قازاقستاندا عىلىمي جوبا اۆتورلارىنىڭ تابىسى قانشا

استانا. KAZINFORM - ق ر عىلىم جانە جوعارى ءبىلىم مينيسترلىگى ەلىمىزدە عىلىمي جوبا اۆتورلارىنا بەرىلەتىن سىياقىلار تۋرالى تۇسىنىك بەردى.

«2023 -جىلدىڭ قورىتىندىسىن سارالاي كەلە، 2022 -جىلى ىسكە قوسىلعان جوبالار بويىنشا اۆتورلارعا ونلاين-باقىلاۋ تەحنولوگياسى جوباسىنا قاتىستى 20 ميلليون تەڭگە كولەمىندە اۆتورلىق سىياقى تولەندى»، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ۆەدومستۆو مالىمەتىنە قاراعاندا، عىلىمي-زەرتتەۋ ينستيتۋتتارى مەن عالىمدار رويالتيدەن باسقا عىلىمي-تەحنيكالىق قىزمەتتىڭ ناتيجەسىن كوممەرتسيالاندىرۋ جوبالارىن ىسكە اسىرۋدان دا ديۆيدەندتەر الۋعا قۇقىلى.

«2016 -جىلدان بەرى وتكىزىلىپ كەلە جاتقان كونكۋرستار اياسىندا «عىلىم قورى» ا ق عىلىمي نەمەسە عىلىمي-تەحنيكالىق قىزمەتتىڭ ناتيجەسىن كوممەرتسيالاندىرۋدىڭ 290 جوباسىن قارجىلاندىردى. ونىڭ ىشىندە 152 سى اياقتالدى جانە 138 جوبا ىسكە اسىرۋ ساتىسىندا. 2024 -جىلعى 1-قاڭتارداعى جاعداي بويىنشا جوبالار بويىنشا جالپى ساتىلىمدار 33,7 ميلليارد تەڭگەنى قۇرادى.

اتاپ ايتقاندا، تەحنولوگيالاردى بەرۋ تۇرعىسىندا 51 ليتسەنزيالىق كەلىسىم جاسالدى، جالپى سوماسى 534 ميلليون تەڭگەگە رويالتي تولەندى، 1763 جۇمىس ورنى اشىلدى، سونداي-اق تولەنگەن جالاقىنىڭ جالپى سوماسى 6,9 ميلليارد تەڭگەنى قۇرادى»، - دەپ اتالىپ وتكەن مينيسترلىك اقپاراتىندا.