قازاقستاندا «جاسىل» سالىق ەنگىزۋ ۇسىنىلدى
استانا. KAZINFORM - ءماجىلىس دەپۋتاتى اجار ساعىندىقوۆا قازاقستاندا قالدىقتاردى باسقارۋ بويىنشا جەكە زاڭ جوباسىن ازىرلەۋدى ۇسىنىپ وتىر.
- وكىنىشكە قاراي، قولدانىستاعى ەكولوگيالىق كودەكستى تەرەڭىرەك قاراستىرۋ قاجەت جانە ءبىرقاتار ءالسىز تۇستارى بارىن كورىپ وتىرمىز. ءالى كۇنگە دەيىن قالدىقتاردى بولەك جيناۋ مەن قاتتى تۇرمىستىق قالدىقتاردى جۇيەلەۋ ماسەلەسى بويىنشا عىلىمي زەرتتەۋ جۇرگىزىلگەن جوق. بۇل تۋرالى وتكەن اپتادا ماجىلىستە وتكەن دوڭگەلەك ۇستەلدە ايتتىق. سول جەردە جۇمىس توبى اياسىندا تۇرمىستىق قاتتى قالدىقتاردى وڭدەۋ ماسەلەسىن جۇيەلى ءارى قايتا قاراۋ تۋرالى شەشىم قابىلداندى. سونداي-اق تۇرمىستىق قاتتى قالدىقتاردى باسقارۋ بويىنشا ۋاكىلەتتى ورگان مەن جەرگىلىكتى اتقارۋشى ورگاننىڭ جاۋاپكەرشىلىگى ايقىندالادى، - دەدى اجار ساعىندىقوۆا استانادا وتكەن IX ەۋرازيالىق بيزنەس فورۋمىندا.
حالىق قالاۋلىسىنىڭ ايتۋىنشا، دەپۋتاتتار ازىرلەگەن ءبىرقاتار جاڭا تۇزەتۋ جۇمىس توبىندا تالقىلانادى.
- اتاپ ايتقاندا، ءبىز قالدىقتاردى باسقارۋ بويىنشا جەكە زاڭ جوباسىن ازىرلەيتىن ۋاقىت كەلدى دەپ سانايمىز. بۇل زاڭ جوباسى وكىلەتتىك، جاۋاپكەرشىلىك، ستاندارتتار مەن ينفراقۇرىلىمعا قويىلاتىن تالاپتاردى جانە مەملەكەتتىك ىنتالاندىرۋ تەتىكتەرىن جۇيەگە كەلتىرۋگە مۇمكىندىك بەرەدى. سونداي-اق ەكولوگيالىق ەمەس ورامالارعا «جاسىل» سالىق ەنگىزۋ جانە تۇسكەن قاراجاتتى قايتا وڭدەۋ سالاسىن دامىتۋعا باعىتتاعان ءجون، - دەيدى اجار ساعىندىقوۆا.
بۇگىن استانادا «جاڭارتىلاتىن ەنەرگيا جانە قالدىقتاردى قايتا وڭدەۋ» اتتى تاقىرىپتا Ⅸ ەۋرازيالىق بيزنەس-فورۋم ءوتتى.
بۇگىن ۇكىمەت باسشىسى ولجاس بەكتەنوۆ داي داوگومەن «جاسىل» ەنەرگەتيكا سالاسىنداعى ىنتىماقتاستىق پەرسپەكتيۆالارىن تالقىلادى.
جاقىندا عانا ەكولوگيا كودەكسى قالدىق وڭدەۋ ەرەجەلەرى تۇرعىسىنان قايتا جازىلۋى مۇمكىن ەكەنىن حابارلاعان ەدىك.