قازاقستاندا اۋىل شارۋاشىلىعىن سيفرلاندىرۋ قالاي ءجۇرىپ جاتىر
الماتى. KAZINFORM - سيفرلىق ترانسفورماتسيا اۋىل شارۋاشىلىعىندا قارقىن الدى. بۇل سالادا دروندارمەن ەگىس القاپتارىن باقىلاۋ، GPS- ناۆيگاتسيا، اگرودەرەكتەرمەن جۇمىس، اۆتوماتتاندىرىلعان سۋارۋ جانە مالدى باسقارۋ جۇيەسى ءساتتى ەنگىزىلىپ جاتىر. بۇل تۋرالى اۋىل شارۋاشىلىعى مينيسترلىگىنىڭ Kazinform ساۋالىنا جولداعان جاۋابىندا ايتىلعان.
مينيسترلىكتەن ءمالىم ەتكەندەي، ەلدە زاماناۋي تەحنولوگيالاردى ەنگىزۋ ارقىلى اۋىل شارۋاشىلىعىنىڭ ونىمدىلىگى مەن تيىمدىلىگى ارتىپ كەلەدى.
جاساندى ينتەللەكت نەگىزىندە جۇمىس ىستەيتىن فەرمالار پايدا بولدى.
- قازاقستاندا بارلىعى 2243 فەرما بار. ونىڭ ىشىندە سيفرلىق فەرمالار بەلسەندى تۇردە ەنگىزىلىپ جاتىر. قازىر ەلىمىز بويىنشا ولاردىڭ سانى 200 دەن استى. بۇل فەرمالار ناقتى ەگىنشىلىك، دروندار، سەنسورلار مەن GPS جۇيەلەرىن كەڭىنەن قولدانا وتىرىپ، توپىراق پەن داقىلداردىڭ جاي-كۇيى تۋرالى مالىمەتتەردى ناقتى ۋاقىت رەجيمىندە جيناۋعا، تۇقىم سەبۋ، تىڭايتقىش ەنگىزۋ جانە سۋارۋ ۇدەرىستەرىن وڭتايلاندىرۋعا مۇمكىندىك بەرەدى، - دەپ جازادى ۆەدومستۆو ماماندارى.
ماسەلەن، سولتۇستىك قازاقستان جانە قوستاناي وبلىستارىندا ەگىستىكتى سپۋتنيكتىك مونيتورينگ ارقىلى باسقارۋ، اگروحيميالىق تالداۋ جانە ءدال نۇكتەلىك تىڭايتقىش ەنگىزۋ جۇيەلەرى كەڭىنەن قولدانىلادى.
جەتىسۋ جانە شىعىس قازاقستان وبلىستارىندا مال شارۋاشىلىعىندا جاساندى ينتەللەكتپەن جابدىقتالعان ساۋۋ روبوتتارى، اۆتوماتتاندىرىلعان ازىقتاندىرۋ جۇيەلەرى جانە ميكروكليماتتى باقىلاۋ شەشىمدەرى ەنگىزىلگەن.
پاۆلودار وبلىسىندا ىلعال ۇنەمدەۋشى تەحنولوگيالار مەن اۆتوماتتاندىرىلعان سۋارۋ جۇيەلەرى ىسكە قوسىلدى.
مال باعۋعا ارنالعان دروندار، GPS ترەكەرلەر، ەلەكتروندى كارتالار جانە وتاندىق باسقارۋ پلاتفورمالارى قولدانىستا. كەي وڭىرلەردە پيلوتسىز تەحنيكالار دا سىناقتان ءوتىپ جاتىر.
- شارۋالار سوڭعى جىلدارى GPS جانە اۆتوپيلوت جۇيەلەرىمەن جابدىقتالعان تراكتورلار جانە وزدىگىنەن جۇرەتىن ەگىن جيناۋ كومبايندارى دجوندير، كلااس سياقتى زاماناۋي اۋىل شارۋاشىلىعى تەحنيكاسىن كەڭىنەن قولدانا باستادى. قازىر شارۋالار تراكتور- بەسپيلوتنيك سياقتى زاماناۋي، سيفرلىق تەحنولوگيالاردى قولدانا باستادى. مۇنداي تەحنيكالار ءدال ەگىنشىلىك اياسىندا قولدانىسقا ەنىپ جاتىر. بۇل تەحنيكالار ەگىس جۇمىستارىنىڭ دالدىگىن ارتتىرىپ، شىعىنداردى ازايتۋعا جانە ونىمدىلىكتى كوتەرۋگە مۇمكىندىك بەرەدى. سيفرلىق تەحنولوگيالاردى ەنگىزۋ اسىرەسە ەلىمىزدىڭ سولتۇستىك وڭىرلەرىندە قارقىندى ءجۇرىپ جاتىر. بۇدان بولەك، وتاردى ناقتى ۋاقىت رەجيمىندە باقىلاۋ جانە مال جايۋ كەزىندە تۋىنداۋى مۇمكىن ماسەلەلەرگە جەدەل ارەكەت ەتۋ - مۇنىڭ ءبارى مالشى دروندارعا مۇمكىندىك بەرەدى. قازاقستاندا ولاردى ماڭعىستاۋ، باتىس قازاقستان جانە جامبىل وبلىستارىندا پايدالانا باستادى، - دەپ جازىلعان جاۋاپتا.
ايتا كەتەيىك، جەتىسۋ وبلىسى بالپىق اۋىلىندا سيفرلىق ءسۇت تاۋار فەرماسى جۇمىس ىستەپ جاتىر. ازىرگە ول وڭىردەگى سيفرلىق جالعىز فەرما.
- ءسۇت تاۋار فەرماسىندا ساۋىن تابىنىنا روبوت كۇتىم جاسايدى. ونىڭ ارقاسىندا مال وتە ىڭعايلى جاعدايدا ۇستالادى. سيىرلاردىڭ دەنى ساۋ جانە مول ءسۇت بەرۋى ءۇشىن ءارقايسىسىنىڭ جاعدايىن سوڭعى سيفرلىق تەحنولوگيالاردىڭ كومەگىمەن تاۋلىك بويى باقىلايدى، - دەپ حابارلادى جەتىسۋ وبلىسى اكىمدىگىنەن.
ءسۇتتى باعىتتاعى ءىرى قارا فەرما بولمەسىندە ەركىن قوزعالادى جانە ءوزى ساۋۋ اپپاراتىنا كەلەدى.
مۇندا ساۋىنشى روبوت جانۋاردىڭ فيزيولوگيالىق جاعدايىن انىقتايدى جانە ءسۇتتىڭ مولشەرى مەن ساپاسىن قوسا العاندا بارلىق اقپارات مونيتوردا كورىنەدى.
روبوت تولىعىمەن اۆتوماتتاندىرىلعان. سيىردى ساۋۋ كەرەك پە، جوق پا، قۇرىلعىنىڭ ءوزى انىقتايدى.
ساۋعاننان كەيىن مىندەتتى تۇردە دەزينفەكتسيا پروتسەدۋراسىن جۇرگىزەدى. فەرماداعى مۇنداي روبوتتار سانى - 10.
2024 -جىلى اۋىلشارۋاشىلىق سالاسىندا 280,3 ميلليارد تەڭگەگە 287 ينۆەستيتسيالىق جوبا ىسكە اسىرىلدى، بيىل 614,5 ميلليارد تەڭگەنىڭ 284 جوباسى قولعا الىنعان.
وسىعان دەيىن اۋىل شارۋاشىلىعى ونىمدەرى اراسىنداعى ءوزارا ساۋدا كورسەتكىشى Y عا ارتقانىن جازعانبىز.
ايتا كەتەيىك، قازاقستاندا اۋىل شارۋاشىلىعى ساناعىنىڭ باستالۋىنا ءبىر اي قالدى.
اۆتور
الما مۇقانوۆا