قازاقستاندا 70 جاس ءوسپىرىم كولونيادا جازاسىن وتەپ ءجۇر
الماتى. KAZINFORM - ەلدە كامەلەت جاسىنا تولماعان 70 جاس ءوسپىرىم اباقتىدا وتىر. بۇل تۋرالى ىشكى ىستەر مينيسترلىگىنىڭ Kazinform ساۋالىنا جولداعان جاۋابىندا ايتىلعان.
ۆەدومستۆودان ءمالىم ەتكەندەي، ىشكى ىستەر مينيسترلىگى مۇددەلى مەملەكەتتىك ورگاندارمەن جانە قوعامدىق ينستيتۋتتارمەن بىرلەسىپ، مەملەكەت باسشىسىنىڭ تاپسىرماسى بويىنشا جاڭا ءبىرىڭعاي زاڭ ازىرلەپ جاتىر.
- اتالعان زاڭ جوباسىندا جاس وسپىرىمدەر اراسىنداعى قۇقىق بۇزۋدىڭ الدىن الۋعا جاۋاپتى سۋبەكتىلەردىڭ ءوزارا ءىس-قيمىلىنىڭ جاڭا فورماتى جان-جاقتى قاراستىرىلادى، - دەپ اتاپ ءوتتى مينيسترلىكتەن.
كامەلەتكە تولماعاندار اراسىندا پراكتيكالىق شارالار ۇنەمى جۇرگىزىلىپ وتىرادى. ءار وڭىردە بالالارعا قاتىستى زورلىق-زومبىلىق فاكتىلەرىنە دەن قويۋ بويىنشا ۆەدومستۆوارالىق موبيلدى توپتار قۇرىلعان.
قۇقىق بۇزۋدىڭ الدىن الۋدى جانە بالا قۇقىعىن قورعاۋدى كۇشەيتۋ ماقساتىندا بۇكىل وقۋ ورىندارىندا كەزدەسۋلەر ۇيىمداستىرىلادى.
- ماسەلەن، ءمينيستردىڭ تاپسىرماسىمەن رەسبۋليكا بويىنشا 10-ءساۋىر مەن 6-مامىر ارالىعىندا «جاس ءوسپىرىم» جەدەل-الدىن الۋ شاراسى ءوتتى. وعان 7,4 مىڭنان استام پوليتسيا قىزمەتكەرى، ءبىلىم ورگاندارىنىڭ 1500 وكىلى جۇمىلدىرىلدى. دەسە دە، كامەلەت جاسىنا تولماعاندار اراسىندا قىلمىس توقتار ەمەس. قازىر ەلىمىزدە جاس وسپىرىمدەر جازاسىن وتەيتىن ءبىر قونىس-كولونيا بار. وندا 70 تەن استام جاس ءوسپىرىم جازاسىن وتەپ جاتىر. كولونياعا نەگىزىنەن 16 جاستان باستاپ جونەلتەدى، - دەپ جازىلعان جاۋاپتا.
وسىعان دەيىن الماتى وبلىسىندا وقۋشى ءوز سىنىپتاسىن ءولتىرىپ تاستاعانىن جازعانبىز.