قازاقستاندا جاڭا زەرتتەۋ ۋنيۆەرسيتەتى اشىلادى

جاڭا ۋنيۆەرسيتەتكە ستۋدەنتتەردى قابىلداۋ 2025 -جىلدىڭ قىركۇيەك ايىنا جوسپارلانىپ وتىر. 2024 -جىلدىڭ 14-تامىزىندا قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى مەن Cardiff University اراسىندا استانا قالاسىندا حالىقارالىق دەڭگەيدەگى زەرتتەۋ ۋنيۆەرسيتەتىن قۇرۋ تۋرالى مەموراندۋمعا قول قويىلدى، - دەپ حابارلايدى Aikyn.kz اتالعان ۆەدومستۆونىڭ باسپا ءسوز قىزمەتىنە سىلتەمە جاساپ.

Cardiff University 1883 -جىلى قۇرىلعان جانە الەمگە تانىمال اكادەميالىق جانە عىلىمي الەۋەتكە يە. ۋنيۆەرسيتەت ۇلى بريتانيانىڭ ەڭ ۇزدىك 25 وقۋ ورنىنىڭ قاتارىنا كىرەدى جانە ۇلى بريتانيانىڭ جەتەكشى زەرتتەۋ ۋنيۆەرسيتەتتەرىن بىرىكتىرەتىن بەدەلدى RussellGroup توبىنىڭ مۇشەسى بولىپ تابىلادى. وقۋ ورنى مەديتسينا، بيولوگيا، ينجەنەريا جانە الەۋمەتتىك عىلىمدار سياقتى باعىتتاردا جەتەكشى ۋنيۆەرسيتەت سانالادى. اسىرەسە، ونكولوگيا، كارديولوگيا جانە يننوۆاتسيالىق تەحنولوگيالار سالاسىنداعى زەرتتەۋلەر ەرەكشە ورىن الادى.

كارديفف ۋنيۆەرسيتەتىن كوپتەگەن تانىمال تۇلعالار، سونىڭ ىشىندە مەديتسينا سالاسىنداعى نوبەل سىيلىعىنىڭ لاۋرەاتى، پروفەسسور سەر مارتين ەۆانس، حيميا سالاسىنداعى نوبەل سىيلىعىنىڭ لاۋرەاتى پروفەسسور روبەرت حۋبەر، ۇلىبريتانيانىڭ لەيبوريستىك پارتياسىنىڭ بۇرىنعى كوشباسشىسى جانە ەۋروپالىق كوميسسيانىڭ ۆيتسە- پرەزيدەنتى نيل كيننوك، سونداي-اق BBC جاڭالىقتار جۇرگىزۋشىسى حيۋ ەدۆاردس ءتامامداعان.

مەموراندۋمعا سايكەس، كارديفف ۋنيۆەرسيتەتى جوبانىڭ نەگىزگى سەرىكتەسى رەتىندە قاتىسادى. Cardiff University حالىقارالىق ىنتىماقتاستىق جونىندەگى ۆيتسە-كانسلەرى، پروفەسسور رۋدولف اللەماننىڭ ايتۋىنشا، «بۇل ىنتىماقتاستىق قازاقستان مەن ۇلى بريتانيا اراسىنداعى جوعارى ءبىلىم بەرۋ سالاسىنداعى قارىم- قاتىناستى جاقىنداتادى». جوبانى جۇزەگە اسىرۋ ءۇشىن استانا قالاسىنىڭ اكىمدىگى 10 گەكتار جەر ءبولدى. جوبانى قولدايتىن Qualified Centre of Education Public Foundation قازاقستاندىق ينۆەستورى ۋنيۆەرسيتەت عيماراتى مەن قاجەتتى ينفراقۇرىلىمدى سالۋدى قامتاماسىز ەتەدى.

مينيستر س. نۇربەك پەن ۆيتسە-كانسلەر، پروفەسسور ۆەندي لەرنەر جانە دەپارتامەنت ديرەكتورلارى اراسىنداعى كەزدەسۋدە كارديفف ۋنيۆەرسيتەتىنىڭ ينجەنەريا، جاساندى ينتەللەكت، تۇراقتى دامۋ، مەديتسينا جانە بيوتەحنولوگيا سياقتى نەگىزگى باعىتتار بويىنشا ءبىلىم بەرۋ باعدارلامالارى مەن زەرتتەۋ تەحنولوگيالارىن جۇزەگە اسىرۋ جونىندە كەلىسىمگە قول جەتكىزىلدى. جاڭا ۋنيۆەرسيتەتكە ستۋدەنتتەردى قابىلداۋ 2025 -جىلدىڭ قىركۇيەك ايىندا جوسپارلانىپ وتىر.

كارديفف ۋنيۆەرسيتەتىمەن ىنتىماقتاستىق جوعارى ءبىلىمدى ترانسفورماتسيالاۋعا، ساپالى ءبىلىم بەرۋدى دامىتۋعا جانە ەلدىڭ زەرتتەۋ الەۋەتىن كۇشەيتۋگە باعىتتالعان ماڭىزدى قادامداردىڭ ءبىرى بولادى دەپ كۇتىلۋدە.