قازاقستاندا ءبىر كىسىگە ساتىلاتىن SIM كارتانىڭ سانى شەكتەلۋى مۇمكىن بە

استانا. KAZINFORM - بۇگىن پارلامەنت ماجىلىسىندە كيبەرقىلمىسپەن كۇرەس تاقىرىبىنا ارنالعان تالقىلاۋدا ەلىمىزدە ءبىر كىسىگە ساتىلاتىن SIM كارتانىڭ سانىن شەكتەۋ ۇسىنىلدى.

«پاۆلودار وبلىستىق پوليتسيا دەپارتامەنتى وكىلدەرىمەن كەزدەسكەن ەدىك. ولار SIM كارتا (ۇيالى تەلەفون نومىرلەرى) بەرۋدى شەكتەۋ كەرەك دەپ ۇسىنىس ايتتى. ءبىزدىڭ قوعامدا ونى كەز كەلگەن دۇكەننەن ساتىپ الۋعا بولادى. ءبىر كىسىگە شەكسىز كوپ SIM كارتانى ساتۋ مۇمكىندىگى بار. كەيبىر ەلدەردىڭ تاجىريبەسىنە قاراساق، تەك بايلانىس وپەراتورىنىڭ فيليالىنان ساتىپ الۋعا رۇقسات ەتىلەدى. جەكەلەگەن دۇكەندەر مۇنى ساتا بەرمەيدى. وسىعان شەكتەۋ قويساڭىزدار. ءبىر كىسىگە كەم دەگەندە 2-3 SIM كارتادان ارتىق بەرىلمەسە. بۇل ۇلكەن كومەك بولادى دەپ وتىر پوليتسەيلەر. وسى ماسەلەنى زاڭ جۇزىندە قاراستىرۋعا بولا ما؟»، - دەپ سۇرادى ءماجىلىس دەپۋتاتى جارقىنبەك امانتاي ۇلى.

ءوز كەزەگىندە سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى اقپاراتتىق قاۋىپسىزدىك كوميتەتىنىڭ ءتوراعاسى رۋسلان ءابدىقالىقوۆ SIM- كارتالارىنىڭ سانىنا شەكتەۋ كەرەك ەمەس ەكەنىن ايتىپ، ونىڭ ورنىنا ابونەنتتى سايكەستەندىرۋ تەتىگىن ەنگىزۋدى ۇسىندى.

«ويتكەنى شەكتەۋ بولعان كەزدە، بەس SIM كارتادان تۇراتىن كۆوتاسىن باسقا بىرەۋگە قايتا ساتاتىن ادامدار پايدا بولۋى مۇمكىن. سوندىقتان مەملەكەت جاعىنان قاجەتسىز شەكتەۋلەر بولماس ءۇشىن ادامدارعا يدەنتيفيكاتسيا جاساپ، سودان كەيىن عانا SIM كارتانى ىسكە قوسۋدى ۇسىنامىز. بۇل ۇسىنىس ءقازىر قاراستىرىلىپ جاتىر»، - دەدى ر. ءابدىقالىقوۆ.