قازاقستاندا العاش رەت «ات سپورتىنداعى ۆەتەريناريا» ماماندىعى اشىلادى
الماتى. KAZINFORM - استانادا وتەتىن 5- دۇنيەجۇزىلىك كوشپەندىلەر ويىندارىنا دايىندىق اياسىندا قازاق ۇلتتىق اگرارلىق زەرتتەۋ ۋنيۆەرسيتەتىنىڭ بازاسىندا «قازاقستان رەسپۋبليكاسىندا ات سپورتى جانە ۇلتتىق جىلقى شارۋاشىلىعىنىڭ قازىرگى جاعدايى جانە دامۋ بولاشاعى» تاقىرىبىنداعى رەسپۋبليكالىق دوڭگەلەك ۇستەل ءوتتى.
جيىندا ق ر ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ ەلىمىزدە ۇلتتىق سپورت تۇرلەرى قارقىندى دامىپ كەلە جاتقانىن اتاپ ءوتتى.
«ات سپورتىندا جىلقىلاردىڭ ساۋلىعىن باقىلاۋ، راتسيونالدى ازىقتاندىرىلۋىن قاداعالاۋ، كۇتىپ-باپتاۋدى دۇرىس ۇيىمداستىرۋ جانە ينفەكتسيالىق اۋرۋلارعا قارسى ۋاقىتىلى ەكپە جاساۋ - تىكەلەي ۆەتەريناريالىق دارىگەرلەردىڭ مىندەتى. ات سپورتىن الەمدىك دەڭگەيگە شىعارۋ باعىتىندا كاسىبي مامانداردى، سونىڭ ىشىندە جىلقى باپتاۋ جونىندەگى ۆەتەرينارلاردى دايىنداۋدىڭ جەتىسپەۋى - كۇردەلى ماسەلەلەردىڭ ءبىرى بولىپ وتىر. وسىعان وراي، 2024-2025 وقۋ جىلىنان باستاپ، ءبىزدىڭ ۋنيۆەرسيتەتتە «ات سپورتىنداعى ۆەتەريناريا» ماماندارىن دايىنداۋ ەلىمىزدە ءبىرىنشى رەت جۇزەگە اسىرىلماق»، - دەدى اقىلبەك كۇرىشبايەۆ.
باس قوسۋدا ۇلتتىق جىلقى سپورتىن دامىتۋعا قاتىستى جيناقتالعان ۇسىنىستاردى جوعارى مەملەكەتتىك ورگاندار تاراپىنا جولداۋ تۋرالى شەشىم قابىلداندى.