قازاقستاندا العاشقى جاساندى ينتەللەكت مەكتەبى اشىلدى

استانا. KAZINFORM - قازاقستان رەسپۋبليكاسىنىڭ پرەزيدەنتى باستاماسىمەن جاساندى ينتەللەكت پەن سيفرلاندىرۋدى دامىتۋ اياسىندا Astana Hub حالىقارالىق تەحنوپاركى العاشقى جاساندى ينتەللەكت مەكتەبى - Tomorrow School-دى ىسكە قوسادى.

بۇل جوبا 2025-جىلى مەكتەپ وقۋشىلارى، ستۋدەنتتەر، زەرتتەۋشىلەر مەن كاسىپكەرلەردىڭ باسىن قوساتىن ۇلتتىق جاساندى ينتەللەكت ورتالىعىن قۇرۋدىڭ باستاماسى بولماق. بۇل تۋرالى Astana Hub باسپا ءسوز قىزمەتى ءمالىم ەتتى.

Tomorrow School - ءبىلىم بەرۋ سالاسىندا الەمگە تانىلعان جاڭاشىل پەداگوگ نيكولاس ساديراك ازىرلەگەن 01 Edu پلاتفورماسىندا يننوۆاتسيالىق peer-to-peer وقىتۋ جۇيەسىن پايدالاناتىن بىرەگەي جاساندى ينتەللەكت مەكتەبى. مەكتەپ ءبىلىم الۋشىلار اراسىنداعى تاجىريبەگە نەگىزدەلگەن ءوزارا بايلانىسقا باسىمدىق بەرىپ، باعدارلامالاۋ داعدىلارىن نولدەن باستاپ ۇيرەتەدى. مۇنداي باعدارلامالار بويىنشا وقىعان تۇلەكتەردىڭ � دان استامى كۋرستى اياقتاعاننان كەيىن جۇمىسقا ورنالاسىپ، ءادىستىڭ تيىمدىلىگىن ايشىقتادى.

Tomorrow School-دىڭ وقىتۋ ەرەكشەلىكتەرى:

مۇعالىمدەر مەن ءداستۇرلى ساباقتار جوق - وقىتۋ ستۋدەنتتەردىڭ ءوزارا كومەگى مەن توپتىق جۇمىسىنا نەگىزدەلگەن؛

بارلىق ستۋدەنتتە استانا قالاسىنداعى Astana Hub تەحنوپاركى الاڭىندا وففلاين فورماتتا تەگىن وقۋ مۇمكىندىگى بار؛

مەكتەپ تاۋلىك بويى (24/7) جۇمىس ىستەيدى، ستۋدەنتتەر وزدەرىنە ىڭعايلى وقۋ كەستەسىن قۇرادى؛

وقۋعا ءتۇسۋ ءۇشىن باعدارلامالاۋ بويىنشا الدىن الا تاجىريبە تالاپ ەتىلمەيدى.

ىرىكتەۋ ۇمىتكەرلەردىڭ لوگيكالىق ويلاۋىن تەكسەرەتىن 2 ونلاين ويىننان جانە «باسسەين» دەپ اتالاتىن وقىتۋدىڭ كىرىسپە كەزەڭىنە تىكەلەي قاتىسۋدى كوزدەيتىن بولىمنەن تۇرادى. ءبىرىنشى «باسسەين» 21-قازان – 17-قاراشا ارالىعىندا وتەدى، مۇندا قاتىسۋشىلار باعدارلامالاۋ الەمىنە تەرەڭىرەك بويلاپ، وقۋدى جالعاستىرۋ ءۇشىن ءوز مۇمكىندىكتەرىن باعالايدى.

«باسسەيننەن» وتكەننەن كەيىن قاتىسۋشىلار 18 ايلىق نەگىزگى وقىتۋعا كوشەدى. بۇل كەزەڭدە ولار 50 دەن استام جوبانى جۇزەگە اسىرىپ، Golang ،Rust ،JavaScript ،Python جانە باسقا دا 20 دان استام باعدارلامالاۋ ءتىلىن مەڭگەرەدى. اقتىق مارەدە ستۋدەنتتەر مىنا ماماندىقتاردىڭ ءبىرىن تاڭداۋعا مۇمكىندىك الادى: ج ي-ينجەنەرى، باعدارلامالىق قامتاماسىز ەتۋدى ازىرلەۋشى، فۋلستەك-ازىرلەۋشى، ءموبيلدى قوسىمشالار ازىرلەۋشىسى، DevOps ينجەنەرى، IT جۇيەلەرىنىڭ ساۋلەتشىسى، كيبەرقاۋىپسىزدىك مامانى جانە بەينەويىندار ازىرلەۋشىسى. ال «باسسەين» بارىسىندا ۇزدىك ناتيجە كورسەتكەن وزگە قالادان كەلگەن قاتىسۋشىلاردا نەگىزگى وقۋ ۋاقىتىندا تۇرعىن ۇيمەن قامتىلۋ مۇمكىندىگى بار.

Tomorrow School دا وقۋ ءۇشىن 2024-جىلدىڭ 17-قازانىنا دەيىن tomorrow-school.ai پلاتفورماسىندا تىركەۋدەن ءوتۋ قاجەت.