قازاقستاندا 10-11-سىنىپ وقۋشىلارىنا كوللەدجدە قاتار وقۋ مۇمكىندىگىن بەرۋ ۇسىنىلدى
استانا. KAZINFORM - ەلىمىزدە 11-سىنىپ بىتىرگەن تۇلەكتەردىڭ 50 مىڭى قايتادان كوللەدجدەرگە تۇسەدى جانە ءبىر ءپاندى قايتالاپ وقۋعا ءماجبۇر. بۇل تۋرالى ءماجىلىس دەپۋتاتى اسحات ايماعامبەتوۆ ايتتى.
«10-11-سىنىپ وقۋشىلارىنا ءوز تاڭداۋى بويىنشا مەكتەپتەگى وقۋىمەن بىرگە كوللەدجدەردە پاراللەلدى تۇردە وقۋعا مۇمكىندىك بەرۋ ۇسىنىلادى. مىسالى اۋىلداردا بالا تۇسكە دەيىن ءبىر اۋىسىمدى مەكتەپتە وقيدى، ال تۇستەن كەيىن - كوللەدجەردە قوسىمشا ماماندىق الىپ شىعۋعا مۇمكىندىك بەرۋشى ەدىك. بۇگىندە 11-سىنىپ بىتىرگەندەردىڭ 50 مىڭى قايتادان كوللەدجدەرگە تۇسەدى، تاعى دا سول پاندەردى قايتالاپ وقيدى. سوندىقتان ءبىزدىڭ ويىمىزشا كوللەدجدەردە پاراللەل وقۋعا مۇمكىندىك بەرۋ اقشانى دا، بالانىڭ ۋاقىتىن دا ءتيىمدى جۇمساۋعا مۇمكىندىك بەرەدى جانە مەكتەپتى بىتىرگەندە اتتەستاتپەن قاتار، ناقتى بىلىكتىلىگى بار ديپلوم الىپ شىعادى»، - دەدى اسحات ايماعامبەتوۆ ماجىلىستە «قازاقستاننىڭ ەڭبەك نارىعىن دامىتۋ جانە كادرلىق الەۋەتىن نىعايتۋ» اتتى ۇكىمەت ساعاتىندا.
كوللەدجدەر بويىنشا قازىر ءار ءوڭىر ءوز قاجەتتىلىگىن ءوزى انىقتاپ، مەملەكەتتىك تاپسىرىستى وزدەرى ورنالاستىرادى. وعان جالپى مونيتورينگ جۇرگىزىلمەيدى. ا. ايماعامبەتوۆ كوللەدجدەر بويىنشا ءبىرىڭعاي ءبىلىم بەرۋ تاپسىرىسىن قالىپتاستىرۋ مەن جەدەل باسقارۋدى وقۋ- اعارتۋ مينيسترلىگىنە تىكەلەي بەرۋ ماسەلەسىن قاراستىرۋدى ۇسىندى.
«كوللەدجدەر جانىنداعى وقۋ- وندىرىستىك كومبيناتتار تاجىريبەسىن قايتا باستاۋ قاجەت. ءبىراق مەكتەپتەر جانىندا ولاردى اشۋ مۇمكىن ەمەستىگىن ءتۇسىنۋ كەرەك، وعان عيمارات تا، قاراجات تا جوق.
ال كوللەدجدەردىڭ الەۋەتىن پايدالانۋ ابدەن مۇمكىن. وسى جوبانى ەنگىزىپ، مەكتەپتەر مەن كوللەدجدەر اراسىنداعى ءوزارا بايلانىستى ورناتۋ قاجەت.
كوللەدجدەردىڭ ماتەريالدىق- تەحنيكالىق جابدىقتالۋىن اياقتاۋ قاجەت، «جاس مامان» جوباسى اياسىندا 180 كوللەدج جابدىقتالدى، ەندى تاعى 180 كوللەدجدى اياقتاعان ءجون. كوللەدجدەگى گرانتتىڭ قۇنىن ايتارلىقتاي ۇلعايتۋ قاجەت، جانە ءبىر ستۋدەنتتى وقىتۋ قۇنىنىڭ ادىستەمەسىندە پراكتيكالىق جۇمىسقا، شىعىن ماتەريالدارىنا جانە جابدىقتارعا جۇمسالاتىن شىعىنداردى ەسكەرۋ كەرەك» ، - دەدى ا. ايماعامبەتوۆ.
سونىمەن بىرگە، ناقتى كاسىپورىننىڭ وزىنە ماقساتتى ءبىلىم گرانتتارىن بەرۋ تاجىريبەسىن ەنگىزۋ ۇسىنىلدى.
«ياعني گرانت جۇمىس بەرۋشىنىڭ وزىنە بەرىلەدى، ول بولاشاق جۇمىسشىلارىن - كاسىپورىننىڭ ءوزى تاڭدايدى. ءوز كەزەگىندە جۇمىس بەرۋشى تۇلەكتى جۇمىسقا ورنالاستىرۋ تۋرالى كەپىلدەمە بەرەدى، ءدۋالدى وقىتۋداعى پراكتيكا ورنىن، ءبىلىم بەرۋ باعدارلاماسىن ازىرلەۋگە قاتىسۋدى دا كەپىلدەيدى. ال ءبىز ول ستۋدەنتتەردى وقۋىن اياقتاعاننان كەيىن وسى كاسىپورىندا جۇمىس ىستەۋ مىندەتىن زاڭنامالىق تۇردە ەنگىزۋدى جوسپارلاپ وتىرمىز»، - دەدى ءماجىلىس دەپۋتاتى.
بۇعان دەيىن ءماجىلىس دەپۋتاتى ەلدەگى جۇمىسپەن قامتۋ شارالارىنىڭ ءتيىمدى بولماعانىن سىناعان ەدى.
سونداي- اق، قازاقستاندا «جۇمىس ىستەيتىن كەدەيلەر» فەنومەنى بەلەڭ العانىن ايتۋدا.
اۆتور
ايجان سەرىكجان قىزى