قازاقستاندا 14 جالعان پوليتسەي ۇستالدى

استانا. قازاقپارات - بيىل قۇزىرلى ورگاندار جالعان پوليتسەي بولىپ، ازاماتتاردان اقشا بوپسالاعان 14 كۇدىكتىنى ۇستادى، دەپ حابارلايدى 24KZ.

ولار الاياقتىقپەن اينالىسىپ قانا قويماي، قىلمىستىق «قامقورلىق كورسەتىپتى». مىسالى، قاراشا ايىندا شىمكەنتتە ءبىر توپ ادام پوليتسيا قىزمەتكەرلەرىنىڭ كەيپىنە ەنىپ، اي سايىن 1,5 ميلليون تەڭگە الىپ وتىرعان. ال اقتوبەدە ەكى جاس جىگىت قالانىڭ ەكى تۇرعىنىنا زورلىق- زومبىلىق كورسەتىپ، 300 مىڭ تەڭگە العان. الماتى وبلىسىنىڭ ەكى تۇرعىنى وزدەرىن جەدەل ۋاكىل رەتىندە كورسەتىپ، جابىرلەنۋشىدەن 500 مىڭ تەڭگە بوپسالاعان. كۇدىكتىلەردەن جالعان قىزمەتتىك كۋالىك، قۇجات جانە كيىم تاركىلەنىپ، قاماۋعا الىندى.

قۋاندىق الپىس، ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ وكىلى:

- زاماناۋي تەحنولوگيالار الاياقتارعا ىقتيمال قۇرباندار تۋرالى ءارتۇرلى اقپاراتتى وڭاي الۋعا مۇمكىندىك بەرەدى. بۇل ولاردىڭ قىلمىستىق سحەمالارىن سەنىمدى ەتەدى. ازاماتتاردىڭ قىراعىلىعى مۇنداي قىلمىستاردىڭ سانىن ەداۋىر تومەندەتۋى مۇمكىن. ءى ءى م كەز كەلگەن زاڭسىز ارەكەتتەر تۋرالى پوليتسياعا دەرەۋ حابارلاۋدى سۇرايدى. بۇل باعىتتاعى پروفيلاكتيكالىق جۇمىستار جالعاسىپ جاتىر.