قازاقستاندا 20 جىلدا قانشا اۋىل جويىلىپ كەتتى
استانا. KAZINFORM - سەناتور سەرىك شايداروۆ دەپۋتاتتىق ساۋالىندا اۋىلداردا ءومىر ءسۇرۋ ساپاسىنىڭ تومەندەپ بارا جاتقانىن جانە اۋىلداردىڭ جويىلىپ كەتۋىنە اكەلىپ سوعاتىن پروبلەمالاردى اتادى.
دەپۋتات «اۋىل - ەل بەسىگى» باعدارلاماسىنا دا توقتالدى. 2019-جىلدان بەرى جۇمىس ىستەپ كەلە جاتقان ول اۋىلدىق جەرلەردە ءومىر ءسۇرۋ ساپاسىن جاقسارتۋدى كوزدەيدى. 2014-2023-جىلدار ارالىعىندا رەسپۋبليكالىق بيۋجەتتەن 524 ميلليارد تەڭگە ءبولىنىپ، 1800 اۋىلدا 5 مىڭنان استام جوبانى جۇزەگە اسىرۋعا مۇمكىندىك تۋدى.
ونىڭ پايىمىنشا، باعدارلامادا تۇراقتى جۇمىس ورىندارىن اشۋ كورسەتكىشى جوق، بۇل اۋىلدى دامىتۋدىڭ الەمدىك تاجىريبەسىنە قايشى كەلەدى. مۇندا تابىس دەڭگەيى مەن جۇمىسسىزدىق سياقتى ەكونوميكالىق كورسەتكىشتەر باستى ءرول اتقارادى.
سەناتور ەلىمىزدە كەيىنگى 20 جىلدا 1404 اۋىلدىڭ جويىلىپ كەتكەنىن، بۇل جاعداي اۋىلدىق ايماقتارعا قاتىستى مەملەكەتتىك ساياساتتى قايتا قاراۋ قاجەت ەكەنىن بايقاتىپ وتىرعانىن العا تارتتى.
«مەملەكەتتىك قولداۋدىڭ قاتىسۋىمەن بولىنەتىن بارلىق نەسيەلەردى «اۋىل - ەل بەسىگى» بويىنشا اۋىلدىق ەلدى مەكەندەردى قارجىلاندىرۋمەن بايلانىستىرۋ جانە نەگىزگى ينديكاتوردى وسى ەلدى مەكەندەردەگى سالالار بويىنشا جالپى قوسىلعان قۇننىڭ جىل سايىنعى وسۋىنە مونيتورينگ جۇرگىزە وتىرىپ، جاڭا تۇراقتى جۇمىس ورىندارىنىڭ اشىلۋىمەن ايقىنداۋ ۇسىنىلدى. قالىپتاسقان جاعدايدى ەسكەرە وتىرىپ، «نەگە ينفراقۇرىلىمعا ميللياردتاعان سوما قۇيىلاتىن اۋىلدىق ەلدى مەكەندەردە بولىنگەن نەسيەلەر مەن بيزنەس اشۋ بويىنشا تالداۋ جوق؟» دەگەن سۇراق تۋىندايدى. «اۋىل - ەل بەسىگى» جوباسىنىڭ ماقساتى - وسى اۋىلدارداعى ەكونوميكالىق ءوسۋ ولشەمى ارقىلى اۋىل تۇرعىندارىنىڭ ءومىر ءسۇرۋ ساپاسىن جاقسارتۋ. ءىس جۇزىندە بيۋجەت قارجىسىن ادەتتەگىدەي يگەرۋ ءجۇرىپ جاتىر، ال تۇراقتى جۇمىس ورىندارى اشىلماسا، مەملەكەت سالىنعان قارجىدان ءتيىستى ناتيجە الا المايدى»، - دەدى سەرىك شايداروۆ ۇكىمەت باسشىسى ولجاس بەكتەنوۆتىڭ اتىنا جولداعان ساۋالىندا.
سەناتوردىڭ ۇسىنىسىندا اۋىلدى جەرلەردە ەكونوميكالىق دامۋعا جانە جاڭا تۇراقتى جۇمىس ورىندارىن اشۋعا باسا نازار اۋدارا وتىرىپ، «اۋىل - ەل بەسىگى» باعدارلاماسىنا كەشەندى تالداۋ جۇرگىزۋ كەرەك ەنەنى ايتىلدى.