قازاقستاندا اپتا ىشىندە بولعان كادرلىق تاعايىنداۋلار

استانا. KAZINFORM - ءوتىپ بارا جاتقان اپتا ىشىندە مەملەكەت باسشىسىنىڭ جارلىعىمەن ءبىرقاتار ەلدەگى قازاقستاننىڭ توتەنشە جانە وكىلەتتى ەلشىلەرى تاعايىندالدى. سونداي-اق ورتالىق جانە جەرگىلىكتى بيلىكتە دە ءبىرقاتار كادرلىق اۋىس-ءتۇيىس بولدى.

اتاپ ايتقاندا، مەملەكەت باسشىسىنىڭ جارلىقتارىمەن: الماس سەيتاقىنوۆ قازاقستان رەسپۋبليكاسىنىڭ موڭعولياداعى توتەنشە جانە وكىلەتتى ەلشىسى؛ سەرگەي الەكساندروۆيچ ۆيكتوروۆ قازاقستان رەسپۋبليكاسىنىڭ شري-لانكا دەموكراتيالىق سوتسياليستىك رەسپۋبليكاسىنداعى توتەنشە جانە وكىلەتتى ەلشىسى؛ قازاقستان رەسپۋبليكاسىنىڭ شۆەتسيا كورولدىگىندەگى توتەنشە جانە وكىلەتتى ەلشىسى ولجاس مۇحامەدعالىم ۇلى سۇلەيمەنوۆ قازاقستان رەسپۋبليكاسىنىڭ دانيا كورولدىگىندەگى توتەنشە جانە وكىلەتتى ەلشىسى قىزمەتىن قوسا اتقارۋشى لاۋازىمىنا تاعايىندالدى.

مەملەكەت باسشىسىنىڭ وكىمدەرىمەن: تيمۋر ميفتاح ۇلى جانتيكين مەن اسەت كەڭەسبەك ۇلى ماحامبەتوۆ قازاقستان رەسپۋبليكاسىنىڭ اتوم ەنەرگياسى جونىندەگى اگەنتتىگى ءتوراعاسى قىزمەتىنە تاعايىندالدى.

سونىمەن قوسا سەرگەي لي اۋىل شارۋاشىلىعى مينيسترلىگىنىڭ اپپارات باسشىسى بولدى.

سەرگەي ميحايلوۆيچ لي 1973 -جىلى دۇنيەگە كەلگەن. سانكت-پەتەربۋرگتەگى ر ف ءى ءى م ىشكى اسكەرلەرىنىڭ جوعارى اسكەري كوماندالىق ۋچيليشەسىن «قۇقىقتانۋ» ماماندىعى بويىنشا، سونداي-اق قازاق- رەسەي حالىقارالىق ۋنيۆەرسيتەتىن «ەسەپ جانە اۋديت» ماماندىعى بويىنشا ءتامامداعان. زاڭ عىلىمدارىنىڭ كانديداتى.

ەڭبەك جولىن بانك سالاسىندا باستاعان. «كازاگروپرومبانك» ا ق اقتوبە وبلىستىق فيليالىندا جانە «كازكوممەرتسبانك» ا ق اقتوبە فيليالىندا زاڭگەر بولىپ جۇمىس ىستەگەن. سالىق قىزمەتى ورگاندارىندا قىزمەت اتقارعان: باس مامان، قۇقىقتىق قامتاماسىز ەتۋ ءبولىمىنىڭ باستىعى، اقتوبە وبلىسى سالىق دەپارتامەنتىنىڭ قۇقىقتىق قامتاماسىز ەتۋ باسقارماسىنىڭ باستىعى، سونداي-اق اقتوبە قالاسىنىڭ سالىق باسقارماسىن باسقارعان. اقتوبە وبلىسى بويىنشا سوت اكتىلەرىن ورىنداۋ دەپارتامەنتىن باسقارعان، ق ر جەكە سوت ورىنداۋشىلارى رەسپۋبليكالىق پالاتاسىنىڭ باسقارما ءتوراعاسى قىزمەتىن اتقارعان، 2019 -جىلدىڭ قىركۇيەگىنەن باستاپ اقتوبە قالاسى اكىمىنىڭ ورىنباسارى، ساۋدا جانە ينتەگراتسيا مينيسترلىگىنىڭ زاڭ قىزمەتى دەپارتامەنتىنىڭ ديرەكتورى لاۋازىمدارىن اتقارعان. جاڭا قىزمەتكە تاعايىندالعانعا دەيىن «QazExpoCongress» ۇ ك» ا ق باسقارما ءتوراعاسىنىڭ ورىنباسارى قىزمەتىن اتقاردى.

ەلوردا اكىمىنىڭ ورىنباسارى بولىپ 38 جاستاعى ءىلياس باعداۋلەتوۆ تاعايىندالدى.

ول 2010-2020 -جىلدار ارالىعىندا مەملەكەتتىك قۇرىلىمداردا ءتۇرلى قىزمەتتەر اتقارعان. 2020 -جىلدىڭ ماۋسىمىنان 2022 -جىلدىڭ قاڭتارىنا دەيىن استانا قالاسى اكىمىنىڭ كەڭەسشىسى بولدى. كەيىنگى جىلدارى مەملەكەتتىك قۇرىلىمداردا ءتۇرلى قىزمەتتەردە ەڭبەك ەتكەن.

بۇعان دەيىن اقتوبە وبلىستىق ءدىن ىستەرى باسقارماسىندا باسشى بولعان الىمبەك تۇراليەۆ جاڭا قىزمەتكە اۋىستى.

الىمبەك تۇراليەۆ اقتوبە وبلىسىندا دۇنيەگە كەلگەن. ق. جۇبانوۆ اتىنداعى اقتوبە مەملەكەتتىك ۋنيۆەرسيتەتىن «مەملەكەتتىك جانە جەرگىلىكتى باسقارۋ»، 2019 -جىلى - قازاق- ورىس حالىقارالىق ۋنيۆەرسيتەتىن «قۇقىق تانۋ» ماماندىقتارى بويىنشا ءتامامداعان. ەڭبەك جولىن 2008 -جىلى اقتوبە قالالىق ىشكى ساياسات ءبولىمىنىڭ جەتەكشى مامانى بولىپ باستاعان.

2011-2013 -جىلدارى ارالىعىندا اقتوبە قالالىق ەكونوميكا جانە بيۋدجەتتىك جوسپارلاۋ ءبولىمىنىڭ ەكونوميكالىق جوسپارلاۋ جانە ەسەپ سەكتورىنىڭ باس مامانى، 2013-2015 -جىلدارى ارالىعىندا اقتوبە قالالىق ىشكى ساياسات ءبولىمىنىڭ قۇقىقتىق- ۇيىمداستىرۋ سۇراعى بويىنشا جاستار ساياساتى جانە قوعامدىق بىرلەستىكتەرمەن جۇمىس جونىندەگى سەكتور مەڭگەرۋشىسى بولدى. ال 2015-2019 -جىلدارى ارالىعىندا اقتوبە وبلىسى اكىمى اپپاراتىنىڭ ءتۇرلى لاۋازىمدارىندا جۇمىس ىستەدى. 2019 -جىلدان 2025 -جىلدىڭ اقپان ايىنا دەيىن اقتوبە وبلىسىنىڭ ءدىن ىستەرى باسقارماسىنىڭ باسشىسى قىزمەتىن اتقاردى.

سونىمەن قاتار جەتىسۋ وبلىسى اكىمىنىڭ وكىمىمەن اسقار مارات ۇلى سادىقوۆ جەتىسۋ وبلىسىنىڭ دەنساۋلىق ساقتاۋ باسقارماسىنىڭ باسشىسى بولىپ تاعايىندالدى.

اسقار مارات ۇلى سادىقوۆ 1981 -جىلى تۋعان. جوعارى ءبىلىمدى. قازاق ۇلتتىق مەديتسينا ۋنيۆەرسيتەتىن ۋرولوگ دارىگەر ماماندىعى بويىنشا بىتىرگەن.

ەڭبەك جولىن الماتى مەملەكەتتىك دارىگەرلەردى جەتىلدىرۋ ينستيتۋتىندا ۋرولوگيا ماماندىعى بويىنشا ورديناتۋرادا باستادى.

ءار جىلداردا الماتى قالاسىنىڭ ورتالىق قالالىق كلينيكالىق اۋرۋحاناسىندا ۋرولوگ دارىگەر، «اكادەميك ب. جاربوسىنوۆ اتىنداعى ۋرولوگيا عىلىمي ورتالىعى» ا ق كىشى عىلىمي قىزمەتكەرى، ۋرولوگ دارىگەرى، وپەراتسيا بلوگىنىڭ مەڭگەرۋشىسى، جالپى ۋرولوگيا ءبولىمى مەڭگەرۋشىسىنىڭ مىندەتىن اتقارۋشى، «استانا قالاسىنداعى ۇلتتىق عىلىمي مەديتسينالىق ورتالىعى» ا ق ۋرولوگيا، حريرۋرگيا بولىمدەرىنىڭ ۋرولوگ دارىگەرى، «تالدىقورعان قالالىق كوپسالالى اۋرۋحاناسى» ش ج ق م ك ك ۋرولوگيا ءبولىمىنىڭ مەڭگەرۋشىسى، ديرەكتوردىڭ ەمدەۋ ءىسى جونىندەگى ورىنباسارى، «كوكسۋ اۋدانىنىڭ ورتالىق اۋداندىق اۋرۋحاناسى» ش ج ق م ك ك ديرەكتورى قىزمەتتەرىن اتقاردى.

2022 -جىلدىڭ قىركۇيەگىنەن «تالدىقورعان قالالىق كوپسالالى اۋرۋحاناسى» ش ج ق م ك ك ديرەكتورى بولعان.

سەمەي قالاسى اكىمىنىڭ ورىنباسارى بولىپ ازامات ساليمبايەۆ تاعايىندالدى. ازامات سەرىكبول ۇلى 1985 -جىلى اباي وبلىسى بەسقاراعاي اۋدانىندا دۇنيەگە كەلگەن. 2007 -جىلى ح. دوسمۇحامەدوۆ اتىنداعى اتىراۋ ۋنيۆەرسيتەتىن «ەكونوميكا»، 2024 -جىلى ق ر پرەزيدەنتى جانىنداعى مەملەكەتتىك باسقارۋ اكادەمياسى «ەكونوميكا» ماگيسترى رەتىندە ءتامامدادى.

ەڭبەك جولىن 2007 -جىلى اتىراۋ وبلىسى ەنەرگەتيكا جانە كوممۋنالدىق شارۋاشىلىق دەپارتامەنتىندە قارجى ءبولىمىنىڭ باس مامانى رەتىندە باستادى.

2008-2014 -جىلدارى قازاقستان رەسپۋبليكاسى ەكونوميكا جانە بيۋدجەتتىك جوسپارلاۋ مينيسترلىگىندە كولىك، ونەركاسىپ جانە وتىن-ەنەرگەتيكا سالاسىنداعى بيۋدجەتتىك جوسپارلاۋ باعىتىندا ساراپشى، باس ساراپشى جانە باسقارما باسشىسى قىزمەتتەرىن اتقاردى.

2014-2020 -جىلدارى قارجى مينيسترلىگىنىڭ قۇرىلىمدارىندا وتىن- ەنەرگەتيكالىق كەشەننىڭ بيۋدجەتىن جوسپارلاۋ سالاسىندا باسقارۋشىلىق قىزمەتتە بولدى.

2020-2025 -جىلدارى اتىراۋ وبلىسى اكىمدىگىندە ءبىرقاتار جاۋاپتى لاۋازىمدى اتقاردى. اتاپ ايتقاندا، ەكونوميكا جانە بيۋدجەتتىك جوسپارلاۋ باسقارماسىن، قارجى باسقارماسىن جانە مەملەكەتتىك ساتىپ الۋ جانە كوممۋنالدىق مەنشىك باسقارماسىن باسقاردى.

توكيو وليمپياداسىنىڭ قولا جۇلدەگەرى دارحان ءاسادىلوۆ كاراتەدەن قازاقستان ۇلتتىق قۇراماسىنىڭ باس باپكەرى اتاندى.

قازاقستان كاراتە فەدەراتسياسىنان ءمالىم ەتكەنىندەي، دارحان كاسىبي سپورتتا ايتۋلى تابىسقا قول جەتكىزگەن. بۇل رەتتە توكيو وليمپياداسىنداعى (-60 ك گ) قولا جۇلدەنى، الەم چەمپيوناتىنىڭ كۇمىسى (2008) مەن قولاسىن (2018)، گۋاڭجوۋداعى ازيا ويىندارىنىڭ التىنىن اتاپ ايتۋعا بولادى.

سونداي-اق ول - سپورتتىڭ وسى تۇرىندەگى ەڭ بەدەلدى جارىس Karate-1 پرەمەر-ليگا باسەكەسىنىڭ 8 دۇركىن جەڭىمپازى.

دارحان ءاسادىلوۆ وسىعان دەيىن شىمكەنت قالاسىنداعى سپورت مەكتەبىندە جانە قازاقستان جاستار قۇراما كومانداسىندا جاتتىقتىرۋشى بولدى.

قۋانىش قابدولوۆ «اتىراۋ» فۋتبول كلۋبى باس باپكەرىنىڭ مىندەتىن اتقارۋشى بولىپ بەكىتىلدى.

37 جاستاعى جەرگىلىكتى مامان 2009-2012 -جىلدار ارالىعىندا «اتىراۋدىڭ» جاستار كومانداسىندا باس باپكەردىڭ كومەكشىسى بولىپ ەڭبەك ەتتى.

2013 -جىلى «اتىراۋ» فۋتبول ورتالىعىنىڭ باسشىسى بولىپ تاعايىندالىپ، ونىڭ تۇسىندا 1999 -جىلعى جاسوسپىرىمدەر كومانداسى قازاقستان بىرىنشىلىگىندە جەڭىمپاز اتاندى.

2014-2020 -جىلدار ارالىعىندا قۋانىش كەنجالى ۇلى «اتىراۋ» نەگىزگى كومانداسىنىڭ باپكەرلىك شتابىندا قىزمەت ەتىپ، باس باپكەر كومەكشىسى جانە باس جاتتىقتىرۋشى مىندەتىن اتقاردى. سول ۋاقىتتا «مۇنايشىلار» ەكى مارتە قازاقستان كۋبوگىنىڭ فينالىنا (2017 جانە 2019 -جىلدارى) شىقتى.

كەيىننەن ول 2021-2022 -جىلدار ارالىعىندا تۇركىستاندىق «تۇراننىڭ» باس باپكەرىنە كومەكتەسىپ، سودان سوڭ كوماندا تىزگىنىن ءوزى دە ۇستادى.

ال بىلتىرعى ماۋسىمدا اقتاۋلىق «كاسپيدىڭ» باس باپكەرى رەتىندە ءبىرىنشى ليگانىڭ قولا مەدالىن جەڭىپ الدى. جاس مامان بيىل «اتىراۋ» QJL كوماندالارىنىڭ ۇيلەستىرۋشىسى رەتىندە قىزمەت اتقاردى.

بۇعان دەيىن سەرىك ساپيەۆ ۇلتتىق سۋردليمپيادا كوميتەتىنىڭ پرەزيدەنتى بولىپ سايلانعانى بەلگىلى بولدى.

ايتا كەتەيىك، جاقىندا Kazinform اگەنتتىگى جاڭا «مالىمەت» جوباسىن ىسكە قوستى. «مالىمەت» - قازاقستاننىڭ مەديانارىعىندا العاش رەت ۇسىنىلعان جاڭا ايدار، وندا ساياسات، ەكونوميكا، بيزنەس، عىلىم، مادەنيەت سەكىلدى ءتۇرلى سالادا ەل دامۋىنا ەلەۋلى ۇلەس قوسقان تانىمال قازاقستاندىقتاردىڭ ءومىربايانى مەن قىزىقتى مالىمەتتەرى جاريالانادى.

اۆتور

مارلان جيەمباي