قازاقستاندا حيرۋرگتەر ءۇش ناۋقاسقا ءبىر دونوردىڭ ەكى بۇيرەگى مەن جۇرەگىن سالدى

استانا. KAZINFORM - حيرۋرگتەر ءۇش ناۋقاسقا ءبىر دونوردىڭ ەكى بۇيرەگى مەن جۇرەگىن سالدى. بۇل تۋرالى دەنساۋلىق ساقتاۋ مينيسترلىگىنىڭ باسپا ءسوز قىزمەتى جازدى.

مەرەكە قارساڭىندا ۇلتتىق عىلىمي ونكولوگيا ورتالىعى مەن استانا قالاسىنىڭ كارديوحيرۋرگيالىق ورتالىعىنىڭ ترانسپلانتولوگتارى، كارديوحيرۋرگتارى، انەستەزيولوگتارى مەن مەيىرگەرلەرى قۇرامىنداعى جوعارى بىلىكتى دارىگەرلەر توبى سان اۆياتسيا بورتىندا پاۆلودار وبلىسىنا كەلدى.

سونىمەن قاتار استانا قالاسىندا كۇتۋ پاراعىندا تۇرعان باعدارلامامەن ىرىكتەلگەن رەتسيپيەنتتەر قوسىمشا تالداۋلار تاپسىرۋ ءۇشىن شاقىرىلدى.

مەديتسينالىق زەرتتەپ-قاراۋدان ءوتۋ ناتيجەسى بويىنشا جانە كوميسسيانىڭ شەشىمى بويىنشا 26 جاستاعى رەتسيپيەنت انىقتالدى. ول بۇيرەكتىڭ V تەرمينالدى ساتىسى دياگنوزىمەن 6 جىل بويى گەمودياليزدە بولعان.

استانا قالاسىنداعى ۇلتتىق عىلىمي ونكولوگيا ورتالىعىندا دارىگەرلەر ەرەسەك پاتسيەنتكە كاداۆەرلىك بۇيرەكتى ترانسپلانتاتتاۋدى ءساتتى جۇرگىزدى.

رەتسيپيەنت پالاتاعا اۋىستىرىلدى، بۇگىنگى كۇنى ونىڭ جاعدايى جاقسى. بۇيرەك تولىق جۇمىس ىستەپ تۇر.

ەكىنشى بۇيرەك بالاعا استاناداعى انا مەن بالا ورتالىعىندا ترانسپلانتاتتالدى.

ءۇشىنشى اعزا - جۇرەكتى ترانسپلانتاتتاۋ كارديوحيرۋرگيالىق ورتالىقتا جۇرگىزىلدى.

اۆتور

ابىلايحان جۇماشيەۆ