندى قازاقستاندىق تالاپكەرلەرگە دە قولجەتىمدى بولادى. مينيسترلىك بىرنەشە ەكىنشى دەڭگەيلى بانكتەرمەن جانە قارجى ورتالىعىمەن بۇل ماسەلە شەشىلىپ جاتقانىن حابارلادى. زاڭ جوباسىن دايىنداۋ سوڭعى كەزەڭدە تۇر.

بۇل قۇرالدى عىلىم جانە جوعارى ءبىلىم مينيسترلىگى ەلىمىزدەگى جوعارى ءبىلىمنىڭ قولجەتىمدىلىگىن ارتتىرۋ ءۇشىن ەنگىزگەلى وتىر. ساياسات نۇربەك قازاقستاندىقتار پايىزسىز نەسيەدەن بولەك، جيناق اقشاسىن پايدالانا وتىرىپ، «بالالارعا ارنالعان ۇلتتىق قور» باعدارلاماسىن پايدالانا الاتىنىن ايتتى. سونداي-اق وسى جىلدان باستاپ مينيسترلىك «كەلەشەك» جۇيەسىن ىسكە قوسادى. اتالعان باعدارلاما اياسىندا تالاپكەرلەردىڭ اتا-انالارى مەملەكەتتىك جانە بانكتىك سىيلىقاقىلار ەسەبىنەن باستاپقى كاپيتال ەسەبىنەن ءبىلىم الۋعا قاراجاتتى ءوز بەتىنشە تارتا الادى.

«ال ءتورتىنشى قۇرال - سارالانعان گرانتتار. بيىل گرانتتاردى ءبولۋ اياسىندا پيلوتتىق جوبا ىسكە قوسىلدى. ەگەر بالا جاقسى بالل السا، ءبىراق تاڭداعان ماماندىعىنا باسەكەلەستىك جوعارى بولسا - بىزدە 100 بال دا، 115 بال دا گرانتقا تۇسپەيدى. ويتكەنى باسەكەلەستىك وتە جوعارى جانە بالا گرانتقا تۇسە الماي قالۋى دا مۇمكىن. مۇنداي جاعدايدا گرانتتاردىڭ 75, 50 پايىزىن قوسىمشا بەرۋگە دايىنبىز»، - دەدى مينيستر.

ايتا كەتەيىك، بۇعان دەيىن عىلىم جانە جوعارى ءبىلىم ءمينيسترى ساياسات نۇربەك ەندى باكالاۆر ستۋدەنتتەرىنىڭ «بولاشاق» باعدارلاماسى بويىنشا شەتەلدە وقي الاتىنىن مالىمدەگەن ەدى.