قازاقستاندا اسكەري ۇشاقتاردى كوممەرتسيالىق ماقساتتا قولدانۋعا رۇقسات بەرمەك
استانا. KAZINFORM - قورعانىس مينيسترلىگى اسكەري- كولىك اۆياتسياسىن كوممەرتسيالىق جانە وزگە دە ماقساتتا پايدالانۋ بويىنشا زاڭنامالىق شارالار كەشەنىن ازىرلەدى. قۇجات جوباسى «اشىق ن ق ا» پورتالىندا جاريالاندى.
قازاقستان زاڭناماسىندا مەملەكەت مەنشىگىندەگى اۆياتسيانى حالىقارالىق ازاماتتىق اۆياتسيا ۇيىمىنىڭ ستاندارتتارى مەن ۇسىنىلاتىن پراكتيكاسىنا سايكەس اقىلى نەگىزدە پايدالانۋعا مۇمكىندىك بەرەتىن نورما جوق.
بۇگىندە ءبىرقاتار ەلدە، ونىڭ ىشىندە ۇلى بريتانيا، كورەيا، گەرمانيا، تۇركيا، مىسىر، رەسەي جانە بەلارۋستىڭ تاجىريبەسى اسكەري- كولىك اۆياتسياسىنىڭ ازاماتتىق ماقساتتا ءتيىمدى قولدانىلۋ مۇمكىن ەكەنىن كورسەتىپ وتىر.
وسى ورايدا جاڭا جوبادا شەكتەۋدى الىپ تاستاپ، مەملەكەتتىك اۆياتسيانى اقىلى نەگىزدە پايدالانۋعا زاڭنامالىق دەڭگەيدە مۇمكىندىك بەرۋ ۇسىنىلادى. دەگەنمەن اسكەري ۇشاقتاردى پايدالانۋ اسكەري بولىمشەلەردىڭ جاۋىنگەرلىك دايىندىعى مەن جاۋىنگەرلىك قابىلەتىنە نۇقسان كەلتىرمەۋى ءتيىس.
قۇجاتقا سايكەس، ءقازىر قازاقستان قارۋلى كۇشتەرى اسكەري-كولىك اۆياتسياسىنىڭ 15 اۋە كەمەسىن پايدالانىپ وتىر. ولاردى جوندەۋ مەن قىزمەت كورسەتۋگە جىل سايىن مەملەكەتتىك بيۋدجەتتەن شامامەن 7 ميلليارد تەڭگە بولىنەدى. الايدا، بولىنەتىن قارجى كولەمى تەحنيكانىڭ توزعان ۇلگىلەرىن ۋاقتىلى اۋىستىرۋعا مۇمكىندىك بەرمەيدى.
- جۇرگىزىلگەن تالداۋ كورسەتكەندەي، ازاماتتىق سەكتوردا جۇك تاسىمالىن قيىن، قولجەتىمسىز وڭىرلەر مەن جەرگىلىكتى قاقتىعىس ايماقتارىنا جەتكىزەتىن تەتىكتەر جوق. ۇسىنىلىپ وتىرعان نورمالاردى ەنگىزۋدىڭ كۇتىلەتىن ناتيجەسىندە، اسكەري اۆياتسيانى قولدانۋ اياسىن كەڭەيتۋ، ونىڭ جۇكتەمەسىن ارتتىرۋ، لوگيستيكا سالاسىنداعى بيزنەسكە قولداۋ كورسەتۋ، بيۋدجەتكە تۇسەتىن جۇكتەمەنى ازايتۋ جانە اۆياتسيانى جوندەۋ مەن دامىتۋعا قوسىمشا قارجى كوزدەرىن تابۋ مۇمكىندىگى بار، - دەلىنگەن قۇجات جوباسىندا.
سونداي-اق جاڭا قۇجات جوباسىندا مەملەكەتتىك اۆياتسيانى باسقا مەملەكەتتىك ورگانداردىڭ مۇددەسى ءۇشىن، ونىڭ ىشىندە ەلدەن تىس جەرلەردە دە پايدالانۋ مۇمكىندىگى قاراستىرىلعان. ودان بولەك وسى مامىردا جوبانى ادىلەت مينيسترلىگىنە الدىن الا قورىتىندى الۋ ءۇشىن جولداۋ جوسپارلانىپ وتىر. 2026 -جىلعى شىلدەدە قوعامدىق تىڭداۋلار وتەدى، ال 2026 -جىلعى جەلتوقساندا زاڭ جوباسى پارلامەنت ماجىلىسىنە ەنگىزىلەدى.