قازاقستاندا 32 مىڭعا جۋىق شەتەلدىك ستۋدەنت وقيدى
استانا. KAZINFORM - بيىل ەلىمىزدىڭ جوعارى وقۋ ورىندارىندا 31,5 مىڭ شەتەلدىك ستۋدەنت ءبىلىم الىپ جاتىر. بۇل تۋرالى Kazinform اگەنتتىگىنىڭ رەسمي ساۋالىنا عىلىم جانە جوعارى ءبىلىم مينيسترلىگىنىڭ رەسمي جاۋابىندا جازىلعان.
قازاقستان سوڭعى جىلدارى حالىقارالىق ءبىلىم بەرۋ ارەناسىندا ءوز پوزيتسياسىن نىعايتىپ كەلە جاتىر. 2022- 2023 -جىلدارى COVID-19 پاندەمياسى اسەرىنەن شەتەلدىك ستۋدەنتتەر سانى ۋاقىتشا ازايعانىمەن، جالپى كورسەتكىشتە ءوسىم بار.
- 2020 -جىلى كۇندىزگى بولىمدە - 28,1 مىڭ، 2021 -جىلى - 28,7 مىڭ، 2022 -جىلى - 26 مىڭ، 2023 -جىلى - 26,8 مىڭ شەتەلدىك ستۋدەنت ءبىلىم الدى. ال 2024 -جىلى بۇل كورسەتكىش كۇرت ءوسىپ، 31,5 مىڭعا جەتتى. بۇل - سوڭعى بەس جىلداعى ەڭ جوعارى كورسەتكىش، - دەلىنگەن جاۋاپتا.
مينيسترلىكتىڭ حابارلاۋىنشا، 2025 -جىلعى مالىمەتتەردى ەسەپتەۋ ءالى تولىق اياقتالماعان، سونىڭ وزىندە كورسەتكىشتە ءوسىم بارىن ايتۋعا بولادى.
ءبىر قىزىعى، سوڭعى 4 جىلدا ءۇندىستاننان كەلەتىن ستۋدەنتتەر سانى 3 ەسە ارتقان.
- شەتەلدىك ستۋدەنتتەر اراسىندا ەڭ كوبى - ءۇندىستاننان كەلگەندەر: 2024 -جىلى ولاردىڭ سانى 12020-عا جەتكەن. سالىستىرا كەتسەك، 2020 -جىلى بۇل كورسەتكىش 4340 بولعان. ولار كوبىنە مەديتسينا، اقپاراتتىق تەحنولوگيالار جانە ينجەنەريا باعىتتارىن تاڭدايدى، - دەلىنگەن حابارلامادا.
ەكىنشى ورىندا تۇرىكمەنستان تۇر. بۇل ەلدەن 2020 -جىلى - 2989. ال 2024 -جىلى 3962 ستۋدەنت كەلگەن.
قازاقستانعا وقۋعا كەلەتىن رەسەيلىك ستۋدەنتتەر سانى دا ارتقانى بايقالادى: 2020 -جىلى - 1176 بولسا، 2024 -جىلى - 3005. رەسەي ازاماتتارى ءۇشىن قازاقستاننىڭ جوعارى وقۋ ورىندارى قولجەتىمدىلىگىمەن، وقۋ باعدارلامالارىنىڭ ۇقساستىعىمەن جانە ديپلومداردىڭ ءوزارا مويىندالۋىمەن تارتىمدى.
سونداي-اق قىتايلىق ستۋدەنتتەر سانى دا ەكى ەسەگە ارتقان: 2020 -جىلى - 977 بولسا، 2024 -جىلى - 2089. ولار نەگىزىنەن تەحنيكالىق جانە ينجەنەرلىك ماماندىقتارعا قىزىعۋشىلىق تانىتادى.
ودان بولەك، پاكىستاننان كەلەتىن ستۋدەنتتەر سانى دا ايتارلىقتاي وسكەن: 2020 -جىلى - 107 بولسا، 2024 -جىلى - 1192. بۇل 11 ەسەدەن استام ءوسىم. بۇنداي قازاقستاننىڭ جوعارى وقۋ ورىندارى وڭتۇستىك ازيا ەلدەرىندە ءبىلىم بەرۋ باعدارلامالارىن بەلسەندى ناسيحاتتاۋ جانە حالىقارالىق كورمەلەرگە قاتىسۋ ارقىلى قول جەتكىزدى.
وسىلايشا، قازاقستان تەك ت م د ەلدەرىنەن عانا ەمەس، بۇكىل ازيا مەملەكەتتەرىنەن ستۋدەنتتەردى تارتاتىن ورتالىققا اينالىپ كەلەدى. بۇل - ەلىمىزدىڭ حالىقارالىق ءبىلىم بەرۋ نارىعىندا ءوز ۇلەسىن جىل ساناپ ارتتىرىپ كەلە جاتقانىنىڭ ايقىن كورىنىسى.
شەتەلدىك ستۋدەنتتەر نە سەبەپتى ءبىزدىڭ ەلدى تاڭدايدى؟ Kazinform ءتىلشىسىنىڭ ساۋالىنا وراي، عىلىم جانە جوعارى ءبىلىم مينيسترلىگى شەتەلدىك ستۋدەنتتەردى ەلىمىزگە تارتىپ تۇراتىن بىرنەشە نەگىزگى فاكتوردى اتاپ كورسەتتى.
اۆتور
ەربول جانات