قازاقستاندا بوكس كلۋبتارى اراسىندا چەمپيونات وتەدى

استانا. KAZINFORM - قازاقستان بوكس فەدەراتسياسىنىڭ باس حاتشىسى مەرەي اقشالوۆ قازاقستاندىق بوكس كلۋبتارى اراسىندا چەمپيونات وتەتىنىن ايتتى.

ق ب ف باس حاتشىسىنىڭ ايتۋىنشا، اتالعان چەمپيوناتتى 2026-جىلى باستاپ وتكىزۋدى جوسپارلاپ وتىر.

- وزدەرىڭىز بىلەسىزدەر، كەزىندە Astana Arlans دەگەن بوكس كلۋبى بولدى. سول جەردە بوكستاسىپ، كوپ تاجىريبە جيناقتادىق. ەندى وسى تۋرنيردى كەلەسى جىلدان باستاپ ەلىمىزدە وتكىزۋدى جوسپارلاپ وتىرمىز. اتالعان چەمپيوناتقا وڭىرلىك سپورت باسقارمالارىنا قاراستى بوكس كلۋبتارى قاتىسا الادى. جارىس 5 راۋندتان، جارتىلاي كاسىپقوي بوكس ستيلىندە وتەدى، - دەدى اقشالوۆ فەدەراتسياسىنىڭ جىلدىق كونفەرەنسياسىندا.

مەرەي اقشالوۆتىڭ ايتۋىنشا، وسىنداي تۋرنيرلەردى ۇيىمداستىرۋ سپورتتىق رەزەرۆتى قالىپتاستىرۋعا، وڭىردەگى بوكس سپورتىن دامىتۋعا سەپتىگىن تيگىزەدى.

ەسكە سالا كەتەيىك، بۇگىن ەلورداداعى «Qazaqstan» جەڭىل اتلەتيكالىق سپورت كەشەنىندە ق ر بوكس فەدەراتسياسىنىڭ جىلدىق كونفەرەنسياسى ءوتتى.

وسىعان دەيىن حابارلاعانىمىزداي، شري-لانكا استاناسى كولومبو قالاسىندا ءوتىپ جاتقان بوكستان ازيا چەمپيوناتىندا قازاقستاندىق 11 جاس بوكسشى فينالعا شىقتى.