قازاقستاندا العاش رەت ۆەتەريناريا قىزمەتكەرلەرى كۇنى اتالىپ وتەدى

استانا. KAZINFORM - بيىلدان باستاپ 10-شىلدە قازاقستاندا «ۆەتەريناريا قىزمەتكەرلەرى كۇنى» بولىپ بەكىتىلدى.

جاڭا مەرەكە جانۋارلاردىڭ دەنساۋلىعى مەن جانۋارلاردان الىناتىن ونىمدەردىڭ قاۋىپسىزدىگىن قامتاماسىز ەتۋگە باعا جەتپەس ۇلەس قوساتىن ۆەتەرينارلىق مامانداردىڭ ەڭبەگىنىڭ ماڭىزدىلىعىن اتاپ وتۋگە ارنالعان.

سوڭعى ونجىلدىقتا قازاقستان رەسپۋبليكاسىنىڭ ۆەتەريناريا قىزمەتى ۆەتەريناريا جانە تاماق ونىمدەرى سالاسىنداعى تيىمدىلىك پەن قاۋىپسىزدىكتى ارتتىرۋعا باعىتتالعان ەلەۋلى وزگەرىستەردەن ءوتتى. 2011 -جىلى قۇرىلعان ق ر اۋىل شارۋاشىلىعى مينيسترلىگىنىڭ ۆەتەريناريالىق باقىلاۋ جانە قاداعالاۋ كوميتەتى وسى سالاداعى قىزمەتتى رەتتەيتىن جانە باقىلايتىن نەگىزگى ورگانعا اينالدى.

قازاقستاننىڭ ۆەتەريناريالىق قىزمەتى ا ش م ۆەتەريناريالىق باقىلاۋ جانە قاداعالاۋ كوميتەتىنەن، وڭىرلىك جانە اۋداندىق ينسپەكتسيالاردان، رەسپۋبليكالىق ەپيزووتياعا قارسى جاساقتان، رەسپۋبليكالىق ۆەتەريناريالىق زەرتحانادان، ۆەتەريناريا جونىندەگى ۇلتتىق رەفەرەنتتىك ورتالىقتان، سونداي-اق وبلىستىق ۆەتەريناريا باسقارمالارىنان، ۆەتەريناريالىق ستانسيالار مەن پۋنكتتەردەن تۇراتىن جەرگىلىكتى اتقارۋشى ورگانداردان تۇرادى.

كوميتەت 17 وبلىستا جانە رەسپۋبليكالىق ماڭىزى بار 3 قالادا اۋماقتىق ينسپەكسيالاردى، سونداي-اق 203 اۋداندىق ۆەتەريناريالىق ستانسيالاردى، 2334 اۋىلدىق وكرۋگتەردەگى ۆەتەريناريالىق پۋنكتتەردى قامتيدى. بۇل اۋىلدىق وكرۋگتەردەن باستاپ رەسپۋبليكالىق دەڭگەيگە دەيىن بارلىق دەڭگەيدە باقىلاۋ مەن قاداعالاۋدى قامتاماسىز ەتۋگە مۇمكىندىك بەرەدى.

ۆەتەريناريالىق باقىلاۋ جانە قاداعالاۋ كوميتەتىنىڭ نەگىزگى مىندەتتەرى - جانۋارلاردى اۋرۋلاردان قورعاۋ، حالىقتىڭ دەنساۋلىعىن ساقتاۋ، ۆەتەريناريالىق-سانيتاريالىق قاۋىپسىزدىكتى قامتاماسىز ەتۋ جانە قورشاعان ورتانىڭ لاستانۋىن بولدىرماۋ. ۆەتەريناريالىق پرەپاراتتار مەن جەمشوپتىڭ قاۋىپسىزدىگى مەن ساپاسىن باقىلاۋ قىزمەتتىڭ ماڭىزدى باعىتى بولىپ سانالادى.

مەرەكە قارساڭىندا ۆەتەريناريالىق باقىلاۋ جانە قاداعالاۋ كوميتەتى رەسپۋبليكا بويىنشا ءوزىنىڭ اۋماقتىق ينسپەكسيالارىمەن بىرلەسە وتىرىپ، حالىقتىڭ ۆەتەريناريالىق قاۋىپسىزدىك تۋرالى ءبىلىمىن ارتتىرۋعا باعىتتالعان اۋقىمدى شارالار ۇيىمداستىردى.

اتاپ ايتقاندا، ءىرى ساۋدا ورىندارىندا، كەدەندىك رەسىمدەۋ ورتالىقتارىندا، حالىقارالىق اۋەجايلاردا جانۋارلاردىڭ اسا قاۋىپتى اۋرۋلارىنىڭ الدىن الۋ، اۋىل شارۋاشىلىعى جانۋارلارىن بىردەيلەندىرۋ، ۆەتەرينارلىق-سانيتارلىق تالاپتار بويىنشا كەڭەستەر وتكىزىلدى.

كوميتەتتىڭ ۆەدومستۆولىق باعىنىستى ۇيىمدارى ۆەتەرينارلىق جانە عىلىمي قىزمەتتەردىڭ، دەنساۋلىق ساقتاۋ مينيسترلىگىنىڭ جانە حالىقارالىق ۇيىمداردىڭ وكىلدەرى ءۇشىن اشىق ەسىك كۇنىن وتكىزدى، شارا بارىسىندا زەرتحانالاردىڭ، ارنايى ماشينالاردىڭ جۇمىس پروتسەسىن كورسەتتى، وقۋ-ادىستەمەلىك ورتالىقتىڭ قىزمەتىمەن تانىستىردى.

اۆتور
اسحات رايقۇل