Qazaqstanda jańa kólikterge suranys deńgeıi qandaı

ASTANA. QazAqparat - 2018 jyldyń 8 aıynda Qazaqstanda 800 myńnan astam avtokólik tirkeýge qoıyldy. Bul týraly «QazAvtoО́nerkásip» avtokólik salasyndaǵy kásiporyndar odaǵy málim etti, dep habarlaıdy QazAqparat.

«Esepti kezeńde ákimshilik polısıa organdary tirkeýge 851 465 avtokólikti qoıdy. Atalǵan kórsetkish ótken jyldyń sáıkes kezeńinen 13,9 paıyzǵa artyq. Onyń ishinde 799 500-i ekinshi ret tirkelgender úlesinde, ıaǵnı bir adamnan ekinshi adamnyń atyna aýystyrylǵan kólikter sanatyna jatqyzyldy. О́sim 2017 jylmen salystyrǵanda 13,2 paıyzǵa jetti. Al alǵash ret tirkelgen kólik quraldarynyń sany 51 965-ti qurady. Ol byltyrǵa qaraǵanda, 26 paıyzǵa joǵary», - degenp atap kórsetilgen taratylǵan málimette.

Bıylǵy qańtar-tamyzda Qazaqstan aýmaǵynda 43 elektromobıl tirkelgen eken.

«QazAvtoО́nerkásiptiń» habarlaýynsha, esepti kezeńde qaıta tirkelgen kólikterdiń úshten ekisin (69,1 paıyzy) paıdalaný merzimi 10 jyldan asqan kólikter qamtyǵan.

Onyń ishinde 20 jyldan asqandardyń úlesi 316 myń (39,6 paıyz) bolsa, 11-den 20 jylǵa deıingiler 29,5 paıyzdy qurady. Al 4-ten 7 jylǵa deıin - 162 908 (20,4 paıyz), 8-den 10 jylǵa deıin - 44 216 (5,5 paıyz), 1-den 3 jylǵa deıingi kólikter sany 36 205-ke jetti. Sonymen qatar, paıdalaný merzimi 1 jylǵa jetpegen kólikterdiń úlesi 0,5 paıyz boldy.

Kelisimshart rásimderine qaraǵanda, otandyq avtoparktiń eskirýiniń turaqty úrdisi baıqalýda.