قازاقستانعا ورالعان قانداستارعا قانشا تەڭگەدەن بەرىلدى؟

2024-جىلدىڭ باسىنان بەرى 1,3 مىڭنان اسا ەتنيكالىق قازاق قانداس مارتەبەسىن الدى. بۇل تۋرالى اقپاراتتى ەڭبەك جانە حالىقتى الەۋمەتتىك قورعاۋ مينيسترلىگى ءمالىم ەتتى.

«2024-جىلعى 1- اقپانداعى جاعداي بويىنشا 1306 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. جالپى 1991-جىلدان بەرى رەسپۋبليكاعا 1 ميلليون 129,6 مىڭ ەتنيكالىق قازاق ورالدى. جىل باسىنان باستاپ قازاقستانعا كەلگەن قانداستاردىڭ جارتىسى (48,9 پايىزى) قىتايدان، 29,6 پايىزى - وزبەكستاننان، 8,3 پايىزى - موڭعوليادان، 4,4 پايىزى - رەسەيدەن، 7,3 پايىزى تۇرىكمەنستاننان جانە 1,5 پايىزى باسقا ەلدەردەن»، - دەلىنگەن حابارلامادا.

بيىلعى 1- اقپانداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 56,2 پايىز، ەڭبەككە قابىلەتتى جاستان كىشى 33,6 پايىز جانە زەينەتكەرلەر 10,2 پايىز بولعان.

«ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 15 پايىزى جوعارى ءبىلىمدى، 20,2 پايىزى ورتا كاسىبي ءبىلىمدى، 54,6 پايىزى جالپى ورتا ءبىلىمدى، جانە 10,2 پايىزىنىڭ ءبىلىم جوق».

قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستانعان.

«سونىمەن بىرگە، قانداستاردى قونىستاندىرۋ ءۇشىن كەلەسىدەي ەڭبەك كۇشى تاپشى وڭىرلەر انىقتالدى: اقمولا، اباي، قوستاناي، پاۆلودار، شىعىس جانە سولتۇستىك قازاقستان وبلىستارى. قونىستاندىرۋ وڭىرلەرىندە 2023-جىلعا ارنالعان قانداستاردى قابىلداۋ كۆوتاسى 2433 ادام بولادى. 2023-جىلعى 1-اقپانداعى جاعداي بويىنشا، قونىستاندىرۋ وڭىرلەرىنە 332 قانداس قونىس اۋداردى.

بۇل وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى - ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 ا ە ك (258,4 مىڭ تەڭگە) مولشەرىندە؛ تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە - ءبىر جىل ىشىندە 15 تەن 30 ا ە ك (55,3 دەن 110,7 مىڭ تەڭگەگە دەيىن) مولشەرىندە»، - دەلىنگەن حابارلامادا.

جىل باسىنان بەرى 35 قانداسقا ءتۇرلى قولداۋ شارالارى كورسەتىلىپ، تۇراقتى جۇمىسقا ورنالاستىرىلعان.

«سونىمەن قاتار، ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلداندى. تۇرعىن ءۇي ساتىپ الۋ، سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50 پايىزى نەمەسە ءبىر وتباسىنا 4,28 ميلليون تەڭگەگە دەيىن مولشەرىندە ءبىرجولعى وتەۋسىز جانە قايتارىمسىز نەگىزدە ەنگىزىلدى»، - دەلىنگەن حابارلامادا.

Massaget.kz