قازاقستاندا بۇرىنعى ۆيتسە- مينيستر ۇستالدى

استانا. KAZINFORM - ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى بولعان، سونداي-اق، «ەڭبەك رەسۋرستارىن دامىتۋ ورتالىعى» ا ق- نىڭ باسشىسى قىزمەتىن اتقارعان اقمادي سارباسوۆ ۇستالدى.

ەكس-شەنەۋنىك ۇستالعانىن ەڭبەك جانە حالىقتى الەۋمەتتىك قورعاۋ مينيسترلىگى راستادى.

«مينيسترلىك تەرگەۋ ورگاندارىنا بەلگىلەنگەن تارتىپتە كومەكتەسىپ جاتىر. تەرگەۋ بارىسىنا قاتىستى بارلىق سۇراق ۋاكىلەتتى ورگانداردىڭ قۇزىرەتىندە»، - دەدى ۆەدومستۆو وكىلى.

اقمادي سارباسوۆ بيىل ساۋىردە باسقا جۇمىسقا اۋىسۋىنا بايلانىستى ەڭبەك ۆيتسە-ءمينيسترى قىزمەتىنەن كەتكەن ەدى. ول بۇل قىزمەتتى 2020-جىلعى ماۋسىمنان باستاپ اتقارىپ كەلگەن بولاتىن.

Telegram-داعى Kozachkov offside ارناسىندا بۇرىنعى ۆيتسە-ءمينيستردىڭ ۇستالۋىنا مەملەكەتتىك دەرەكقورلاردان الىنعان اقپاراتتى كوممەرتسيالىق ۇيىمعا بەرۋ سحەماسىنىڭ اشكەرەلەنۋى سەبەپ بولۋى مۇمكىن ەكەنى ايتىلعان. سوت جەكە كومپانيا باسشىسىن جانە بۇرىن ۆيتسە-مينيستر بولعان ەكى جوعارى لاۋازىمدى شەنەۋنىكتى قاماۋعا الۋعا سانكسيا بەرگەن.

مالىمەتكە سۇيەنسەك، «ءبىرىنشى كرەديتتىك بيۋرو» ج ش س باسشىسى رۋسلان وماروۆقا ايىپ تاعىلىپ، ورتالىقتىڭ بۇرىنعى باسشىسى داۋلەت ارعاندىقوۆ تا قاماۋعا الىنعان.

جاريالانعان مالىمەتكە سايكەس تەرگەۋ بارىسىندا ەڭبەك مينيسترلىگىنىڭ قۇرىلىمى سانالاتىن «ەڭبەك رەسۋرستارىن دامىتۋ ورتالىعى» ا ق ازاماتتاردىڭ تابىستارى مەن الەۋمەتتىك تولەمدەرى جونىندەگى قۇپيا اقپاراتتى «ءبىرىنشى كرەديتتىك بيۋرو» ج ش س- عا بەرگەنى انىقتالعان، بۇل مالىمەتتەرگە جەدەل قول جەتكىزۋ ءۇشىن ب ك ب جۇيەلى تۇردە پارا بەرىپ وتىرعان.