قازاقستاندا باسپانا باعاسى تومەندەۋى مۇمكىن بە؟

استانا. KAZINFORM - بازالىق مولشەرلەمە كوتەرىلدى. ەندى ول جىلجىمايتىن مۇلىك نارىعىنداعى باعانىڭ وزگەرۋىنە تىكەلەي اسەر ەتەدى. بۇل تۋرالى «JibekJoly» ارناسىنداعى «بۇگىن live» باعدارلاماسىندا يپوتەكا بروكەرى الماجان كەنجەعۇل قىزى ايتتى.

- بازالىق مولشەرلەمەنىڭ كوتەرىلۋى - بانكتەر اراسىنداعى اقشانىڭ جوعارىلاعانىن بىلدىرەدى. ياعني، يپوتەكا بولسىن، كرەديت بولسىن ولاردىڭ مولشەرلىك ستاۆكاسى ءوستى دەگەن ءسوز. بۇل يپوتەكاعا سۇرانىس پەن بانك الدىنداعى تاۋەكەلدىلىكتى ازايتادى، - دەيدى الماجان كەنجەعۇل قىزى.

ول، بۇل ءۇردىس بانكتەردەگى پايىزدىق مولشەرلەمەنىڭ ۇلعايۋىنا دا اسەر ەتەتىنىن ايتادى. ديپوزيت پەن كرەديتتىڭ دە مولشەرى ارتادى.

- ونى بانكتەر بىردەن كوتەرۋى مۇمكىن ەمەس. نارىقتى باقىلاي وتىرا، بىرتە-بىرتە كوتەرە باستايدى. بۇل قاتتى قورقاتىن جاعداي ەمەس. ول ەلدەگى ينفلياتسيانىڭ دەڭگەيىنە بايلانىستى، - دەدى يپوتەكا بروكەرى.

دەمەك، سپيكەردىڭ سوزىنشە الداعى ۋاقىتتا باسپانا الۋ قيىندايدى. سەبەبى، نەسيە پايىزىمەن قوسا، ايلىق تولەم كولەمى دە ارتادى. سايكەسىنشە، سۇرانىس تا ازايۋى مۇمكىن.

- يپوتەكالىق نەسيەنىڭ قولجەتىمدىلىگى قيىندايدى. ايلىق تولەم وسكەندىكتەن ءتۇرلى كەدەرگىلەر دە شىعادى. بۇل جەردە قيىندىق تۋعىزاتىن ماسەلە - ازاماتتاردىڭ بانك الدىندا ءوزىنىڭ تابىسىن راستاۋى. سەبەبى، قازىر شىعىندار كوپ، ءبىراق جالاقى كولەمى وزگەرىسسىز. بۇنىڭ بارلىعىنان دۇرلىگىپ قورقا بەرۋدىڭ دە قاجەتى جوق، - دەيدى ول.

سالا مامانىنىڭ ايتۋىنشا، العاشقى جارناسى بار ازاماتتارعا الاڭدايعا نەگىز جوق. قارجىلىق تۇراقتىلىقتى رەتتەۋ ارقىلى بەلگىلى ءبىر نەسيەگە ءوتىنىم بەرۋگە دە بولادى ەكەن.

ايتا كەتەيىك، ۇلتتىق بانك بازالىق مولشەرلەمەنى  عا دەيىن كوتەردى.

اۆتور

زۇلقارناي ەرمۇرات ۇلى