قازاقستاندا ءۇش اۋە كومپانياسىنا ايىپپۇل سالىندى

 استانا. KAZINFORM - كولىك مينيسترلىگىنىڭ اۆياتسيا اكىمشىلىگى جۇرگىزگەن تەكسەرۋلەردىڭ ناتيجەسىندە 3 اۋە كومپانياسى مەن 4 ۇشقىش اكىمشىلىك جاۋاپقا تارتىلدى.

بۇگىندە ەلىمىزدىڭ اۆياتسيا اكىمشىلىگى كولىك ءمينيسترىنىڭ تاپسىرماسىنا سايكەس ان-2 ۇشاقتارىن تەكسەرۋگە قاتىستى جەڭىل جانە اسا جەڭىل ازاماتتىق اۋە كەمەلەرىن پايدالانۋشىلاردى جوسپاردان تىس تەكسەرىپ جاتىر.

تەكسەرۋ قورىتىندىسىنا سايكەس اۋە كەمەلەرىن پايدالانۋ كەزىندە ازاماتتىق اۆياتسيا سالاسىنداعى نورماتيۆتىك قۇقىقتىق اكتىلەردىڭ كەلەسى تالاپتارى بۇزىلعان:

- كوماندير اۋە كۋالىگىنسىز ۇشقان (4 فاكتى تىركەلدى) جانە ول تۋرالى اۋە قوزعالىسى قىزمەت كورسەتۋ ورگانىنا حابارلاماعان؛

- ۇشۋ قۇجاتتاماسىنىڭ بولماۋى؛

- اۋە كەمەسىنىڭ تەحنيكالىق قىزمەت كورسەتۋ قۇجاتىن ورتالىققا جىبەرمەگەن.

ۆەدومستۆو تاراتقان اقپاراتتا، اۋە كومپانيالارىنا قاتىستى جوسپاردان تىس تەكسەرۋ جۇمىستارى جالعاسىپ جاتقانى ايتىلعان. تامىز ايىندا 6 اۋە قىزمەتى تەكسەرىستەن وتەدى، ال شىلدەدە 10 اۋە كومپانياسىن ىرىكتەپ تەكسەرۋ ءجۇردى.

«قازاقستاننىڭ اۆياتسيا اكىمشىلىگى جۇرگىزگەن تەكسەرۋلەردىڭ ناتيجەسىندە شاعىن اۆياتسياعا جاتاتىن 3 اۋە كومپانياسى مەن 4 ۇشقىشقا ق ر ازاماتتىق اۆياتسيا سالاسىنداعى نورماتيۆتىك قۇقىقتىق اكتىلەردى بۇزعانى ءۇشىن 11 ايىپپۇل سالدى»، - دەلىنگەن حابارلامادا.

ايتا كەتەيىك، Air Astana كومپانياسى 5-تامىز كۇنى استانا اۋەجايىنىڭ وپەراتورى FlyArystan ۇشاقتارىنىڭ بىرىنەن اقاۋ شىعىپ، سالدارىنان ۇشاقتىڭ بىرنەشە كۇن بويى ءماجبۇرلى تۇراققا قويىلعانىن حابارلادى. اۋەجاي باسپالداقتارىن دۇرىس قولدانباۋدىڭ سالدارىنان ۇشاقتىڭ ارتقى كىرەبەرىس ەسىگى زاقىمدانعانى بەلگىلى بولدى.

كەيىن سوڭعى ۋاقىتتا اۋە كەمەلەرىنە كەلتىرىلگەن زالال وقيعالارىنىڭ ءجيى بولۋىنا بايلانىستى ەلوردالىق اۋەجايدا جوسپاردان تىس تەكسەرۋ جۇرەتىنى حابارلاندى.