قازاقستاندا اۋە رەيستەرىنىڭ كەشىگۋ ماسەلەسى قاشان شەشىلەدى

استانا. KAZINFORM - ق ر كولىك ۆيتسە-ءمينيسترى تالعات لاستايەۆ جاز ايلارىندا رەيستەردىڭ كەشىگۋى دەرەكتەرىنە قاتىستى تۇسىنىك بەردى.

«رەيستەردىڭ كەشۋى ءار مەملەكەتتەگى ءار كومپانيادا بولىپ جاتادى. بيىل بىزدەگى كورسەتكىش 77 پايىز شاماسىندا. باسقا مەملەكەتتەرمەن سالىستىرساق، ا ق ش-تا - 77 پايىز، ەۋروپادا 76 پايىزدى قۇرادى. جالپى، بيىل وسى كورسەتكىش تومەندەپ جاتىر. Boeing وندىرىسىندە، جاڭا ۇشاقتاردى اكەلۋدە پروبلەمالار بايقالدى. ماسەلەن، بيىل ءبىز 12 جاڭا بورتتى اۋە كومپانيالارىنا جەتكىزەمىز دەپ جوسپارلاعان ەدىك. قازىر ونىڭ تەك 8 ى كەلدى، ال جىل سوڭىنا دەيىن ءتورت ۇشاق جەتكىزىلەدى»، - دەدى ت. لاستايەۆ ەلوردادا اۋە كولىگى تاقىرىبىندا وتكەن باسپا ءسوز ءماسليحاتىندا.

ونىڭ ايتۋىنشا، تامىز ايىندا ەلىمىزدە بىرنەشە اۋەجاي جوندەۋگە جابىلعان. بۇل تۇرعىدا استانا اۋەجايى تۇندە جۇمىس ىستەمەيدى.

«سوندىقتان كۇندىزگى رەيس سانى كوبەيدى. اۋەجاي 24 ساعات بويى ءۇزىلىسسىز جۇمىس ىستەسە، ساعاتىنا 10-12 رەيس كەلەتىن. قازىر كۇندىز بۇل كورسەتكىش 20-25-كە كوبەيگەن»، - دەپ ءتۇسىندىردى ۆيتسە-مينيستر.

مۇنىمەن قوسا ول جاقىندا جاۋعان بۇرشاق ءبىراز ۇشاقتى زاقىمداعانىن ايتتى.

«قازاقستانداعى اۋە كومپانيالارىندا 101 ۇشاق بار، ونىڭ ىشىندە 10-ى ءتۇرلى سەبەپپەن تۇرىپ قالدى. بەسەۋى بۇرشاق جاۋعاندا زاقىمدالدى. قازىر سونىڭ ءبارى جوندەلدى. سول كەزدە رەيستەردىڭ كەشىگۋى كوبەيگەن ەدى. جالپى، اتالعان 10 ۇشاق رەيستەرگە كىرىستى. بۇدان بولەك، اقتوبە اۋەجايىندا ۇشۋ- قونۋ جولاعى جوندەلىپ جاتىر، سونداي-اق اقتاۋ اۋەجايىندا دا وسى جۇمىستار باستالدى. ەلىمىزدەگى اۋەجايلاردا جوندەۋ جۇمىستارى اياقتالعانان كەيىن، رەيستەردىڭ كەشىگۋى ماسەلەسى شەشىلەدى»، - دەدى تالعات لاستايەۆ.

بۇدان بۇرىن حابارلانعانداي كولىك ۆيتسە-ءمينيسترى ۆەتنامدىق كومپانيانىڭ Qazaq Air-دى ساتىپ الۋى ءراسىمى كۇزدە اياقتالاتىنىن راستادى.