قازاقستاندا بيرجا بوتتارىنا تىيىم سالىنباق

استانا. KAZINFORM - قازاقستاندا بيرجاداعى بوتتاردى پايدالانۋعا تىيىم سالىنادى. بۇل تۋرالى ءماجىلىس دەپۋتاتى ەكاتەرينا سمىشليايەۆا ءمالىم ەتتى.

بۇگىن پالاتانىڭ جالپى وتىرىسىندا دەپۋتات سەرگەي پونوماريەۆ تاۋار بيرجالارى ماسەلەلەرىنە ارنالعان زاڭ جوباسىن تالقىلاۋ كەزىندە بيرجاداعى مامىلەلەردى بەكىتۋگە بوتتار دا ارالاسىپ جاتاتىنىن، بۇل جۇيە اۆتوماتتاندىرىلعان الگوريتمگە جاتاتىنىن ايتتى.

«ولاردىڭ ونىمدىلىگى بىرنەشە ەسە جوعارى جانە شارتتاردى بەكىتۋدە ادەتتەگى بروكەرلەردەن وزىپ، بىرنەشە سەكۋندتا اياقتاپ جاتادى. بۇل جاعداي باسەكەنى بۇزادى، ويتكەنى ەشبىر بروكەر وسىلايشا تەز ارەكەت ەتە المايدى»، - دەدى س. پونوماريەۆ.

ءوز كەزەگىندە ە. سمىشليايەۆا بوتتار جاسايتىن وپەراتسيالاردى قابىلداماۋ تۋرالى نورما ەنگىزىلىپ جاتقانىن ايتتى.

«ەگەر كريپتوبيرجالاردا نەمەسە قور نارىقتارىندا بۇل پروتسەسكە سايكەس كەلەتىن الگوريتمدەر رەتىندە سانالسا، ال تاۋار بيرجالارىندا بوتتار ساۋدا-ساتتىققا كۇدىكپەن قاراۋعا اكەلەدى. سەبەبى ولار ساۋداعا مانيپۋلياتسيا جاساۋعا، باعانىڭ كۇرت وزگەرۋىنە اسەر ەتۋى مۇمكىن. بۇل جاعداي تەحنولوگيانى ەنگىزۋدىڭ جاناما اسەرلەرى سانالادى. سوندىقتان ءبىز مينۋتىنا ەكى نەمەسە ودان دا كوپ وپەراتسيا جاسايتىن بوتتاردى پايدالانۋعا تىيىم سالۋدى ەنگىزەمىز. مۇنداي بوتتار انىقتالعان شارتتار نازارعا الىنبايدى. وسىدان كەيىن بيرجا ويىنشىلارى بۇل بوتتاردى پايدالانۋدىڭ ەش ماڭىزى جوق ەكەنىن تۇسىنەدى. بۇل ءتاسىل يننوۆاتسيا مەن قاۋىپسىزدىك اراسىنداعى تەڭگەرىمدى ورناتادى»، - دەدى ەكاتەرينا سمىشليايەۆا.

بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تاۋار بيرجالارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.