قازاقستاندا جەمقوردىڭ تۋىستارىنىڭ دا مۇلكىن تاركىلەۋ ۇسىنىلدى

استانا. KAZINFORM - ەلىمىزدە سىبايلاس جەمقورلىق قىلمىسىن جاساعان كۇدىكتىنىڭ تۋىستارىنىڭ دا مۇلكى تاركىلەنۋى مۇمكىن. بۇل جازادان امان قالۋ ءۇشىن ايىپتىنىڭ جاقىندارى ءوز مۇلكىنىڭ زاڭدى جولمەن الىنعانىن دالەلدەي الۋى كەرەك. ءتيىستى ۇسىنىستى ءماجىلىس دەپۋتاتى مارات ءباشىموۆ باس پروكۋرور بەرىك اسىلوۆقا جولدادى.

- جاقىندا اقشانى جىلىستاتۋعا قارسى ماڭىزدى زاڭ جوباسى ءماجىلىستىڭ ءبىرىنشى وقىلىمىنا شىعارىلادى. وعان ف ا ت ف (اقشانى جىلىستاتۋعا قارسى كۇرەس ءۇشىن قارجىلىق امالداردى ازىرلەۋشى توپ - رەد.) حالىقارالىق ۇيىمى ۇسىنعان 100 قۇقىقتىق نورما ەنگىزىلدى. ءبىزدىڭ ەلىمىز ءۇشىن «كەڭەيتىلگەن تاركىلەۋ» ينستيتۋتى اسا ماڭىزدى. الەمدە ءدال بىزدەگىدەي ۇرلىق كولەمى بولماعان. سوندىقتان مەن باس پروكۋرور بەرىك اسىلوۆقا وسى ماسەلە بويىنشا قولداۋ كورسەتۋ تۋرالى حات جولدادىم، - دەپ جازدى ماجىلىسمەن Facebook-تەگى پاراقشاسىندا.

دەپۋتاتتىڭ ايتۋىنشا، الەم ەلدەرىنىڭ تۇگەلگە جۋىعى ف ا ت ف - حالىقارالىق كولەڭكەلى ەكونوميكا جانە اقشانى جىلىستاتۋمەن كۇرەس ۇيىمىنىڭ ۇسىنىمدارىن زاڭناماعا ەنگىزگەن. ال قازاقستاندا وليگارحتاردىڭ لوببيستەرى بۇل جاڭاشىلدىقتى تەجەپ، ءتۇرلى سىلتاۋمەن كەدەرگى كەلتىرىپ كەلەدى.

- قازىرگى تاڭدا بۇل نورما بولماعاندىقتان جانە بايلىعى ءۇشىنشى تۇلعالارعا راسىمدەلگەندىكتەن كوپتەگەن كۇدىكتى جاۋاپكەرشىلىكتەن قۇتىلىپ كەتىپ جاتىر. وسىلايشا ولاردىڭ مۇلكى تولىق تاركىلەنبەيدى، ال سوتتالعاندار بولاشاقتا ءۇشىنشى تۇلعالارعا، ياعني تۋىستارىنا، كوڭىلدەستەرىنە جازىلعان مۇلىك پەن قارجىنى پايدالانىپ، جايباراقات ءومىر سۇرەدى، - دەپ جازادى ءباشىموۆ.

ونىڭ سوزىنشە، «كەڭەيتىلگەن تاركىلەۋ» جازاسى تەك مۇلكىن زاڭدى تۇردە تاپقانىن دالەلدەي المايتىن ادامعا قولدانىلادى.

- ۇسىنىلاتىن مەحانيزم مىناداي: الدىن الا تەرگەۋگە الىنعان ادامنان باسقا مۇلكىن زاڭدى جولمەن العانىن دالەلدەۋدى تالاپ ەتىلەدى. ەگەر دالەلدەي الماسا، ول مۇلىك تاركىلەنەدى، - دەلىنگەن جازبادا.

ودان بولەك، دەپۋتات بۇل نورمانىڭ قولدانىلۋ اياسىن تەك بەلگىلى ءبىر مەملەكەتتىك جانە ساياسي قىزمەتشىلەرمەن، سونداي-اق مەملەكەتتىك ۇيىمداردا اكىمشىلىك-باسقارۋشىلىق جانە شارۋاشىلىق-فۋنكتسيونالدىق مىندەتتەر اتقاراتىن ادامدارمەن شەكتەۋ قاجەت ەكەنىن اتاپ وتكەن.

ايتا كەتەيىك، جۋىردا پرەزيدەنت سوگىسىنەن كەيىن كولىك مينيسترلىگى سىبايلاس جەمقورلىق تاۋەكەلدەرىنە تالداۋ جۇرگىزەتىنىن جازعان ەدىك.