قازاقستاندا عىلىم مەن بيزنەس تىزە قوسىپ جۇمىس ىستەيتىن بولدى

استانا. KAZINFORM - ق ر پرەزيدەنتى جانىنداعى ق ر ۇلتتىق عىلىم اكادەمياسى جانە «اتامەكەن» ۇلتتىق كاسىپكەرلەر پالاتاسى ءوزارا تۇسىنىستىك جانە ىنتىماقتاستىق تۋرالى مەموراندۋم بەكىتتى.

ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ عىلىمي جوبالاردى قارجىلاندىرۋ جىلدان جىلعا ارتىپ، عالىمدارعا مەملەكەتتىك قولداۋ كۇشەيىپ كەلە جاتقانىن اتاپ ءوتتى.
«عىلىمنىڭ ناتيجەلىلىگىن ارتتىرۋ، ونى بيزنەس- قوعامداستىقتىڭ سەنىمدى سەرىكتەسى ەتۋ ماڭىزدى. سوندىقتان قازىرگى تاسىلدەردى تۇبەگەيلى قايتا قاراپ، وتاندىق عىلىمدى دامىتۋدىڭ جاڭا ستراتەگياسىن قۇرۋىمىز كەرەك. ءبىزدىڭ باستى مىندەتىمىز — عىلىمدى قولدانبالى ەتۋ. بۇل ءوندىرىستى سۇرانىسقا يە يننوۆاتسيالارمەن جاساقتاۋعا جانە ەلدىڭ ەكونوميكالىق دامۋىندا ەلەۋلى سەرپىلىس جاساۋعا مۇمكىندىك بەرەدى. بۇل رەتتە وسى وزگەرىستەردىڭ بارلىعى عىلىمي قوعامداستىقتىڭ عانا ەمەس، ەكونوميكانىڭ ناقتى سەكتورىنىڭ دا پىكىرىن ەسكەرە وتىرىپ، جۇزەگە اسىرىلۋى قاجەت» ، - دەدى اقىلبەك كۇرىشبايەۆ ەلوردادا وتكەن دوڭگەلەك ۇستەلدە.
ونىڭ ايتۋىنشا، ۇلتتىق عىلىم اكادەمياسى عالىمدارعا ارنالعان تاعى ءبىر اكىمشىلىك قۇرىلىم بولماۋى كەرەك. ول اۆتونومدى، تاۋەلسىز ۇسىنىستاردى بەرەتىن، بەدەلدى ساراپتامالىق عىلىمي ۇيىم بولۋعا ۇمتىلادى.
اكادەميا عىلىمدى باسقارۋ سالاسىندا جىبەرىلگەن جۇيەلىك ولقىلىقتاردىڭ ورنىن تولتىرۋ، فورسايتتىق زەرتتەۋلەر مەن تەحنولوگيالىق بولجاۋ نەگىزىندە وتاندىق بيزنەسپەن بىرگە عىلىمي زەرتتەۋلەردىڭ باسىم باعىتتارىن ايقىنداۋدى ماقسات ەتۋى قاجەت.
سونىمەن بىرگە، اكادەميا بەس ستراتەگيالىق ماڭىزدى باعدارلامانى ازىرلەۋ جۇمىستارىن باستاپ كەتتى.
ونىڭ ءبىرى — اۋىل شارۋاشىلىعىنداعى زاماناۋي بيوتەحنولوگيانى دامىتۋ باعدارلاماسى اۋىل شارۋاشىلىعى داقىلدارىنىڭ ونىمدىلىگىن ارتتىرۋدا ەلەۋلى سەرپىلىس جاساۋعا مۇمكىندىك بەرمەك.
اكادەميا تالانتتى جاستاردى عىلىم سالاسىنا تارتۋ ورتالىعىنا اينالادى.
بۇل باعىتتا العاشقى قادامدار جاسالدى - اكادەميا جانىنان تۇڭعىش رەت جاس عالىمدار كەڭەسى قۇرىلدى.
ا. كۇرىشبايەۆ بيزنەس وكىلدەرىنە وسى باستامانى قۇپتاۋدى جانە ەلىمىزدىڭ ۇزدىك جاس عالىمدارىن قارجىلاي قولداۋ قورىن قۇرۋدى ۇسىندى.
ءوز كەزەگىندە «اتامەكەن» ۇ ك پ باسقارما ءتوراعاسى مىندەتىن اتقارۋشى رايىمبەك باتالوۆ پالاتانىڭ ەكونوميكا مەن قوعامنىڭ دامۋىندا شەشۋشى ءرول اتقاراتىن عىلىم مەن يننوۆاتسيانى دامىتۋعا مۇددەلى ەكەنىن جەتكىزدى.
وتكەن جىلدىڭ مامىر ايىندا وتاندىق كاسىپكەرلەر كەڭەسى ءوتىپ، كاسىپكەرلەر پالاتاسى عىلىمدى دامىتۋداعى ۇسىنىستارىن ايتقان.
«قازىرگى ۋاقىتتا بۇل ۇسىنىستاردىڭ ءبىر بولىگى „عىلىم جانە تەحنولوگيالىق ساياسات تۋرالى“ جاڭا زاڭ جوباسىندا كورىنىس تاپتى جانە قابىلداندى. اتاپ ايتقاندا، عىلىمعا قوسقان ۇلەسى ءۇشىن بيزنەسكە سالىقتىق جەڭىلدىكتەر بەرۋ، جەكە سەكتوردى تارتۋ ارقىلى تەحنوپاركتەر، بيزنەس- ينكۋباتورلار، يننوۆاتسيالىق ورتالىقتار قىزمەتىن كۇشەيتۋ ۇسىنىستارى بولدى. ودان بولەك، ءبىزدىڭ پالاتا „عىلىم قورىمەن“ بىرلەسىپ عالىمدار مەن كاسىپكەرلەر ءۇشىن بىرنەشە كوممەرتسيالاندىرۋ رەاكتورلارىن وتكىزدى، وندا يننوۆاتسيالىق جوبالارمەن تانىسىپ، جوبالاردى بىرلەسىپ كوممەرتسيالاندىرۋ تۋرالى كەلىسىمدەرگە قول قويدى» ، - دەدى رايىمبەك باتالوۆ.
سونداي- اق، عىلىمنىڭ بيزنەسپەن ءوزارا ءىس- قيمىلىنا جاعداي جاساۋ ماقساتىندا عىلىمي جوبالاردى كوممەرتسيالاندىرۋعا مۇددەلى بيزنەس وكىلدەرىنىڭ قاۋىمداستىعى - عىلىم قورىنىڭ بيزنەس- سەرىكتەستەرى كلۋبى قۇرىلدى.
قازىرگى ۋاقىتتا كلۋبقا 180 نەن استام ادام مۇشە.
«بارلىق وتكىزىلەتىن ءىس- شارالارىمىزدىڭ باستى مىندەتى - عىلىم مەن بيزنەستىڭ تۇراقتى كووپەراتسياسىن ازىرلەۋ. عالىمدار مەن بيزنەس ءبىر دامۋ جوسپارىمەن ءجۇرۋى كەرەك. بۇگىنگى مەموراندۋم دا ءبىزدىڭ عىلىمي زەرتتەۋلەرگە، يننوۆاتسيالارعا جانە دامۋعا دەگەن ورتاق ۇمتىلىسىمىزدىڭ سيمۆولى بولادى جانە ۇيىمدارىمىز اراسىنداعى سەرىكتەستىكتى نىعايتۋعا كۇش سالۋىمىزدىڭ دالەلى بولادى»، - دەدى ر. باتالوۆ.

اۆتور
ايجان سەرىكجان قىزى