قازاقستاندا اكىمدەر ءۇشىن ەكى جىل سىناق مەرزىمىن ەنگىزۋ ۇسىنىلدى
استانا. KAZINFORM - ءماجىلىس دەپۋتاتى باقىتجان بازاربەك اكىمدەر ءۇشىن ەكى جىلدىق سىناق مەرزىمىن ەنگىزۋدى ۇسىندى.
حالىق قالاۋلىسىنىڭ ايتۋىنشا، اتالعان مەرزىم اياقتالعاننان كەيىن ءوڭىر باسشىسىنىڭ جۇمىسى ناقتى ماكرو ەكونوميكالىق كورسەتكىشتەر بويىنشا باعالانۋى ءتيىس.
- ناتيجە بولماسا - اكىم قىزمەتىنەن كەتۋى كەرەك، سەبەبى بۇل - تيىمسىزدىك كورسەتكىشى. مەنىڭ ويىمشا، حالىق ءدال وسى راديكالدى ءتاسىلدى كۇتىپ وتىر، - دەيدى باقىتجان بازاربەك ماجىلىستە وتكەن ۇكىمەت ساعاتىندا.
ايتا كەتەيىك، بيىلدان باستاپ بارلىق اۋدان اكىمدەرىن حالىق تىكەلەي سايلايدى.
ەسكە سالا كەتسەك، شىعىس قازاقستان وبلىسىندا قالا مەن اۋدان اكىمدەرىنىڭ جۇمىسى KPI كورسەتكىشتەرى بويىنشا باعالانادى.
سونداي-اق بيىل ساۋىردە ەۋرازيالىق ينتەگراتسيا ينستيتۋتىندا اكىمدەردى تىكەلەي سايلاۋ ينستيتۋتىنىڭ دامۋى تالقىلاندى.
اۆتور
داۋلەت ىزتىلەۋ