قازاقستاندا ءتورت كۇندىك جۇمىس اپتاسى: جالاقى قالاي ەسەپتەلەدى؟
استانا. KAZINFORM – قازاقستاندا ءتورت كۇندىك جۇمىس اپتاسىن ەنگىزۋ مۇمكىندىگى 2015-جىلدان بەرى زاڭنامادا قاراستىرىلعان.
بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى.
مينيسترلىك وكىلى، ەڭبەك جانە الەۋمەتتىك ارىپتەستىك دەپارتامەنتى باسقارماسىنىڭ باسشىسى شالقار ورازبەكوۆتىڭ ايتۋىنشا، 2023-جىلى قابىلدانعان الەۋمەتتىك كودەكستە دە ءتورت كۇندىك جۇمىس اپتاسىن قولدانۋعا مۇمكىندىك بەرەتىن ەرەجەلەر ناقتىلانعان.
ءتورت كۇندىك جۇمىس اپتاسى ەنگىزىلگەن جاعدايدا جالاقى مولشەرى ورىندالعان جۇمىس كولەمىنە سايكەس پروپورتسيونالدى تۇردە ەسەپتەلەدى. ياعني، جۇمىس ۋاقىتى قىسقارسا، سوعان ساي جالاقى دا قىسقارادى، - دەدى ورازبەكوۆ ورتالىق كوممۋنيكاتسيالار قىزمەتىندەگى بريفينگتە.
سونىمەن قاتار، ول جۇمىس بەرۋشى جۇمىس كۇندەرىنىڭ قىسقارعانىنا قاراماستان بۇرىنعى جالاقى مولشەرىن ساقتاۋعا قۇقىلى ەكەنىن اتاپ ءوتتى. بۇل ەڭبەك كودەكسىنە قايشى كەلمەيدى جانە زاڭ بۇزۋشىلىق بولىپ سانالمايدى.
بۇعان دەيىن جاپونيادا ءتورت كۇندىك جۇمىس اپتاسى ەنگىزىلەتىنى تۋرالى حابارلاعان ەدىك.