قازاقستاندا 10 مىڭعا جۋىق عالىم ايەل بار - مينيستر
استانا. KAZINFORM - قازاقستاندا 22456 عالىم بولسا، ونىڭ 9691 ءى ايەل قاۋىمى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى.
«بۇگىن دۇنيەجۇزىندە ايتۋلى مەرەكە. دالىرەك ايتار بولسام، وسى كۇن - عىلىمداعى ايەلدەر مەن قىزداردىڭ حالىقارالىق كۇنى. وسىناۋ مەرەكەگە وراي ەلىمىزدەگى عىلىم جانە جوعارى ءبىلىم سالاسىندا ايانباي ەڭبەك ەتىپ جۇرگەن بارشا قىز-كەلىنشەكتەردى ءوزىمنىڭ جانە مينيسترىلىكتىڭ اتىنان شىن جۇرەكتەن قۇتتىقتايمىن!»، - دەپ جازدى س.نۇربەك الەۋمەتتىك جەلىدەگى پاراقشاسىندا.
وسى ورايدا ول عىلىمنىڭ جۇدىرىقتاي جۇرناعىن ۇستاعان عالىم ايەلدەر ەلىمىزدەگى جوعارى وقۋ ورىندارىندا، عىلىم ينستيتۋتتارىندا، زەرتتەۋ الاڭدارىندا ۇزدىكسىز ەڭبەك ەتىپ جاتقانىن اتاپ ءوتتى.
«بۇل مەرەكە 2015 -جىلدان بەرى ب ۇ ۇ باس اسسامبلەياسىنىڭ بەكىتۋىمەن اتالىپ كەلەدى. ايشىقتى مەيرامنىڭ بارشامىز ءۇشىن ورنى بولەك ەكەنى اقيقات. ويتكەنى، نازىك جاندىلاردىڭ ادامزات الدىنداعى جاۋاپكەرشىلىگى جوعارى. ۇلتتى ۇشپاققا شىعارىپ، ۇرپاق تاربيەلەۋدە وزىندىك قايتالانباس قولتاڭباسى بار ايەلدەر قاۋىمىنا الەم قارىزدار دەسەم، ارتىق ايتپاعانىم بولار. قازاقستاندا 22456 عالىم بولسا، ونىڭ 9691- ءى ايەل قاۋىمى. بۇل - البەتتە ۇلكەن جەتىستىك.
تاريحىمىزعا زەر سالار بولساق، قانشاما عالىم ايەل- انالار ەل تاريحىنا، ۇلت مۇددەسىنە قىزمەت ەتكەنىن اڭعارۋ قيىن ەمەس. ءبىر عانا مىسال، قازاقتىڭ تۇڭعىش ايەل دارىگەرى - اققاعاز دوسجانوۆا. ول 1893-جىلى تورعاي وبلىسى اقتوبە ۋەزى ءبورتى بولىسىندا تۋعان. ا. دوسجانوۆا وقۋىن بىتىرگەن سوڭ مەديتسينا ماماندىعى بويىنشا گينەكولوگيا جانە پەدياتريا سالاسىندا قىزمەت ەتكەن.
سونىمەن قاتار حالقىمىزدان شىققان تۇڭعىش گەولوگ ايەل-عالىم - پاتشايىم تاجىبايەۆا. پ. تاجىبايەۆانىڭ گەولوگيا عىلىمىنىڭ ىشىندەگى ىرگەلى سالا ليتولوگيانىڭ نەگىزىن قالاعان قازاق قىزى. مىنە، ءبىزدىڭ وتكەنىمىز وسىنداي تۇلعالارمەن جارقىن ءارى ۇلگى بولارلىقتاي. كەشەگى اققاعاز، پاتشايىمداي تۇلعالاردىڭ ءىزباسارى رەتىندە زاكاريا كۇنسۇلۋ دالتون قىزىن اتاپ وتپەسكە بولماس. ك. دالتون قىزى Covid-19 قارسى قازاقستاندىق QazVac ۆاكسيناسىن جاساپ شىعارىپ، وتاندىق مەديتسيناعا قوماقتى ۇلەس قوسقان عالىم. وعان قوسا كۇنسۇلۋ حانىم جاقىندا عانا الەمنىڭ توپ عالىمدارى قاتارىنا ەندى»، - دەپ جازدى مينيستر.
اۆتور
رۋسلان عابباسوۆ