قازاقستاندا ادامداردىڭ ءومىر ءسۇرۋ ۇزاقتىعى 74 جاستان استى

ەلىمىزدە جالپى ءولىم- ءجىتىم تومەندەدى. بۇل تۋرالى قازاقستاننىڭ ورنىقتى دامۋ سالاسىنداعى ۇلتتىق ماقساتتار مەن مىندەتتەردى ىسكە اسىرۋ مونيتورينگى جونىندەگى پارلامەنتتىك كوميسسيا وتىرىسىندا دەنساۋلىق ساقتاۋ ءمينيسترى اجار عينيات ايتتى، دەپ حابارلايدى قازاقپارات ءتىلشىسى.

"ۇلت دەنساۋلىعىن نىعايتۋ - مەملەكەتىمىزدىڭ ماڭىزدى مىندەتتەرىنىڭ ءبىرى. بىلتىردىڭ قورىتىندىسى بويىنشا باعدارلامالىق قۇجاتتاردى ىسكە اسىرۋ اياسىندا 2021 -جىلدىڭ قورىتىندىسىمەن سالىستىرعاندا ەلىمىزدە جالپى ءولىم- ءجىتىم 29 پايىزعا تومەندەدى. قان اينالىمى جۇيەسى اۋرۋلارىنان بولاتىن ءولىم 33 پايىزعا، قاتەرلى ىسىكتەن - 8 پايىزعا، ءتۇرلى جارادان 5 پايىزعا ازايدى. سونىمەن قاتار، انا ءولىمىنىڭ ايتارلىقتاي 3 ەسەدەن استام دەڭگەيدە تومەندەۋى بايقالدى. 2022 -جىلى نارەستە ءولىمىنىڭ دەڭگەيى 2021 -جىلدىڭ سايكەس كەزەڭىمەن سالىستىرعاندا 4,6 پايىزعا تومەندەدى»، - دەدى ا. عينيات.

ونىڭ ايتۋىنشا، حالىق دەنساۋلىعى كورسەتكىشتەرىندەگى وڭ وزگەرىستەر حالىقتىڭ ءومىر ءسۇرۋىنىڭ ورتاشا ۇزاقتىعى 74,44 جاسقا دەيىن وسۋىنە اسەر ەتتى. بۇل رەتتە، 2021 -جىلمەن سالىستىرعاندا بۇل كورسەتكىش 4 جىلعا ءوستى (2021 ج. - 70,23 -جىل).

«حالىقتى ساپالى دەنساۋلىق ساقتاۋ جۇيەسىمەن جانە جوعارى دەڭگەيىن قامتاماسىز ەتۋ جونىندەگى مىندەتتەر بىرىككەن ۇلتتار ۇيىمىنىڭ ورنىقتى دامۋىنىڭ ءۇشىنشى ماقساتىنا جاتادى. ورنىقتى دامۋ ماقساتتارى كورسەتكىشتەرىنىڭ ۇلتتىق تىزبەسى ازىرلەنىپ، قابىلداندى. ۇلتتىق تىزىمگە 30 ينديكاتور كىردى. ب ۇ ۇ 2023 -جىلى قازاقستان رەسپۋبليكاسىنداعى ورنىقتى دامۋدىڭ بارلىق 17 ماقساتىن باعالادى. № 3 ماقسات - دەنساۋلىق ساقتاۋ سالاسى بويىنشا. بۇل تۇرعىدا سالاداعى جاعداي «ورتاشا جاقساردى جانە سىن- قاتەرلەر ساقتالىپ تۇر» دەگەن باعا بەرىلدى»، - دەدى مينيستر.

ونىڭ سوزىنە قاراعاندا، ينديكاتورلارعا قول جەتكىزۋدى قامتاماسىز ەتۋ ءۇشىن مينيسترلىك نەگىزگى باعىتتار بويىنشا جۇمىس اتقاردى.

اۆتور

رۋسلان عابباسوۆ