قازاقستاندا «جۇمىس ىستەيتىن كەدەيلەر» فەنومەنى بەلەڭ الدى - دەپۋتات

استانا. KAZINFORM - قازاقستاندا تولىق جۇمىس كۇنى ەڭبەك ەتسە دە، جالاقىسى كەدەيلىك شەگىنەن اسا المايتىندار بار. بۇل تۋرالى ءماجىلىس دەپۋتاتى اسحات ايماعامبەتوۆ ايتتى.

«الەۋمەت تانۋشىلاردىڭ ايتۋىنشا، قازاقستاندا «جۇمىس ىستەيتىن كەدەيلەر» فەنومەنى بەلەڭ الىپ جاتىر. ول دەگەنىمىز - تولىق جۇمىس كۇنى ەڭبەك ەتسە دە، جالاقىسى كەدەيلىك شەگىنەن اسا المايتىن ادامدار. اسىرەسە، بۇل مەملەكەتتىك سەكتورعا قاتىستى - كىتاپحاناشىلار، بۋحالتەرلەر، تەحنيكالىق قىزمەتكەرلەر جانە تاعى باسقالارى تولىق جۇمىس كۇنى ىستەپ، الاتىن جالاقىسى بويىنشا كەدەيلىك شەگىندە تۇر. بۇل دا وتە قاۋىپتى جاعداي بولىپ تۇر»، - دەدى ا. ايماعامبەتوۆ ماجىلىستە «قازاقستاننىڭ ەڭبەك نارىعىن دامىتۋ جانە كادرلىق الەۋەتىن نىعايتۋ» اتتى ۇكىمەت ساعاتىندا.

دەپۋتاتتىڭ ايتۋىنشا، بۇعان دەيىن ەڭبەك نارىعىنا جىل سايىن 200 مىڭ ادام كەلەتىن. ال قازىرگى ۋاقىتتا بۇل كورسەتكىش 250 مىڭعا جەتىپ قالدى.

«بەس جىلدان كەيىن بۇل سيفرلار 350 مىڭعا دەيىن بارادى دەگەن بولجام بار. وسىلايشا 2030 -جىلعا قاراي ەڭبەك نارىعىنا ۇلكەن قىسىم جاسالادى. ول نەگە بايلانىستى؟ ارينە، بىرىنشىدەن، بۇل دەموگرافيا، ياعني baby boomer-لەردىڭ اسەرى. ەكىنشىدەن، ءومىر ءسۇرۋ ۇزاقتىعىنىڭ ارتۋى. وعان قوسا، 2031 -جىلعا قاراي ايەلدەردىڭ زەينەتكە شىعۋ جاسى 63 جاسقا ۇزارۋىنا بايلانىستى ەڭبەك نارىعىندا 50 مىڭعا جۋىق ادامنىڭ قالۋى جانە اۆتوماتيزاتسيانىڭ قارقىندى دامۋى دا بار. بۇل فاكتوردىڭ بارلىعى ەڭبەك نارىعىنا ايتارىقتاي اسەر ەتىپ، جاڭا جۇمىس ورىندارىن قاجەت ەتەدى. ال قازاقستانداعى ەڭبەك نارىعىنىڭ سىيىمدىلىعى وتە شەكتەۋلى»، - دەدى ا. ايماعامبەتوۆ.

بۇعان دەيىن ءماجىلىس دەپۋتاتى ەلدەگى جۇمىسپەن قامتۋ شارالارىنىڭ ءتيىمدى بولماعانىن سىناعان ەدى.

اۆتور
ايدار وسپاناليەۆ