قازاقستاندا ازەربايجان رەسپۋبليكاسىنىڭ مادەنيەت كۇندەرى وتەدى

استانا. KAZINFORM - ازەربايجان پرەزيدەنتى يلحام اليەۆتىڭ قازاقستانعا رەسمي ساپارى بارىسىندا مەملەكەت باسشىسى قاسىم-جومارت توقايەۆ ەكى ەلدىڭ قارىم-قاتىناسىن نىعايتۋدا مادەنيەت سالاسىنداعى ءوزارا ءىس-قيمىل ەرەكشە ءرول اتقاراتىنىن اتاپ ءوتتى. ناتيجەسىندە ءوزارا مادەنيەت كۇندەرىن وتكىزۋ تۋرالى كەلىسىم جاسالدى.

مادەنيەت جانە اقپارات مينيسترلىگىنىڭ باسپا ءسوز قىزمەتى مالىمەتىنشە، 2024 -جىلعى 24-26 -قىركۇيەك ارالىعىندا استانادا ازەربايجان مادەني كۇندەرى وتەدى. 24 -قىركۇيەكتە «فيزۋلي-530» كىتابىنىڭ تۇساۋكەسەرى جانە ەتنو-دجاز كونسەرتى وتەدى.

25-قىركۇيەكتە قازاقستان مەن ازەربايجاننىڭ ۇلتتىق كىتاپحانالارى اراسىندا مەموراندۋمعا قول قويۋ، ەلميرا احۋندوۆا كىتابىنىڭ تۇساۋكەسەرى، سونىمەن قاتار «ازەربايجان ونەرىنىڭ جاۋھارلارى» كورمەسىنىڭ اشىلۋى جانە بي انسامبلىنىڭ كونسەرتى وتەدى.

26 -قىركۇيەكتە ازەربايجاننىڭ زاماناۋي ونەرى جانە توميريس يكونوگرافياسى تۋرالى دارىستەر وتكىزىلەدى.

باستى ءىس-شارا 26- قىركۇيەك كۇنى ق. قۋانىشبايەۆ اتىنداعى ۇلتتىق مۋزىكالىق-دراما تەاترىندا وتەدى. گالا-كونسەرتتە ازەربايجاننىڭ حالىق ارتىستەرى ونەر كورسەتەدى.

ايتا كەتەيىك، 2023 -جىلدىڭ جەلتوقسانىندا قازاقستان رەسپۋبليكاسىنىڭ ازەربايجان رەسپۋبليكاسىنداعى مادەنيەت كۇندەرى باكۋ قالاسىندا ءوتتى.