قازاقستاندا شەتەلدىك ديپلومدى تانۋ ونلاين قولجەتىمدى

استانا. KAZINFORM - ەلىمىزدە شەتەلدىك ديپلومداردى تانۋ eGov Mobile قوسىمشاسىندا قولجەتىمدى. تولىعىراق ۇلتتىق اقپاراتتىق تەحنولوگيالار اقپاراتىندا ايتىلعان.

- eGov Mobile قوسىمشاسىندا شەتەلدە الىنعان جوعارى جانە جوعارى وقۋ ورنىنان كەيىنگى ءبىلىم تۋرالى ديپلومداردى تانۋ قىزمەتى قولجەتىمدى. قىزمەت شەتەلدىك جوعارى وقۋ ورىندارىنىڭ تۇلەكتەرىنە قازاقستاندا جۇمىسقا ورنالاسۋ نەمەسە وقۋىن جالعاستىرۋ ءۇشىن ديپلومىن رەسمي تۇردە راستاۋعا مۇمكىندىك بەرەدى. بۇرىن ديپلومدى تانۋ ءراسىمى جەكە ءوتىنىش بەرۋدى جانە قاعاز قۇجاتتاردى جيناۋدى تالاپ ەتسە، ەندى بۇكىل پروتسەسس ونلاين فورماتتا قولجەتىمدى. بۇل ءوتىنىشتى قاراۋ مەرزىمىن ەداۋىر قىسقارتىپ، قىزمەتتى پايدالانۋشىلار ءۇشىن ىڭعايلى، - دەلىنگەن حابارلامادا.

ونلاين قىزمەتتى پايدالانۋ ءۇشىن:

- eGov Mobile قوسىمشاسىندا اۆتوريزاتسيادان ءوتۋ قاجەت؛

- «قىزمەتتەر» - «ءبىلىم» بولىمىندە «جوعارى جانە جوعارى وقۋ ورنىنان كەيىنگى ءبىلىم تۋرالى قۇجاتتاردى تانۋ» قىزمەتىن تاڭداۋ؛

- ءوتىنىشتى تولتىرىپ، قاجەتتى قۇجاتتاردى تىركەپ جانە تولەم جاساۋ قاجەت؛

- ءوتىنىشتى قول قويۋدىڭ قولجەتىمدى ادىستەرىنىڭ بىرىمەن راستاۋ.

ءوتىنىش زاڭنامادا بەلگىلەنگەن مەرزىمدە قارالادى. ناتيجەسىندە، پايدالانۋشى ديپلومدى تانۋ تۋرالى ەلەكتروندىق قۇجاتتى الادى نەمەسە زاڭدا كوزدەلگەن نەگىزدەر بويىنشا دالەلدى جاۋاپ بەرىلەدى.

جاڭارتىلعان قىزمەتتى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ مەملەكەتتىك كورسەتىلەتىن قىزمەتتەر كوميتەتى، «ۇلتتىق اقپاراتتىق تەحنولوگيالار» اق جانە عىلىم جانە جوعارى ءبىلىم مينيسترلىگىمەن بىرلەسىپ ىسكە اسىردى.

ايتا كەتسەك، قازاقستاندىقتار ديپلومدارىن eGov.kz پورتالىندا سيفرلاندىرا الادى.