قازاقستاندا اۋىل شارۋاشىلىعى ساناعىنىڭ باستالۋىنا تۋرا ءبىر اي قالدى

استانا. KAZINFORM - بيىلعى 1- تامىزدا قازاقستاندا ۇلتتىق اۋىل شارۋاشىلىعى ساناعى باستالادى. بۇل اۋقىمدى ستاتيستيكالىق شارا رەسپۋبليكانىڭ بارلىق ءوڭىرىن قامتىپ، اۋىل شارۋاشىلىعىنىڭ جاي-كۇيى تۋرالى وزەكتى دەرەكتەردىڭ ماڭىزدى كوزىنە اينالادى.

ساناق ەكى كەزەڭدە وتەدى جانە 2025 -جىلدىڭ 20-قازانىنا دەيىن جالعاسادى:

ونلاين كەزەڭ - 1-31-تامىز ارالىعىندا: وسىمدىك جانە مال شارۋاشىلىعىمەن، بالىق وسىرۋمەن اينالىساتىن زاڭدى تۇلعالار، جەكە كاسىپكەرلەر، شارۋا جانە فەرمەر قوجالىقتارى، سونداي-اق ءۇي شارۋاشىلىقتارى قاتىسۋى ءتيىس. ساۋالناما sanaq.gov.kz سايتىندا وتەدى.

وفلاين- كەزەڭ - 20- قىركۇيەك-20-قازان ارالىعىندا: ينتەرۆيۋەرلەر ونلاين ساۋالنامادان ءوتىپ ۇلگەرمەگەن، باۋ- باقشاسى بار نەمەسە مال ۇستايتىن ۇيلەردى ارالايدى.

- ءبىز بارلىق اۋىل شارۋاشىلىعى تاۋارىن وندىرۋشىلەرگە، فەرمەرلەرگە جانە اۋىل تۇرعىندارىنا ۇندەۋ جولدايمىز. اۋىل شارۋاشىلىعى ساناعىنا قاتىسۋ -جاي عانا فورمالدى ءراسىم ەمەس، بۇل ەلىمىزدىڭ اگرارلىق سالاسىنىڭ ەرتەڭىنە قوسقان ۇلەس. تەك تولىق ءارى ناقتى دەرەكتەر عانا مەملەكەتتىك قولداۋدى دۇرىس باعىتتاپ، اۋىلدىڭ ينفراقۇرىلىمىن دامىتۋعا جانە اۋىل شارۋاشىلىعى مەن ازىق- تۇلىك ساياساتىن ءتيىمدى جۇرگىزۋگە مۇمكىندىك بەرەدى، - دەپ اتاپ ءوتتى ۇلتتىق ستاتيستيكا بيۋروسىنىڭ باسشىسى ماقسات تۇرلىبايەۆ.

ساناقتا 2 ميلليونعا جۋىق ءۇي شارۋاشىلىعىن جانە 300 مىڭنان استام اۋىل شارۋاشىلىعى تاۋارىن وندىرۋشىلەردى قامتۋ جوسپارلانعان. بۇكىل ەل بويىنشا ساۋالناما جۇرگىزۋ ءۇشىن 3500 دەن استام ينتەرۆيۋەر تارتىلادى.

ازاماتتارعا ىڭعايلى بولۋ ءۇشىن اۋىلدىق اكىمدىكتەر مەن اۋداندىق ستاتيستيكا بولىمدەرىندە ينتەرنەتكە قوسىلعان وزىنە- ءوزى قىزمەت كورسەتۋ ايماقتارى بولادى. سونداي- اق ازاماتتار 1446 بايلانىس ورتالىعىنا حابارلاسىپ كەڭەس الا الادى.

- اگرارلىق سالانىڭ بارلىق قاتىسۋشىلارىن ساناقتان ءوتىپ، اۋىل شارۋاشىلىعىن دامىتۋعا ۇلەس قوسۋعا شاقىرامىز، - دەپ جازدى ستاتبيۋرودان.